Read ახალი აღთქმა წიგნი იოანესი 2 Bible Online

წიგნი იოანესი 2 - ახალი აღთქმა bible

წიგნი იოანესი 2

¹მესამე დღეს ქორწილი იყო გალილეის კანაში და იყო იესოს დედა იქ.

²და მიიწვიეს იესო და მისი მოწაფეები ქორწილში.

³და როცა შემოაკლდათ ღვინო, უთხრა იესოს მისმა დედამ: ღვინო არ აქვთ.

⁴უთხრა მას იესომ: რა არის ჩემი და შენი საზრუნავი, დედაკაცო? ჯერ არ მოსულა ჩემი ჟამი.

⁵უთხრა მისმა დედამ მსახურებს: რასაც გეტყვით თქვენ, გააკეთეთ.

⁶და იყო იქ ქვის ექვსი სარწყული იუდეველთა განწმენდის წესისამებრ და იტევდა ორ ან სამ საწყაოს.

⁷და უთხრა მათ იესომ: აავსეთ სარწყულები წყლით. და აავსეს ისინი პირამდე.

⁸და უთხრა მათ: ამოიღეთ ახლა და მიუტანეთ სუფრის გამგეს; და მათ მიუტანეს.

⁹და როდესაც იგემა სუფრის გამგემ წყალი, რომელიც ღვინოდ იქცა — არ იცოდა, საიდან იყო, ხოლო მსახურებმა, რომლებმაც აავსეს წყალი, იცოდნენ — მოუხმო სიძეს სუფრის გამგემ

¹⁰და უთხრა მას: ყოველი კაცი ჯერ კარგ ღვინოს დგამს და, როცა დათვრებიან, მაშინ — ურიგოს, ხოლო შენ შეინახე კარგი ღვინო აქამდე.

¹¹ასე დაიწყო სასწაულთა ქმნა იესომ გალილეის კანაში და გამოუცხადა თავისი დიდება და ირწმუნეს მისი მისმა მოწაფეებმა.

¹²ამის შემდეგ ჩავიდა კაპერნაუმში იგი, და მისი დედა და მისი ძმები და მისი მოწაფეები და იქ გაჩერდნენ რამდენიმე დღე.

¹³და მოახლოებული იყო იუდეველთა პასექი და ავიდა იესო იერუსალიმში;

¹⁴და ნახა ტაძარში ხარების და ცხვრების და მტრედების გამყიდვლები და მეკერმეები, მსხდომარენი,

¹⁵და გააკეთა შოლტი საბლისგან და გამოყარა ტაძრიდან ყველა: ცხვრები და ხარები, და მეკერმეებს დაუბნია კერმა და მაგიდები გადაუყირავა

¹⁶და მტრედების გამყიდვლებს უთხრა: აიღეთ ეს აქედან და ნუ აქცევთ ჩემი მამის სახლს სავაჭრო სახლად.

¹⁷და გაახსენდათ მის მოწაფეებს, რომ დაწერილია: შურმა შენი სახლისამ შემჭამა მე (ფს.68,10).

¹⁸მიუგეს იუდეველებმა და უთხრეს მას: რა სასწაულს გვიჩვენებ ჩვენ, ამას რომ აკეთებ?

¹⁹მიუგო იესომ და უთხრა მათ: დაანგრიეთ ეს ტაძარი და სამ დღეში აღვადგენ მას.

²⁰უთხრეს მას იუდეველებმა: ორმოცდაექვსი წელი შენდებოდა ეს ტაძარი და შენ სამ დღეში აღადგენ მას?

²¹ხოლო იგი ამბობდა თავისი სხეულის ტაძრის შესახებ.

²²და როცა აღდგა მკვდრეთით, გაახსენდათ მის მოწაფეებს, რომ ამას ამბობდა, და ირწმუნეს წერილისა და სიტყვისა, რომელიც უთხრა იესომ.

²³და როცა იყო იერუსალიმში პასექზე, დღესასწაულზე, მრავალმა ირწმუნა მისი სახელით, რადგან ხედავდნენ მის სასწაულებს, რომლებსაც აღასრულებდა;

²⁴ხოლო თვით იესო არ ცდილობდა, რომ ერწმუნათ მათ მისი, იმის გამო რომ თვითონ იცნობდა ყველას,

²⁵და არ სჭირდებოდა, რომ ვინმეს დაემოწმებინა ადამიანის შესახებ, რადგან თვითონ იცოდა, რა იყო ადამიანში.