Read ახალი აღთქმა წიგნი იოანესი 20 Bible Online

წიგნი იოანესი 20 - ახალი აღთქმა bible

წიგნი იოანესი 20

¹და ერთშაბათს მივიდა მარიამ მაგდალელი საფლავზე განთიადისას, ჯერ კიდევ სიბნელე იყო, და დაინახა ლოდი, აღებული საფლავიდან;

²გაიქცა და მივიდა სიმონ-პეტრესთან და სხვა მოწაფესთან, რომელიც უყვარდა იესოს, და უთხრა მათ: აიღეს უფალი საფლავიდან და არ ვიცი, სად დადეს იგი.

³გამოვიდა პეტრე, და სხვა მოწაფე და წავიდნენ საფლავზე;

⁴და მირბოდა ორივე ერთად; ხოლო სხვა მოწაფე პეტრეზე სწრაფად გაიქცა წინ და პირველი მივიდა საფლავზე;

⁵და დაიხარა და დაინახა, რომ ტილოები ეწყო, მაგრამ არ შევიდა.

⁶მივიდა სიმონ-პეტრეც, რომელიც მისდევდა მას, და შევიდა საფლავში და დაინახა, რომ ტილოები ეწყო,

⁷და სუდარა, რომელიც თავზე ჰქონდა მას, იდო არა ტილოებთან, არამედ ცალკე, შეკეცილი ერთ ადგილას.

⁸მაშინ შევიდა სხვა მოწაფეც, რომელიც პირველი მივიდა საფლავზე, და იხილა და ირწმუნა,

⁹რადგან ჯერ არ იცოდნენ წერილიდან, რომ იგი მკვდრეთით უნდა აღმდგარიყო.

¹⁰და წავიდნენ კვლავ თავისთან მოწაფეები.

¹¹ხოლო მარიამი იდგა საფლავთან, გარეთ და ტიროდა. და როცა ტიროდა, შეიხედა საფლავში

¹²და დაინახა ორი ანგელოზი, თეთრით შემოსილი, რომლებიც ისხდნენ ერთი თავთან და ერთი ფეხებთან, სადაც ესვენა გვამი იესოსი,

¹³და უთხრეს მათ მას: დედაკაცო რას ტირი? უთხრა მათ: აიღეს ჩემი უფალი და არ ვიცი, სად დადეს იგი.

¹⁴როცა ეს თქვა, მიბრუნდა უკან და დაინახა იესო, რომელიც იდგა, და ვერ იცნო, რომ იესოა.

¹⁵უთხრა მას იესომ: დედაკაცო, რას ტირი? ვის ეძებ? — მას ეგონა, რომ მებაღეა, და უთხრა მას: ბატონო, თუ შენ აიღე იგი, მითხარი, სად დადე, და მე წამოვიღებ მას.

¹⁶უთხრა მას იესომ: მარიამ! მიბრუნდა იგი და უთხრა მას ებრაულად: რაბბუნი! — რაც ნიშნავს: მოძღვარო — და გაიქცა, რომ შეხებოდა მას.

¹⁷უთხრა მას იესომ: ნუ შემეხები მე, რადგან ჯერ არ ავსულვარ ჩემს მამასთან; წადი ჩემს ძმებთან და უთხარი მათ: ავდივარ ჩემს მამასთან და თქვენს მამასთან, ჩემს ღმერთთან და თქვენს ღმერთთან.

¹⁸მივიდა მარიამ მაგდალელი და აუწყა მის მოწაფეებს, რომ იხილა უფალი და ეს უთხრა მას.

¹⁹და როცა მოსაღამოვდა იმ ერთშაბათ დღეს და კარები დაკეტილი იყო, სადაც იყვნენ მოწაფეები შეკრებილნი იუდეველთა შიშის გამო, მივიდა იესო და დადგა შუაში და უთხრა მათ: მშვიდობა თქვენდა.

²⁰და ეს რომ თქვა, უჩვენა მათ თავისი ხელები და გვერდი; და გაიხარეს მოწაფეებმა, იხილეს რა უფალი.

²¹და უთხრა მათ იესომ კვლავ: მშვიდობა თქვენდა; როგორც მომავლინა მე მამამ, მეც გგზავნით თქვენ.

²²და როცა ეს თქვა, შეჰბერა მათ და უთხრა: მიიღეთ სულიწმიდა;

²³ვისაც მიუტევებთ ცოდვებს, მიეტევებათ მათ და ვისაც შეკრავთ, შეკრულები იქნებიან.

²⁴ხოლო თომა, ერთი თორმეტთაგანი, რომელსაც ერქვა ტყუპისცალი, არ იყო მათთან, როცა მივიდა იესო.

²⁵ეუბნებოდნენ მას სხვა მოწაფეები: ვიხილეთ ჩვენ უფალი. ხოლო მან უთხრა მათ: თუ არ ვიხილავ მის ხელებზე სამსჭვალთა კვალს და არ დავადებ ჩემს თითს სამსჭვალთა ადგილს და არ დავადებ ჩემს ხელს მის გვერდს, არ ვირწმუნებ.

²⁶და რვა დღის შემდეგ კვლავ შინ იყვნენ მისი მოწაფეები და თომაც — მათთან ერთად. და მოვიდა იესო, როცა კარები დაკეტილი იყო, და დადგა შუაში და უთხრა: მშვიდობა თქვენდა.

²⁷შემდეგ უთხრა თომას: გამოიწოდე შენი თითი აქ და იხილე ჩემი ხელები; და გამოიწოდე შენი ხელი და დაადე ჩემს გვერდს; და ნუ იქნები ურწმუნო, არამედ იყავი მორწმუნე.

²⁸მიუგო თომამ და უთხრა მას: უფალი ჩემი და ღმერთი ჩემი.

²⁹უთხრა მას იესომ: რადგან მიხილე, ირწმუნე; ნეტარნი არიან, რომელთაც არ იხილეს და ირწმუნეს.

³⁰მრავალი სხვა სასწაულიც აღასრულა იესომ თავისი მოწაფეების წინაშე, რომელიც არ არის დაწერილი ამ წიგნში;

³¹ხოლო ეს დაიწერა, რათა გწამდეთ, რომ იესო არის ქრისტე, ძე ღვთისა, და რათა ვისაც გწამთ, საუკუნო ცხოვრება გქონდეთ მისი სახელით.