Read ახალი აღთქმა წიგნი იოანესი 21 Bible Online

წიგნი იოანესი 21 - ახალი აღთქმა bible

წიგნი იოანესი 21

¹მის შემდეგ კვლავ გამოუცხადა თავისი თავი. იესომ მოწაფეებს ტიბერიის ზღვაზე; და გამოუცხადა ასე:

²იყვნენ ერთად სიმონ-პეტრე და თომა, რომელსაც ერქვა ტყუპისცალი, და ნათანაელი, რომელიც იყო გალილეის კანიდან, და ზებედეს ძეები და მის სხვა მოწაფეთაგან ორნი.

³უთხრა მათ სიმონ-პეტრემ: მივდივარ სათევზაოდ. უთხრეს მას: მოვდივართ ჩვენც შენთან ერთად. გავიდნენ და ავიდნენ ნავზე და იმ ღამეს ვერაფერი დაიჭირეს.

⁴და როცა გათენდა, იდგა იესო ნაპირზე და არ იცოდნენ მოწაფეებმა, რომ იესოა.

⁵უთხრა მათ იესომ: ყრმებო, არა გაქვთ რამე საჭმელი? მიუგეს მას: არა.

⁶ხოლო მან უთხრა მათ: ისროლეთ ბადე ნავის მარჯვენა მხარეს და იპოვით; და ისროლეს და ვეღარ შეძლეს მოზიდვა თევზის სიმრავლის გამო.

⁷უთხრა იმ მოწაფემ, რომელიც უყვარდა იესოს, პეტრეს: უფალია; ხოლო სიმონ-პეტრემ, როცა გაიგონა, რომ უფალია, შემოისარტყლა სამოსი, რადგან შიშველი იყო, და გადაეშვა ზღვაში;

⁸ხოლო სხვა მოწაფეები ნავით მივიდნენ, რადგან არ იყვნენ შორს ხმელეთიდან, არამედ დაახლოებით ორას წყრთაზე, და გამოათრიეს ბადე თევზით.

⁹და როგორც კი გადმოვიდნენ მიწაზე, დაინახეს გაშლილი ნაკვერჩხალი და ზედ დადებული თევზი და პური.

¹⁰უთხრა მათ იესომ: მოიტანეთ იმ თევზებიდან, ახლა რომ დაიჭირეთ.

¹¹ავიდა სიმონ-პეტრე და ამოათრია ბადე მიწაზე, სავსე დიდი თევზებით, ას ორმოცდაცამეტი იყო; ამდენი იყო და არ გასკდა ბადე.

¹²უთხრა მათ იესომ: მოდით, ისადილეთ. და ვერავინ გაბედა მოწაფეთაგან, ეკითხა მისთვის: შენ ვინ ხარ? იცოდნენ, რომ უფალია.

¹³მივიდა იესო და აიღო პური და მისცა მათ, და თევზიც ასევე.

¹⁴ეს უკვე მესამედ გამოეცხადა იესო მოწაფეებს, რაც აღდგა მკვდრეთით.

¹⁵და როცა ისადილეს, უთხრა სიმონ-პეტრეს იესომ: სიმონ იონასო, გიყვარვარ მე ამათზე მეტად? უთხრა მას პეტრემ: ჰო, უფალო, შენ იცი, რომ მიყვარხარ შენ. უთხრა მას იესომ: აძოვე ჩემი კრავები.

¹⁶უთხრა მას კვლავ მეორედ: სიმონ იონასო, გიყვარვარ მე? უთხრა მას პეტრემ: ჰო, უფალო, შენ იცი, რომ მიყვარხარ შენ. უთხრა მას იესომ: დამწყემსე ჩემი ცხვრები.

¹⁷უთხრა მას მესამედ იესომ: სიმონ იონასო, გიყვარვარ მე? შეწუხდა პეტრე, რადგან უთხრა მას მესამედ: გიყვარვარ მე? და უთხრა მას: უფალო, შენ ყოველივე უწყი, შენ იცი, რომ მიყვარხარ შენ. უთხრა მას იესომ: დამწყემსე ჩემი ცხვრები.

¹⁸ამინ, ამინ გეუბნები შენ: როცა იყავი ჭაბუკი, თვითონ შემოისარტყლავდი თავს და დადიოდი, სადაც გინდოდა, ხოლო როცა დაბერდები, გაშლი შენს ხელებს და სხვა შემოგსარტყლავს შენ და წაგიყვანს, სადაც არ გინდა.

¹⁹და ეს თქვა და მიანიშნებდა, როგორი სიკვდილით განადიდებდა ღმერთს. და როცა ეს თქვა, უთხრა მას: გამომყევი მე.

²⁰მობრუნდა პეტრე და დაინახა, რომ მისდევდა მას მოწაფე, რომელიც უყვარდა იესოს და რომელიც მიეყრდნო სერობისას მის მკერდს და უთხრა მას: უფალო, ვინ არის, ვინც გაგცემს შენ?

²¹ეს რომ დაინახა პეტრემ, უთხრა იესოს: უფალო, ეს რა?

²²უთხრა მას იესომ: თუ მინდა, რომ იყოს იგი, ვიდრე მოვალ, შენ რა? შენ მე გამომყევი.

²³და გავრცელდა ეს სიტყვა ძმათა შორის, რომ ის მოწაფე არ მოკვდებოდა; და არ უთქვამს მისთვის იესოს: არ მოკვდება, არამედ: თუ მინდა, რომ იყოს იგი, ვიდრე მოვალ, შენ რა?

²⁴ეს არის მოწაფე, რომელიც მოწმობს ამაზე და რომელმაც დაწერა ეს, და ვიცით, რომ ჭეშმარიტია მისი მოწმობა.

²⁵და არის სხვა მრავალიც, რაც აღასრულა იესომ, რომლებიც სათითაოდ რომ დაწერილიყო, არა მგონია, ამ სოფელს დაეტია დაწერილი წიგნები. ამინ.