Read ახალი აღთქმა წიგნი იოანესი 3 Bible Online

წიგნი იოანესი 3 - ახალი აღთქმა bible

წიგნი იოანესი 3

¹და იყო ერთი კაცი ფარისეველთაგანი, სახელად ნიკოდიმოსი, იუდეველთა მთავარი.

²იგი მივიდა იესოსთან ღამე და უთხრა მას: რაბი, ვიცით, რომ ღვთისაგან ხარ მოსული მოძღვრად, რადგან არავის შეუძლია ამ სასწაულთა ქმნა, რომელთაც შენ იქმ, თუ არ იქნება ღმერთი მასთან.

³მიუგო იესომ და უთხრა მას: ამინ, ამინ გეუბნები შენ: ვინც არ იშვება ზეგარდამო, არ შეუძლია ღვთის სასუფევლის ხილვა.

⁴უთხრა მას ნიკოდიმოსმა: როგორ შეუძლია მოხუც კაცს შობა? განა შეუძლია თავისი დედის მუცელში მეორედ შესვლა და შობა?

⁵მიუგო იესომ და უთხრა მას: ამინ, ამინ გეუბნები შენ: ვინც არ იშვება წყლისგან და სულისგან, არ შეუძლია ღვთის სასუფეველში შესვლა.

⁶შობილი ხორცისგან ხორცია და შობილი სულისგან სულია.

⁷ნუ გიკვირს, რომ გითხარი შენ: გმართებთ თქვენ ზეგარდამო შობა.

⁸სულს, სადაც ნებავს, ქრის და მისი ხმა გესმის, მაგრამ არ იცი, საიდან მოდის და სად მიდის; ასეა ყოველი შობილი სულისგან.

⁹მიუგო ნიკოდიმოსმა და უთხრა მას: როგორ შეიძლება ეს მოხდეს?

¹⁰მიუგო იესომ და უთხრა მას: შენ ხარ მოძღვარი ისრაელისა და ეს არ იცი?

¹¹ამინ, ამინ გეუბნები შენ: რაც ვიცით, ვამბობთ და რაც ვიხილეთ, ვმოწმობთ და ჩვენს მოწმობას არ იღებთ.

¹²თუ ქვეყნისა გითხარით თქვენ და არა გწამთ, ზეცისას თუ გეტყვით, როგორ ირწმუნებთ?

¹³არავინ ასულა ზეცად, გარდა იმისა, რომელიც ზეციდან გარდამოვიდა, ძე კაცისა, რომელიც არის ზეცაში;

¹⁴და როგორც მოსემ აამაღლა გველი უდაბნოში, ასევე უნდა ამაღლდეს ძე კაცისა,

¹⁵რათა ყოველი, რომელიც ირწმუნებს მას, არ წარწყმდეს, არამედ ჰქონდეს ცხოვრება საუკუნო;

¹⁶რადგან ისე შეიყვარა ღმერთმა ეს სოფელი, რომ თავისი ძე, მხოლოდშობილი, მისცა, რათა ყოველი, რომელიც ირწმუნებს მას, არ წარწყმდეს, არამედ ჰქონდეს ცხოვრება საუკუნო;

¹⁷რადგან არ მოავლინა ღმერთმა თავისი ძე ამ სოფლად, რომ დასაჯოს სოფელი, არამედ რათა აცხონოს სოფელი მის მიერ.

¹⁸ვინც ირწმუნებს მას, არ დაისჯება, ხოლო ვინც არ ირწმუნებს, უკვე დასჯილია, რადგან არ ირწმუნა სახელი ღვთის მხოლოდშობილი ძისა.

¹⁹და ეს არის სასჯელი, რომ ნათელი მოვიდა ამ სოფლად და შეიყვარეს ადამიანებმა უფრო მეტად ბნელი, ვიდრე ნათელი, რადგან იყო მათი საქმეები ბოროტი;

²⁰რადგან ყოველ ბოროტისმოქმედს სძულს ნათელი და არ მოდის ნათელთან, რომ არ იმხილოს მისი საქმეები;

²¹ხოლო სიმართლისმოქმედი მოდის ნათელთან, რომ გაცხადდეს მისი საქმეები, რადგან ღვთის მიერ არის ქმნილი.

²²ამის შემდეგ მივიდა იესო, და მისი მოწაფეები ჰურიასტანის ქვეყანაში და იქ იმყოფებოდა მათთან ერთად და ნათელს სცემდა.

²³და იყო იოანეც და ნათელს სცემდა ენონში, სალიმის მახლობლად, რადგან ბევრი წყალი იყო იქ, და მიდიოდნენ და ნათელს იღებდნენ მისგან,

²⁴ვინაიდან იოანე ჯერ კიდევ არ იყო ჩასმული საპყრობილეში.

²⁵და ჰქონდათ დავა იოანეს მოწაფეებს იუდეველებთან განწმენდის შესახებ

²⁶და მივიდნენ იოანესთან და უთხრეს მას: რაბი, ვინც იყო შენთან იორდანის გაღმა, ვისზეც შენ დაამოწმე, აჰა, იგი ნათელს სცემს და ყველანი მიდიან მასთან.

²⁷მიუგო იოანემ და უთხრა: არ შეუძლია კაცს, აიღოს თავის თავზე რამე, თუ არ არის მოცემული მისთვის ზეციდან.

²⁸თქვენ თვითონ მემოწმებით მე, რომ ვთქვი: არა ვარ მე ქრისტე, არამედ მოვლინებული ვარ მასზე წინ.

²⁹ვისაც ჰყავს სარძლო, სიძეა; ხოლო მეგობარი სიძისა ის არის, ვინც დგას და ესმის მისი და სიხარულით ხარობს სიძის ხმით. ასე რომ ეს ჩემი სიხარული აღსრულებულია.

³⁰იგი უნდა აღორძინდეს, ხოლო მე — მოვაკლდე.

³¹ზეგარდამო მომავალი ყველაზე მაღლა დგას; და ვინც ქვეყნიდან არის, ქვეყნისაგანია და ქვეყნისას ამბობს; ხოლო ზეციდან მომავალი ყველაზე მაღლა დგას;

³²და რაც იხილა და მოისმინა, იმას მოწმობს და მის მოწმობას არავინ იღებს.

³³ვინც მიიღო მისი მოწმობა, ბეჭდით დაამოწმა, რომ ღმერთი ჭეშმარიტია.

³⁴და ვინც მოავლინა ღმერთმა, ღვთის სიტყვებს ამბობს, რადგან ზომით არ მისცა ღმერთმა სული.

³⁵მამას უყვარს ძე და ყველაფერი მისცა მას ხელში.

³⁶ვისაც სწამს ძე, აქვს ცხოვრება საუკუნო, ხოლო ვინც ეურჩება ძეს, ვერ იხილავს ცხოვრებას, არამედ ღვთის რისხვა არის მასზე.