Read ახალი აღთქმა წიგნი იოანესი 4 Bible Online

წიგნი იოანესი 4 - ახალი აღთქმა bible

წიგნი იოანესი 4

¹როგორც კი გაიგო უფალმა, რომ შეიტყვეს ფარისევლებმა, რომ იესომ უფრო მეტი დაიმოწაფა, ვიდრე იოანემ, და ნათელს სცემს —

²თუმცა იესო თვითონ არ სცემდა ნათელს, არამედ მისი მოწაფეები —

³დატოვა ჰურიასტანი და წავიდა კვლავ გალილეაში.

⁴და მას უნდა გაევლო სამარია.

⁵და მივიდა სამარიის ქალაქში, რომელსაც ეწოდება სუქარი, იმ ადგილის მახლობლად, რომელიც მისცა იაკობმა იოსებს, თავის ძეს;

⁶და იყო იქ იაკობის წყარო; ხოლო იესო, დამაშვრალი გზაზე სვლით, იჯდა წყაროსთან. იყო დაახლოებით მეექვსე ჟამი.

⁷მოვიდა დედაკაცი სამარიიდან წყლის ასავსებად. უთხრა მას იესომ: დამალევინე მე, —

⁸რადგან მისი მოწაფეები წასულები იყვნენ ქალაქში, რომ საზრდო ეყიდათ.

⁹უთხრა მას სამარიელმა დედაკაცმა: როგორ, შენ იუდეველი ხარ და ჩემგან, სამარიელი დედაკაცისგან, ითხოვ, რომ დაგალევინო? — რადგან არ ურთიერთობენ იუდეველები სამარიელებთან.

¹⁰მიუგო იესომ და უთხრა მას: რომ იცოდე საბოძვარი ღვთისა და ვინ არის, ვინც გეუბნება შენ: დამალევინე მე, — შენ სთხოვდი მას და მოგცემდა შენ ცოცხალ წყალს.

¹¹უთხრა მას დედაკაცმა: ბატონო, არც ამოსაღები გაქვს და ჭაც ღრმა არის; საიდან გაქვს ცოცხალი წყალი?

¹²ნუთუ შენ უფრო დიდი ხარ ჩვენს მამაზე, იაკობზე, რომელმაც მოგვცა ჩვენ ეს ჭა? და თვითონ აქედან სვამდა და მისი ძეებიც და მისი საქონელიც?

¹³მიუგო იესომ და უთხრა მას: ყოველს, რომელიც დალევს ამ წყლიდან, კვლავ მოსწყურდება;

¹⁴ხოლო რომელიც დალევს წყლიდან, რომელსაც მე მივცემ მას, აღარ მოსწყურდება უკუნისამდე, არამედ წყალი, რომელსაც მივცემ მას, იქცევა მასში წყლის წყაროდ, რომელიც იდინებს საუკუნო ცხოვრებად.

¹⁵უთხრა მას დედაკაცმა: ბატონო, მომეცი მე ეგ წყალი, რომ არ მწყუროდეს, აღარც მოვიდე აქ ასავსებად.

¹⁶უთხრა მას იესომ: წადი, დაუძახე შენს ქმარს და მოდი აქ.

¹⁷მიუგო დედაკაცმა და უთხრა: არა მყავს ქმარი. უთხრა მას იესომ: კარგად თქვი: ქმარი არა მყავს;

¹⁸რადგან ხუთი ქმარი გყავდა და ახლა რომელიც გყავს, არ არის შენი ქმარი; ეს მართალი თქვი.

¹⁹უთხრა მას დედაკაცმა: ბატონო, ვხედავ, რომ წინასწარმეტყველი ხარ შენ.

²⁰ჩვენი მამები ამ მთაზე სცემდნენ თაყვანს და თქვენ ამბობთ, რომ იერუსალიმში არის ადგილი, სადაც თაყვანი უნდა ვცეთ.

²¹უთხრა მას იესომ: დედაკაცო, გწამდეს ჩემი, რომ მოდის დრო, როცა არც ამ მთაზე, არც იერუსალიმში არ სცემთ თაყვანს მამას.

²²თქვენ თაყვანს სცემთ იმას, ვისაც არ იცნობთ; ჩვენ თაყვანს ვცემთ იმას, ვისაც ვიცნობთ, რადგან ხსნა იუდეველთაგან არის.

²³მაგრამ მოდის ჟამი და ახლავე არის, როცა ჭეშმარიტი თაყვანისმცემლები თაყვანს სცემენ მამას სულით და ჭეშმარიტებით, რადგან მამაც ასეთებს ეძებს, თავის თაყვანისმცემლებს.

²⁴სულია ღმერთი და მის თაყვანისმცემლებს სულით და ჭეშმარიტებით მართებთ თაყვანისცემა.

²⁵უთხრა მას დედაკაცმა: ვიცი, რომ მესია მოდის, რომელსაც ჰქვია ქრისტე; როცა მოვა იგი, გვაუწყებს ჩვენ ყოველივეს.

²⁶უთხრა მას იესომ: მე ვარ, რომელიც გეუბნები შენ.

²⁷და ამასობაში მოვიდნენ მისი მოწაფეები და უკვირდათ, რომ დედაკაცთან საუბრობდა; თუმცა ვერავინ უთხრა მას: რას ეძებ ან რას ესაუბრები მას?

²⁸დატოვა თავისი სარწყული დედაკაცმა და წავიდა ქალაქში და უთხრა ხალხს:

²⁹მოდით და ნახეთ კაცი, რომელმაც მითხრა მე ყველაფერი, რაც გამიკეთებია, ნუთუ ეს არის ქრისტე?

³⁰გამოდიოდნენ ქალაქიდან და მიდიოდნენ მასთან.

³¹ამასობაში სთხოვეს მას მოწაფეებმა და უთხრეს: რაბი, ჭამე.

³²ხოლო მან უთხრა მათ: მე მაქვს საჭმელად საზრდო, რომელიც თქვენ არ იცით.

³³ეუბნებოდნენ მოწაფეები ერთმანეთს: ნუთუ ვინმემ მოუტანა მას საჭმელი?

³⁴უთხრა მათ იესომ: ჩემი საზრდოა, რათა ვყო ნება ჩემი მომავლინებლისა და აღვასრულო მისი საქმე.

³⁵განა თქვენ არ ამბობთ: ოთხი თვეღა და მკა მოდის? აჰა, მე გეუბნებით თქვენ: აახილეთ თქვენი თვალები და იხილეთ ყანები, რადგან გათეთრებულია სამკალად უკვე.

³⁶და მომკელი საზღაურს იღებს და აგროვებს ნაყოფს საუკუნო ცხოვრებისათვის, რათა მთესველსაც და მომკელსაც ერთად უხაროდეთ;

³⁷რადგან ეს სიტყვა ამით არის ჭეშმარიტი, რომ სხვა არის მთესველი და სხვა მომკელი.

³⁸მე გაგგზავნეთ თქვენ სამკალად, რისთვისაც თქვენ არ გიშრომიათ; სხვებმა იშრომეს და თქვენ მათ ნაშრომში შეხვედით.

³⁹და იმ ქალაქიდან მრავალმა სამარიელთაგანმა ირწმუნა მისი იმ დედაკაცის სიტყვით, რომელიც მოწმობდა: მითხრა მე ყველაფერი, რაც გამიკეთებია.

⁴⁰და როცა მივიდნენ მასთან სამარიელები, ევედრებოდნენ მას, რომ გაჩერებულიყო მათთან, და გაჩერდა იქ ორი დღე.

⁴¹და ბევრად მეტმა ირწმუნა მისი სიტყვით,

⁴²ხოლო დედაკაცს ეუბნებოდნენ: შენი სიტყვით კი აღარ გვწამს, არამედ თვითონ გავიგონეთ მისგან და ვიცით, რომ ეს არის ჭეშმარიტად მხსნელი სოფლისა, ქრისტე.

⁴³ორი დღის შემდეგ გამოვიდა იქიდან და წავიდა გალილეაში;

⁴⁴რადგან თვითონ იესომ დაამოწმა, რომ წინასწარმეტყველს საკუთარ მამულში პატივი არა აქვს.

⁴⁵და როცა მივიდა გალილეაში, შეიწყნარეს იგი გალილეველებმა, რომლებმაც ყველაფერი იხილეს, რაც გააკეთა იერუსალიმში დღესასწაულზე, რადგან ისინიც მისულები იყვნენ იმ დღესასწაულზე.

⁴⁶მივიდა იესო კვლავ გალილეის კანაში, სადაც გადააქცია წყალი ღვინოდ. და იყო ვიღაც, მეფის კაცი, რომლის ძე სნეული იყო კაპერნაუმში.

⁴⁷ამან გაიგო, რომ იესო მოვიდა ჰურიასტანიდან გალილეაში, მივიდა მასთან და ევედრებოდა, რათა ჩასულიყო და განეკურნა მისი ძე, რომელიც სიკვდილის პირას იყო.

⁴⁸უთხრა მას იესომ: თუ სასწაულებს და ნიშნებს არ იხილავთ, არ ირწმუნებთ.

⁴⁹უთხრა მას მეფის კაცმა: ბატონო, ჩამოდი, ვიდრე მოკვდება ჩემი ძე.

⁵⁰უთხრა მას იესომ: წადი, შენი ძე ცოცხალია. და ირწმუნა კაცმა სიტყვა, რომელიც უთხრა მას იესომ, და წავიდა.

⁵¹და როცა უკვე ჩავიდა იგი, თავისი მონები მიეგებნენ მას და უთხრეს: შენი ძე ცოცხალია.

⁵²და გამოიკითხა მათგან, რა დროს მიეცა შვება; უთხრეს მას: გუშინ, მეშვიდე ჟამზე დატოვა იგი ცხელებამ.

⁵³გულისხმაყო მისმა მამამ, რომ ეს იყო იმ ჟამს, როცა უთხრა მას იესომ: შენი ძე ცოცხალია. და ირწმუნა მან და მთელმა მისმა სახლეულმა.

⁵⁴ეს უკვე მეორე სასწაული აღასრულა იესომ, მივიდა რა ჰურიასტანიდან გალილეაში.