Read ახალი აღთქმა წიგნი იოანესი 5 Bible Online

წიგნი იოანესი 5 - ახალი აღთქმა bible

წიგნი იოანესი 5

¹მის შემდეგ იყო იუდეველთა დღესასწაული და ავიდა იესო იერუსალიმში.

²და არის იერუსალიმში ცხვრის კარიბჭესთან საბანელი, რომელსაც ჰქვია ებრაულად ბეთეზდა, და ხუთი სტოა ჰქონდა.

³იქ იწვა სიმრავლე უძლურთა, ბრმათა, კოჭლთა, გამხმართა, რომლებიც ელოდნენ წყლის ამოძრავებას;

⁴რადგან უფლის ანგელოზი დროდადრო გადმოდიოდა საბანელში და ამღვრევდა წყალს; და ვინც პირველი ჩავიდოდა წყლის ამღვრევისას, იკურნებოდა, რა სნეულებითაც არ უნდა ყოფილიყო შეპყრობილი.

⁵და იყო იქ ვიღაც კაცი, რომელიც ოცდათვრამეტი წელი იყო უძლურებაში.

⁶ნახა იგი იესომ მწოლიარე და გულისხმაყო, რომ მრავალი წელი იყო უძლურებაში, და უთხრა მას: გინდა გამოჯანმრთელდე?

⁷მიუგო მას უძლურმა: ბატონო, კაცი არა მყავს, რომ, როცა აიმღვრევა წყალი, ჩამაგდოს მე საბანელში; და ვიდრე მივალ მე, სხვა ჩემზე წინ ჩადის.

⁸უთხრა მას იესომ: ადექი, აიღე შენი საწოლი და იარე!

⁹და მყისვე გამოჯანმრთელდა ის კაცი და აიღო თავისი საწოლი და წავიდა. და იყო შაბათი იმ დღეს.

¹⁰ეუბნებოდნენ იუდეველები განკურნებულს: შაბათია და არ არის მართებული შენთვის, რომ აიღო შენი საწოლი;

¹¹ხოლო მან მიუგო მათ: ვინც განმკურნა მე, მან მითხრა: აიღე შენი საწოლი და ირე.

¹²ეკითხებოდნენ მას: ვინ არის ის კაცი, ვინც გითხრა შენ: აიღე შენი საწოლი და იარე?

¹³ხოლო განკურნებულმა არ იცოდა, ვინ იყო, რადგან იესო მიეფარა ხალხს, რომელიც იყო იმ ადგილას.

¹⁴ამის შემდეგ ნახა იგი იესომ ტაძარში და უთხრა მას: აჰა, გამოჯანმრთელდი, ნუღარ სცოდავ, რათა რამე უარესი არ შეგემთხვეს შენ.

¹⁵წავიდა ის კაცი და აუწყა იუდეველებს, რომ იესოა, ვინც განკურნა იგი.

¹⁶და ამის გამო დევნიდნენ იუდეველები იესოს და ეძებდნენ მას მოსაკლავად, რადგან ამას აკეთებდა შაბათს.

¹⁷ხოლო იესომ მიუგო მათ: მამა ჩემი აქამდე მოქმედებს და მეც ვმოქმედებ;

¹⁸იმის გამო უფრო ეძებდნენ მას იუდეველები მოსაკლავად, რომ არა მხოლოდ შაბათს არღვევდა, არამედ ღმერთს თავის მამად აღიარებდა და თავს ღვთის სწორად აცხადებდა.

¹⁹მიუგო იესომ და უთხრა მათ: ამინ, ამინ გეუბნებით თქვენ: არ შეუძლია ძეს კაცისას თავისით არაფრის კეთება, თუ არ იხილავს რამეს, მამის გაკეთებულს, რადგან, რასაც ის აკეთებს, იმას ძეც მსგავსადვე აკეთებს;

²⁰რადგან მამას უყვარს ძე და ყოველივეს უჩვენებს მას, რასაც იგი აკეთებს, და ამაზე მეტ საქმესაც უჩვენებს მას, რათა თქვენ გიკვირდეთ;

²¹რადგან როგორც მამა აღადგენს მკვდრებს და აცოცხლებს, ასევე ძეც, ვისაც უნდა, აცოცხლებს;

²²რადგან არ განსჯის მამა არავის, არამედ მთელი მსჯავრი გადასცა ძეს,

²³რათა ყველა პატივს სცემდეს ძეს, როგორც პატივს სცემს მამას. ვინც პატივს არ სცემს ძეს, პატივს არ სცემს მამას, რომელმაც მოავლინა იგი.

²⁴ამინ, ამინ გეუბნებით თქვენ: ვინც ჩემს სიტყვას ისმენს და სწამს მომავლინებელი ჩემი, აქვს ცხოვრება საუკუნო და სამსჯავროზე არ მიდის, არამედ გადასულია სიკვდილიდან ცხოვრებაში.

²⁵ამინ, ამინ გეუბნებით თქვენ: მოდის ჟამი და ახლავე არის, როცა მკვდრები გაიგონებენ ხმას ძისა ღვთისას და ვინც გაიგონებს, გაცოცხლდება;

²⁶რადგან როგორც მამას აქვს ცხოვრება თავის თავში, ასევე ძესაც მისცა რომ ჰქონდეს ცხოვრება თავის თავში.

²⁷და ხელმწიფება მისცა მას მსჯავრის აღსასრულებლად, რადგან ძე კაცისა არის.

²⁸ნუ გიკვირთ ეს, რადგან მოდის ჟამი, როცა ყველა, ვინც საფლავებშია, გაიგონებს მის ხმას.

²⁹და გამოვლენ კეთილისმოქმედნი აღდგომისათვის ცხოვრებისა, ხოლო ბოროტისმოქმედნი — აღდგომისათვის სასჯელისა.

³⁰არ შემიძლია მე ჩემით არაფრის კეთება; როგორც მესმის, განვსჯი და ჩემი მსჯავრი სამართლიანია, რადგან არ ვეძებ ჩემს ნებას, არამედ ნებას ჩემი მომავლინებელი მამისას.

³¹თუ მე ვმოწმობ ჩემს თავზე, ჩემი მოწმობა არ არის ჭეშმარიტი.

³²სხვა არის, ვინც მოწმობს ჩემზე, და ვიცი, რომ ჭეშმარიტია მისი მოწმობა, რომელიც მოწმობს ჩემზე.

³³თქვენ გაგზავნეთ იოანესთან და დაამოწმა ჭეშმარიტება;

³⁴ხოლო მე კაცისგან არ ვიღებ მოწმობას, არამედ ამას ვამბობ, რათა თქვენ ცხონდეთ.

³⁵ის იყო სანთელი, რომელიც ენთო და ანათებდა, და თქვენ ისურვეთ გეხარათ ერთ ხანს მის ნათელში.

³⁶ხოლო მე მაქვს მოწმობა იოანეზე მეტი, რადგან საქმეები, რომლებიც მომცა მე მამამ აღსასრულებლად, ეს საქმეები, რომელთაც მე ვასრულებ, მოწმობენ ჩემზე, რომ მამამ მომავლინა მე.

³⁷და ვინც მე მომავლინა — მამამ, მან დაამოწმა ჩემზე; თქვენ არც მისი ხმა გსმენიათ არასდროს, არც მისი სახე გიხილავთ;

³⁸და მისი სიტყვა არ არის თქვენ შორის დამკვიდრებული, რადგან ვინც მან მოავლინა, იგი თქვენ არა გწამთ.

³⁹იკვლევთ წერილს, რადგან თქვენ გგონიათ, რომ გაქვთ საუკუნო ცხოვრება მის მიერ, და ის არის, რომელიც მოწმობს ჩემზე;

⁴⁰და თქვენ არ გსურთ მოსვლა ჩემთან, რომ საუკუნო ცხოვრება გქონდეთ.

⁴¹დიდებას კაცთაგან არ ვიღებ;

⁴²არამედ გიცნობთ თქვენ — ღვთის სიყვარული არ არის თქვენში.

⁴³მე მოვედი ჩემი მამის სახელით და არ მიწყნარებთ მე; თუ სხვა მოვა თავისი სახელით, იმას შეიწყნარებთ.

⁴⁴როგორ შეგიძლიათ ირწმუნოთ თქვენ, რომლებიც დიდებას ერთმანეთისგან იღებთ, და დიდებას, რომელიც მხოლოდ ღვთისგან არს, არ ეძებთ?

⁴⁵ნუ გგონიათ, რომ მე ბრალს დაგდებთ თქვენ ჩემს მამასთან; თქვენი ბრალმდებელი არის მოსე, რომლის სასოებაც გაქვთ თქვენ.

⁴⁶თუ ირწმუნეთ მოსესი, ირწმუნეთ ჩემიც, რადგან მან ჩემზე დაწერა,

⁴⁷ხოლო თუ მისი დაწერილის არა გწამთ, ჩემი სიტყვებისას როგორ ირწმუნებთ?