Read ახალი აღთქმა წიგნი იოანესი 6 Bible Online

წიგნი იოანესი 6 - ახალი აღთქმა bible

წიგნი იოანესი 6

¹ამის შემდეგ გავიდა იესო გალილეის, ანუ ტიბერიის ზღვის გაღმა.

²და მისდევდა მას დიდძალი ხალხი, რადგან ხედავდნენ სასწაულებს, რომლებსაც აღასრულებდა უძლურებზე.

³და ავიდა იესო მთაზე და იქ დაჯდა თავის მოწაფეებთან ერთად.

⁴და იყო მოახლოებული პასექი, იუდეველთა დღესასწაული.

⁵აახილა თვალები იესომ და დაინახა, რომ მრავალი ხალხი მოდის მასთან, და უთხრა ფილიპეს: სად ვიყიდოთ პური, რომ ჭამონ ამათ?

⁶ამას რომ ეუბნებოდა, ცდიდა მას, რადგან თვითონ იცოდა, რა უნდა გაეკეთებინა.

⁷მიუგო მას ფილიპემ: ორასი დინარის პური არ ეყოფათ ამათ, რომ თითოეულმა ცოტაოდენი მიიღოს.

⁸უთხრა მას ერთმა თავისმა მოწაფეთაგანმა, ანდრიამ, სიმონ-პეტრეს ძმამ:

⁹არის აქ ყმაწვილი, რომელსაც აქვს ქერის ხუთი პური და ორი თევზი, მაგრამ ეს რა არის ამდენისთვის?

¹⁰უთხრა იესომ: დასხით კაცები. და იყო ბევრი ბალახი იმ ადგილას. და დასხდნენ კაცები, რიცხვით დაახლოებით ხუთი ათასი.

¹¹და აიღო პურები იესომ და მადლობდა და აძლევდა მოწაფეებს, ხოლო მოწაფეები — იმათ, ვინც ისხდა, ასევე — თევზსაც, რამდენიც უნდოდათ.

¹²და როგორც კი გაძღნენ, უთხრა თავის მოწაფეებს: მოაგროვეთ დარჩენილი ნატეხები, რომ არაფერი დაიკარგოს.

¹³და მოაგროვეს და აავსეს თორმეტი გოდორი ქერის ხუთი პურის ნატეხებით, რაც დარჩათ მათ, ვინც ჭამა.

¹⁴ხოლო კაცები, რომლებმაც ნახეს სასწაული, რომელიც აღასრულა იესომ, ამბობდნენ: ეს არის ჭეშმარიტად წინასწარმეტყველი, რომელიც მოვიდა ამ ქვეყნად.

¹⁵და იესომ გულისხმაყო, რომ უნდა მოსულიყვნენ და მოეტაცათ იგი, რათა გაემეფებინათ, და გაშორდა და კვლავ წავიდა იგი მთაში მარტო.

¹⁶და როგორც კი მოსაღამოვდა, ჩავიდნენ მისი მოწაფეები ზღვასთან

¹⁷და ავიდნენ ნავზე და გავიდნენ ზღვის გაღმა, კაპერნაუმში. და უკვე ბნელდებოდა, ხოლო იესო ჯერ კიდევ არ იყო მისული მათთან;

¹⁸და ზღვა დიდი ქარის ქროლვისგან ღელავდა.

¹⁹და როცა გაცურეს დაახლოებით ოცდახუთი ან ოცდაათი უტევანი, დაინახეს იესო, ზღვაზე მავალი, უახლოვდებოდა ნავს, და შეეშინდათ;

²⁰ხოლო მან უთხრა მათ: მე ვარ, ნუ გეშინიათ.

²¹უნდოდათ აეყვანათ იგი ნავში, და მყისვე აღმოჩნდა ნავი მიწაზე, სადაც მიდიოდნენ.

²²მეორე დღეს ხალხი, რომელიც იდგა ზღვის გაღმა, ხედავდა, რომ სხვა ნავი არ იყო იქ, გარდა იმ ერთისა, რომელშიც ავიდნენ იესოს მოწაფეები, და რომ არ ასულა იესო თავის მოწაფეებთან ერთად ნავში, არამედ მხოლოდ მისი მოწაფეები წავიდნენ.

²³და მოვიდნენ სხვა ნავებიც ტიბერიიდან იმ ადგილის მახლობლად, სადაც ჭამეს პური და მადლობდნენ უფალს.

²⁴და როცა ნახა ხალხმა, რომ იესო არ არის იქ, არც მისი მოწაფეები, ჩასხდნენ ისინი ნავებში და მივიდნენ კაპერნაუმში და ეძებდნენ იესოს.

²⁵და იპოვეს იგი ზღვის გაღმა და უთხრეს მას: რაბი, როდის მოხვედი აქ?

²⁶მიუგო მათ იესომ და უთხრა: ამინ, ამინ გეუბნებით თქვენ: მეძებთ მე არა იმიტომ, რომ იხილეთ სასწაულები, არამედ იმიტომ, რომ ჭამეთ პური და გაძეხით.

²⁷გაისარჯეთ არა იმ საზრდოსთვის, რომელიც იკარგება, არამედ საზრდოსთვის, რომელიც რჩება საუკუნო ცხოვრებად, რომელსაც ძე კაცისა თქვენ მოგცემთ, რადგან იგი ბეჭდით დაამოწმა მამა ღმერთმა.

²⁸უთხრეს მას: რა ვქნათ, რომ ვაკეთოთ ღვთის საქმე?

²⁹მიუგო იესომ და უთხრა მათ: ეს არის საქმე ღვთისა, რომ გწამდეთ, ვინც მოავლინა მან.

³⁰და უთხრეს მას: რა სასწაულს აღასრულებ, რომ ვიხილოთ და ვირწმუნოთ შენი? რას აღასრულებ?

³¹ჩვენი მამები მანანას ჭამდნენ უდაბნოში, როგორც არის დაწერილი: პური ზეციდან მისცა მათ საჭმელად (გამ.16,15; ფს.77,24).

³²უთხრა მათ იესომ: ამინ, ამინ გეუბნებით თქვენ: არა მოსემ მოგცათ თქვენ პური ზეციდან, არამედ ჩემმა მამამ მოგცათ თქვენ პური ჭეშმარიტი ზეციდან,

³³რადგან პური ღვთისა არის ის, ვინც გარდამოვიდა ზეციდან და ცხოვრება მისცა ამ სოფელს.

³⁴უთხრეს მას: უფალო, ყოველთვის მოგვეცი ჩვენ ეს პური.

³⁵უთხრა მათ იესომ: მე ვარ პური ცხოვრებისა; ვინც მოვა ჩემთან, არ მოშივდება და ვინც ირწმუნებს ჩემსას, არ მოსწყურდება არასდროს;

³⁶არამედ გითხარით თქვენ: მიხილეთ მე და არა გწამთ.

³⁷ყოველი, რომელიც მომცა მე მამამ, ჩემთან მოვა და რომელიც მოვა ჩემთან, არ გავაგდებ გარეთ,

³⁸რადგან გარდამოვედი ზეციდან არა იმიტომ, რომ აღვასრულო ჩემი ნება, არამედ ნება ჩემი მომავლინებელი მამისა.

³⁹და ეს არის ნება ჩემი მომავლინებელი მამისა, რათა ვინც მომცა მე, არ დავკარგო მათგან არავინ, არამედ აღვადგინო ისინი უკანასკნელ დღეს;

⁴⁰რადგან ეს არის ნება ჩემი მომავლინებლისა, რათა ყოველს, რომელიც ხედავს ძეს და სწამს მისი, ჰქონდეს ცხოვრება საუკუნო; და მე აღვადგინო იგი უკანასკნელ დღეს.

⁴¹დრტვინავდნენ იუდეველები მასზე, რადგან თქვა: მე ვარ პური, ზეციდან გარდამოსული,

⁴²და ამბობდნენ: განა ეს არ არის იესო, ძე იოსებისა, რომლის მამასა და დედას ჩვენ ვიცნობთ? როგორ ამბობს ახლა: ზეციდან გარდამოვედი?

⁴³მიუგო იესომ და უთხრა მათ: ნუ დრტვინავთ ერთმანეთთან.

⁴⁴არავის შეუძლია მოსვლა ჩემთან, თუ ჩემი მომავლინებელი მამა არ მოიყვანს მას ჩემთან; და მე აღვადგენ მას უკანასკნელ დღეს.

⁴⁵წერია წინასწარმეტყველებთან: და იქნებიან ყველანი განსწავლულნი ღვთისაგან (ეს.54,13), ყოველი, რომელიც მოისმენს ჩემი მამისგან და ისწავლის, მოვა ჩემთან;

⁴⁶რადგან მამა არავის უხილავს, არამედ ვინც ღვთისაგან არის, იმან იხილა მამა.

⁴⁷ამინ, ამინ გეუბნებით თქვენ: ვისაც სწამს ჩემი, აქვს ცხოვრება საუკუნო.

⁴⁸მე ვარ პური ცხოვრებისა.

⁴⁹თქვენმა მამებმა ჭამეს მანანა უდაბნოში და დაიხოცნენ.

⁵⁰ეს არის პური, რომელიც გარდამოვიდა ზეციდან, რათა ვინც შეჭამს მისგან, არ მოკვდეს.

⁵¹მე ვარ პური ცოცხალი, ზეციდან გარდამოსული; ვინც ჭამს ამ პურს, იცოცხლებს უკუნისამდე. და პური, რომელსაც მე მივცემ, ჩემი ხორცია, რომელსაც მე მივცემ ამ სოფლის ცხოვრებისთვის.

⁵²დავობდნენ ერთმანეთთან იუდეველები და ამბობდნენ: როგორ შეუძლია ამას, მოგვცეს ჩვენ თავისი ხორცი საჭმელად?

⁵³უთხრა მათ იესომ: ამინ, ამინ გეუბნებით თქვენ: თუ არ შეჭამთ ხორცს ძისა კაცისას და არ შესვამთ მის სისხლს, არ გექნებათ ცხოვრება თქვენში.

⁵⁴ვინც ჭამს ჩემს ხორცს და სვამს ჩემს სისხლს, აქვს ცხოვრება საუკუნო და მე აღვადგენ მას უკანასკნელ დღეს,

⁵⁵რადგან ხორცი ჩემი ჭეშმარიტი საჭმელია და სისხლი ჩემი ჭეშმარიტი სასმელია.

⁵⁶ვინც ჭამს ჩემს ხორცს და სვამს ჩემს სისხლს, ჩემშია და მე — მასში.

⁵⁷როგორც მომავლინა მე ცოცხალმა მამამ, მეც ცოცხალი ვარ მამის მიერ და ვინც ჭამს ჩემგან, ისიც იცოცხლებს ჩემ მიერ.

⁵⁸ეს არის პური, ზეციდან გარდამოსული, არა ისეთი, როგორიც ჭამეს თქვენმა მამებმა, მანანა, და დაიხოცნენ. ვინც შეჭამს ამ პურს, იცოცხლებს უკუნისამდე.

⁵⁹ეს თქვა შესაკრებელში, როცა ასწავლიდა კაპერნაუმში.

⁶⁰მრავალმა მისმა მოწაფეთაგანმა მოისმინა და თქვა: მკაცრია ეს სიტყვა, ვის შეუძლია მისი მოსმენა?

⁶¹და იცოდა იესომ თვითონ, რომ დრტვინავდნენ ამის გამო მისი მოწაფეები და უთხრა მათ: ეს გაბრკოლებთ თქვენ?

⁶²და თუ იხილავთ ძეს კაცისას, აღმავალს, სადაც იყო პირველად?

⁶³სული განმაცოცხლებელია, ხორცი — უსარგებლო; სიტყვები, რომელთაც მე გეუბნებით თქვენ, სულია და ცხოვრება;

⁶⁴არამედ არიან თქვენგან ზოგიერთები, რომელთაც არა სწამთ; — რადგან იცოდა თავიდანვე იესომ, ვინ არიან ისინი, რომელთაც არა სწამთ, და ვინ არის გამცემი მისი,

⁶⁵და ეუბნებოდა: ამის გამო გითხარით თქვენ: არავის შეუძლია მოსვლა ჩემთან, თუ არ არის მიცემული მისთვის ჩემი მამისგან.

⁶⁶ამიერიდან მრავალი მისი მოწაფეთაგანი გაბრუნდა უკან და აღარ დადიოდა მასთან ერთად.

⁶⁷უთხრა იესომ იმ თორმეტს: თქვენც ხომ არ გინდათ წასვლა?

⁶⁸მიუგო მას სიმონ-პეტრემ: უფალო, ვისთან წავიდეთ? რადგან სიტყვები საუკუნო ცხოვრებისა შენ გაქვს

⁶⁹და ჩვენ ვირწმუნეთ და გავიგეთ, რომ შენ ხარ ქრისტე, ძე ცოცხალი ღმერთისა.

⁷⁰მიუგო მათ იესომ და უთხრა: განა მე არ გამოგირჩიეთ თქვენ, თორმეტნი? და თქვენგან ერთი ეშმაკია.

⁷¹და ამბობდა სიმონ ისკარიოტელის იუდაზე, რომელიც იყო ერთი თორმეტთაგანი, რადგან იგი აპირებდა მის გაცემას.