Read ახალი აღთქმა წიგნი იოანესი 7 Bible Online

წიგნი იოანესი 7 - ახალი აღთქმა bible

წიგნი იოანესი 7

¹ამის შემდეგ დადიოდა იესო გალილეაში და არ უნდოდა წასვლა ჰურიასტანში, რადგან ეძებდნენ მას იუდეველები მოსაკლავად.

²და იყო მოახლოებული იუდეველთა დღესასწაული, კარვობა.

³უთხრეს მას თავისმა ძმებმა: გადადი აქედან და წადი ჰურიასტანში, რათა შენმა მოწაფეებმაც ნახონ შენი საქმეები, რომელთაც აღასრულებ,

⁴რადგან არავინ აკეთებს ფარულად რამეს, თუ ეძიებს თავის გამოჩენას. თუ ამას აკეთებ, გამოუცხადე შენი თავი ამ სოფელს.

⁵რადგან არც მის ძმებს სწამდათ მისი.

⁶უთხრა მათ იესომ: ჩემი ჟამი ჯერ არ მოსულა, ხოლო თქვენი ჟამი ყოველთვის მზად არის.

⁷არ შეუძლია ამ სოფელს თქვენი მოძულება, ხოლო მე ვძულვარ, რადგან მე ვმოწმობ მასზე, რომ მისი საქმეები ბოროტია.

⁸თქვენ ადით დღესასწაულზე, ხოლო მე ჯერ არ ავდივარ ამ დღესასწაულზე, რადგან ჩემი ჟამი ჯერ არ აღსრულებულა.

⁹ეს უთხრა მათ და გაჩერდა გალილეაში.

¹⁰და როგორც კი ავიდნენ მისი ძმები დღესასწაულზე, მაშინ თავადაც ავიდა არა განცხადებულად, არამედ ფარულად.

¹¹ხოლო იუდეველები ეძებდნენ მას დღესასწაულზე და ამბობდნენ: სად არის იგი?

¹²და ბევრს დავობდნენ მასზე ხალხში; ზოგი ამბობდა: კეთილია, ხოლო სხვები ამბობდნენ: არა, არამედ აცდუნებს ხალხს. —

¹³თუმცა არავინ ლაპარაკობდა განცხადებულად მასზე იუდეველთა შიშის გამო.

¹⁴და როცა უკვე შუა დღესასწაული იყო, ავიდა იესო ტაძარში და ასწავლიდა.

¹⁵უკვირდათ იუდეველებს და ამბობდნენ: როგორ იცის ამან წერილი უსწავლელად?

¹⁶მიუგო მათ იესომ და უთხრა: ჩემი მოძღვრება არ არის ჩემი, არამედ ჩემი მომავლინებლისა;

¹⁷ვისაც სურს მისი ნება აღასრულოს, გაიგებს ამ მოძღვრების შესახებ, ღვთისაგან არის თუ მე ჩემით ვამბობ.

¹⁸ვინც თავისით ლაპარაკობს, თავის დიდებას ეძებს; ხოლო ვინც ეძებს თავისი მომავლინებლის დიდებას, იგი ჭეშმარიტია და სიცრუე არ არის მასთან.

¹⁹განა მოსემ არ მოგცათ თქვენ სჯული? და თქვენგან არავინ აღასრულებს სჯულს. რად მეძებთ მე მოსაკლავად?

²⁰მიუგო ხალხმა და უთხრა: ეშმაკი არის შენთან; ვინ გეძებს შენ მოსაკლავად?

²¹მიუგო იესომ და უთხრა მათ: ერთი საქმე გავაკეთე და ყველას გიკვირთ.

²²იმისთვის მოგცათ თქვენ მოსემ წინადაცვეთა თუმცა არა მოსესგან არის, არამედ მამათაგან რომ შაბათსაც წინადასცვითოთ კაცს.

²³თუ წინადაცვეთას იღებს კაცი შაბათს, რათა არ დაირღვეს მოსეს სჯული, ჩემზე რატომ მრისხანებთ, რომ კაცი მთლიანად გამოვაჯანმრთელე შაბათს?

²⁴ნუ განსჯით გარეგნულად, არამედ სამართლიანი მსჯავრით განსაჯეთ.

²⁵ამბობდა ზოგიერთი იერუსალიმელთაგანი: განა ეს არ არის, რომელსაც ეძებენ მოსაკლავად?

²⁶და აჰა, განცხადებულად ლაპარაკობს და არაფერს ეუბნებიან მას. ნუთუ ჭეშმარიტად შეიცნეს მთავრებმა, რომ ეს არის ქრისტე?

²⁷მაგრამ ეს ვიცით, საიდან არის; ხოლო ქრისტე როცა მოვა, არავის ეცოდინება, საიდან არის.

²⁸ღაღადყო იესომ ტაძარში, როცა ასწავლიდა და ეუბნებოდა: მეც მიცნობთ და ისიც იცით, საიდან ვარ; და ჩემით არ მოვსულვარ, არამედ ჭეშმარიტია, ვინც მომავლინა მე, რომელსაც თქვენ არ იცნობთ;

²⁹ხოლო მე ვიცნობ მას, რადგან მისგან ვარ და მან მომავლინა მე.

³⁰ეძებდნენ მას შესაპყრობად და არავინ დაადო მას ხელი, რადგან ჯერ არ იყო მოსული მისი ჟამი.

³¹და ხალხიდან მრავალმა ირწმუნა მისი და ამბობდნენ: ქრისტე როცა მოვა, ნუთუ იმაზე მეტ სასწაულს აღასრულებს, ვიდრე ამან აღასრულა?

³²გაიგონეს ფარისევლებმა, რომ ხალხი დრტვინავდა მასზე, და გაგზავნეს მღვდელმთავრებმა და ფარისევლებმა მსახურები, რათა შეეპყროთ იგი.

³³და თქვა იესომ: კიდევ ცოტა ხანს ვარ თქვენთან და მივდივარ ჩემს მომავლინებელთან;

³⁴მომძებნით მე და ვერ მიპოვით; და სადაც ვარ მე, თქვენ არ შეგიძლიათ მოსვლა.

³⁵თქვეს იუდეველებმა თავისთვის: სად აპირებს ეს წასვლას, რომ ჩვენ ვერ ვიპოვოთ იგი? ნუთუ განთესილ წარმართებთან უნდა, რომ წავიდეს და ასწავლოს წარმართებს?

³⁶რას ნიშნავს ეს სიტყვა, რომელიც თქვა: მომძებნით მე და ვერ მიპოვით; და მე სადაც ვარ, თქვენ არ შეგიძლიათ მოსვლა?

³⁷და დიდი დღესასწაულის ბოლო დღეს დადგა იესო, ღაღადყო და თქვა: ვისაც სწყურია, მოვიდეს ჩემთან და დალიოს;

³⁸და ვისაც სწამს ჩემი, როგორც თქვა წერილმა: მისი მუცლიდან მოედინებიან მდინარეები ცოცხალი წყლისა (ეს.12,3).

³⁹და ეს თქვა სულზე, რომელიც უნდა მიეღოთ იმათ, ვინც ირწმუნა მისი, ვინაიდან ჯერ არ იყო სულიწმიდა მოცემული, რადგან იესო ჯერ არ იყო განდიდებული.

⁴⁰ხალხიდან მრავალმა მოისმინა ეს სიტყვა და ამბობდა: ეს არის ჭეშმარიტად წინასწარმეტყველი.

⁴¹სხვები ამბობდნენ: ეს არის ქრისტე, ხოლო სხვები ამბობდნენ: ნუთუ გალილეიდან მოდის ქრისტე?

⁴²განა წერილმა არ თქვა, რომ დავითის თესლიდან და დაბა ბეთლემიდან, საიდანაც იყო დავითი, მოდის ქრისტე?

⁴³და ცილობა იყო ხალხში მის გამო.

⁴⁴და ზოგიერთ მათგანს უნდოდა მისი შეპყრობა, მაგრამ ვერავინ დაადო მას ხელი.

⁴⁵მივიდნენ მსახურები მღვდელმთავრებთან და ფარისევლებთან; და მათ უთხრეს ამათ: რატომ არ მოიყვანეთ იგი?

⁴⁶მიუგეს მსახურებმა: არასდროს ულაპარაკია კაცს ისე, როგორც ამ კაცს.

⁴⁷მიუგეს მათ ფარისევლებმა: ნუთუ თქვენც შემცდარნი ხართ?

⁴⁸ნუთუ ვინმე მთავართაგანმა ირწმუნა მისი ან ფარისეველთაგანმა?

⁴⁹და ეს ხალხი, რომელმაც არ იცის სჯული, დაწყევლილია.

⁵⁰უთხრა მათ ნიკოდიმოსმა, რომელიც მისული იყო მასთან ღამით და იყო ერთი მათგანი:

⁵¹ნუთუ ჩვენი სჯული განსჯის კაცს, ვიდრე ჯერ არ მოუსმენს მას და არ გაიგებს, რას აკეთებს?

⁵²მიუგეს და უთხრეს მას: ნუთუ შენც გალილეიდან ხარ? გამოიკვლიე და ნახე, რომ გალილეიდან წინასწარმეტყველი არ აღმდგარა.

⁵³და წავიდა თითოეული თავის სახლში.