Read ახალი აღთქმა მოციქულთა საქმენი 1 Bible Online

მოციქულთა საქმენი 1 - ახალი აღთქმა bible

მოციქულთა საქმენი 1

¹პრველი სიტყვა დავწერე ყოველივე იმის შესახებ, ჰოი, თეოფილე, რისი კეთებაც და სწავლებაც დაიწყო იესომ

²იმ დღემდე, როდესაც ამაღლდა. იგი ამცნებდა სულიწმიდით მოციქულებს, რომლებიც გამოირჩია

³და რომელთაც წარუდგინა საკუთარი თავი ცოცხალი თავისი ვნების შემდეგ მრავალი სარწმუნო სახით; და ორმოცი დღის განმავლობაში ეჩვენებოდა მათ და ესაუბრებოდა ღვთის სასუფევლის შესახებ,

⁴და თანამეინახეობდა მათთან და ამცნებდა: იერუსალიმს ნუ განეშორებით, არამედ ელოდეთ მამის აღთქმას, რომელიც ისმინეთ ჩემგან;

⁵რადგან იოანე ნათელსცემდა წყლით, ხოლო თქვენ ნათელიღებთ სულიწმიდით არცთუ მრავალი დღის შემდეგ;

⁶ხოლო შეკრებილნი ეკითხებოდნენ მას და ეუბნებოდნენ: უფალო, ნუთუ ამჟამად აღუდგენ სამეფოს ისრაელს?

⁷ხოლო მან უთხრა მათ: არ არის თქვენი საცოდნელი დრო და ჟამი, რომელიც მამამ დაადგინა თავისი ხელმწიფებით,

⁸არამედ მიიღებთ ძალას, როცა გადმოვა სულიწმიდა თქვენზე, და იქნებით ჩემი მოწმეები იერუსალიმში და მთელ ჰურიასტანში და სამარიაში და ქვეყნის კიდემდე.

⁹და როდესაც ეს თქვა, ვიდრე ისინი უყურებდნენ, ამაღლდა და ღრუბელმა დაფარა იგი მათ თვალთაგან.

¹⁰და როცა შეჰყურებდნენ მის ზეცად აღსვლას, აჰა, ორი კაცი წარმოუდგა მათ თეთრი სამოსით

¹¹და უთხრა: კაცნო გალილეველნო, რას დგახართ და შეჰყურებთ ზეცას? ეს იესო, რომელიც ამაღლდა თქვენგან ზეცად, ისევე მოვა, როგორი სახითაც იხილეთ იგი აღმავალი ზეცად.

¹²მაშინ დაბრუნდნენ იერუსალიმში მთიდან, რომელსაც ეწოდება ზეთისხილისა და რომელიც არის იერუსალიმთან ახლოს, შაბათის გზის მანძილზე.

¹³და როცა შევიდნენ, ავიდნენ ზედა ოთახში, სადაც დარჩნენ პეტრე და იოანე, იაკობი და ანდრია, ფილიპე და თომა, ბართლომე და მათე, იაკობ ალფესი და სიმონ მოშურნე და იუდა იაკობისა.

¹⁴ესენი ყველანი გულმოდგინედ ერთსულოვან ლოცვასა და ვედრებაში იყვნენ დედებთან და მარიამთან, იესოს დედასთან, და მის ძმებთან ერთად.

¹⁵და იმ დღეებში ადგა პეტრე მოწაფეთა შორის (ხოლო იყო რიცხვი ხალხისა ერთად ასოცამდე) და თქვა:

¹⁶კაცნო ძმანო, უნდა აღსრულებულიყო წერილი, სადაც წინასწარ თქვა სულიწმიდამ დავითის პირით იუდას შესახებ, რომელიც გახდა წინამძღოლი იესოს შემპყრობთა,

¹⁷რადგან შერაცხილი იყო ჩვენ შორის და წილი ხვდა ამ მსახურებისა.

¹⁸ხოლო ამან შეიძინა მიწა სიცრუის საზღაურით და პირქვე დაეცა და გასკდა შუაზე და გადმოიყარა მთელი მისი შიგნეულობა;

¹⁹და ცნობილი გახდა იერუსალიმის ყველა მკვიდრისთვის, ისე რომ, ეწოდა იმ მიწას მათ საკუთარ ენაზე აკელდამა, ესე იგი, სისხლის მიწა;

²⁰რადგან წერია ფსალმუნთა წიგნში: დარჩეს მისი სამკვიდრებელი ოხრად და ნუ იქნება მკვიდრი მასში; და: მისი განსაგებელი სხვამ მიიღოს (ფს.68,26; 108,8).

²¹ამიტომ გვმართებს ამ კაცთაგან, რომლებიც ჩვენთან ერთად იყვნენ მთელი იმ დროის განმავლობაში, როცა მოვიდა და გავიდა ჩვენგან უფალი იესო,

²²დაწყებული იოანეს ნათლისცემიდან დღემდე ჩვენგან მისი ამაღლებისა, ერთი ამათგანი გახდეს ჩვენთან ერთად მოწმე მისი აღდგომისა.

²³და დააყენეს ორნი: იოსები, რომელსაც ერქვა ბარსაბა და ეწოდა იოსტოსი, და მატათია.

²⁴და ილოცეს და თქვეს: შენ უფალო, ყოველთა გულთმეცნიერო, გამოაჩინე ამ ორთაგან ერთი, რომელიც გამოირჩიე,

²⁵რათა მიიღოს წილი ამ მსახურებისა და მოციქულობისა, რომელსაც განუდგა იუდა, რათა მისულიყო თავის ადგილას.

²⁶და უყარეს წილი მათ და შეხვდა წილი მატათიას და შეირაცხა თერთმეტ მოციქულს შორის.