Read ახალი აღთქმა მოციქულთა საქმენი 10 Bible Online

მოციქულთა საქმენი 10 - ახალი აღთქმა bible

მოციქულთა საქმენი 10

¹და იყო ერთი კაცი კესარიაში, სახელად კორნელიუსი, ასისთავი რაზმიდან, რომელსაც ეწოდება იტალიური,

²ღვთისმოსავი და მოშიში ღვთისა მთელი თავისი სახლეულით; და გასცემდა მრავალ მოწყალებას ხალხისთვის და ევედრებოდა ღმერთს გამუდმებით.

³და დაახლოებით დღის მეცხრე ჟამს ცხადად იხილა ხილვისას ანგელოზი ღვთისა, რომელიც მოვიდა მასთან და უთხრა მას: კორნელიუს, —

⁴ხოლო მან შეხედა მას და შიშით შეპყრობილმა უთხრა: რა არის, უფალო? ხოლო მან უთხრა მას: შენი ლოცვები და შენი მოწყალების საქმენი ავიდა ღვთის წინაშე შენ მოსახსენებლად;

⁵და ახლა გაგზავნე იოპეში კაცები და მოუხმე სიმონს, რომელსაც უწოდებენ პეტრეს.

⁶იგი სტუმრობს ვინმე სიმონ მეტყავესთან, რომელსაც სახლი აქვს ზღვის პირას.

⁷როგორც კი წავიდა ანგელოზი, რომელიც ესაუბრა მას, მოუხმო თავის ორ მსახურს და ღვთისმოსავ მეომარს, რომლებიც მასთან იყვნენ გამუდმებით,

⁸და უამბო მათ ყველაფერი და გაგზავნა ისინი იოპეში.

⁹ხოლო მეორე დღეს, როცა ისინი გზაზე მიდიოდნენ და ქალაქს მიუახლოვდნენ, ავიდა პეტრე ერდოზე სალოცავად დაახლოებით მეექვსე ჟამისთვის

¹⁰და მოშივდა და მოუნდა ჭამა და, ვიდრე ისინი უმზადებდნენ, მოიცვა იგი გაოგნებამ,

¹¹და იხილა გახსნილი ცა და რაღაც ჭურჭელი, რომელიც ჩამოდიოდა როგორც დიდი ტილო, ოთხივე კიდით ჩამოკიდებული, და ეშვებოდა ქვეყანაზე;

¹²მასში იყო ყველა ოთხფეხი ქვეყნისა და მხეცი და ქვეწარმავალი და ფრინველი ცისა.

¹³და იყო ხმა მის მიმართ: ადექი, პეტრე, დაკალი და ჭამე!

¹⁴ხოლო პეტრემ უთხრა: ნუ იქნება, უფალო, რადგან არასოდეს მიჭამია არაფერი წაბილწული და არაწმინდა.

¹⁵და კვლავ იყო ხმა მეორედ მის მიმართ: რაც ღმერთმა განწმინდა, შენ ნუ მიიჩნევ წაბილწულად.

¹⁶ეს მოხდა სამგზის და კვლავ ამაღლდა ჭურჭელი ზეცად.

¹⁷ხოლო როცა პეტრე საგონებელში იყო ჩავარდნილი, თუ რა იყო ეს ხილვა, რომელიც იხილა, აჰა, კაცები, რომლებიც კორნელიუსისგან იყვნენ გამოგზავნილი და კითხულობდნენ სიმონის სახლს, მიადგნენ ჭიშკარს,

¹⁸და დაიძახეს და იკითხეს, თუ სტუმრობდა აქ სიმონი, რომელსაც ეწოდებოდა პეტრე.

¹⁹ხოლო პეტრე ფიქრობდა რა ხილვაზე, უთხრა მას სულიწმიდამ: აჰა, სამი კაცი გეძებს შენ.

²⁰ამიტომ ადექი, ჩამოდი და მიდი მათთან და ნურაფერი დაგაეჭვებს, რადგან მე გამოვგზავნე ისინი.

²¹ჩავიდა პეტრე კაცებთან, რომლებიც გამოგზავნილნი იყვნენ კორნელიუსის მიერ მასთან, და უთხრა: აჰა, მე ვარ, ვისაც ეძებთ; რა არის მიზეზი, რის გამოც მოსულხართ?

²²ხოლო მათ უთხრეს: კორნელიუს ასისთავმა, კაცმა მართალმა და ღვთისმოშიშმა, რასაც მოწმობს მთელი იუდეველი ხალხი, ბრძანება მიიღო წმიდა ანგელოზისგან, რომ გიხმოს შენ თავის სახლში და მოისმინოს სიტყვა შენგან.

²³და მან შეიპატიჟა ისინი და უმასპინძლა. მეორე დღეს ადგა პეტრე და წამოვიდა მათთან ერთად და ძმათაგან ზოგიერთი იოპელიც თან გაჰყვა მას.

²⁴და მეორე დღეს შევიდნენ კესარიაში. ხოლო კორნელიუსს, რომელიც ელოდა მათ, მოეხმო თავისი ნათესავები და ახლო მეგობრები.

²⁵და იყო, როგორც კი შევიდა პეტრე, მოეგება მას კორნელიუსი და დავარდა მის ფეხებთან და თაყვანი სცა;

²⁶ხოლო პეტრემ ააყენა იგი და უთხრა: ადექი, მე თვითონაც ხომ ადამიანი ვარ.

²⁷და ესაუბრებოდა რა მას, შევიდა სახლში და ნახა, რომ მრავალნი შეკრებილიყვნენ,

²⁸და უთხრა მათ: თქვენ უწყით, რომ უჯეროა იუდეველი კაცისთვის დაახლოება ან მისვლა უცხოტომელთან; ხოლო მე ღმერთმა მიჩვენა, რომ არცერთ კაცს არ ვუწოდო შებილწული ან არაწმინდა.

²⁹ამიტომაც უყოყმანოდ მოვედი, როცა მიხმეთ; ამიტომ გეკითხებით: რა მიზეზით მიხმეთ მე?

³⁰და უთხრა კორნელიუსმა: ოთხი დღის წინ ვმარხულობდი ამავე ჟამამდე და მეცხრე ჟამზე ვლოცულობდი ჩემს სახლში და, აჰა, დადგა კაცი ჩემ წინაშე ბრწყინვალე სამოსით

³¹და მეუბნება: კორნელიუს, შესმენილია შენი ლოცვა და შენი მოწყალების საქმენი მოხსენებულია ღვთის წინაშე,

³²ამიტომ გაგზავნე იოპეში და მოუხმე სიმონს, რომელსაც უწოდებენ პეტრეს. იგი სტუმრობს სიმონ მეტყავის სახლში, ზღვის პირას და მოვა და დაგელაპარაკება შენ.

³³მაშინვე გამოვგზავნე შენთან და შენც კარგი გააკეთე, რომ მოხვედი. ამიტომ ახლა ჩვენ ყველანი ღვთის წინაშე ვდგავართ, რათა მოვისმინოთ ყველაფერი, რაც ნაბრძანებია შენთვის უფლის მიერ.

³⁴და გახსნა პეტრემ პირი და თქვა: ჭეშმარიტად ვრწმუნდები, რომ არ არის ღმერთი მიკერძოებული,

³⁵არამედ ყოველ ხალხში მისი მოშიში და სიმართლის მოქმედი სათნოა მისთვის.

³⁶სიტყვა მოუვლინა მან ისრაელის ძეებს და ახარა მშვიდობა იესო ქრისტეს მიერ, რომელიც არის უფალი ყოველთა.

³⁷თქვენ იცით, რაც მოხდა მთელ ჰურიასტანში, დაწყებული გალილეიდან ნათლისღების შემდეგ, რომელიც იქადაგა იოანემ,

³⁸ამბავი იესოსი, რომელიც იყო ნაზარეთიდან; როგორ სცხო მას ღმერთმა სულიწმიდით და ძალით, და რომელიც დადიოდა და კეთილ საქმეებს აკეთებდა და კურნავდა ყველას, დამონებულს ეშმაკისგან, რადგან ღმერთი იყო მასთან.

³⁹და ჩვენ მოწმენი ვართ ყველაფრისა, რაც აღასრულა ჰურიასტანის ქვეყანაში და იერუსალიმში; რომელიც მოკლეს კიდეც ძელზე დაკიდებით.

⁴⁰იგი ღმერთმა აღადგინა მესამე დღეს და განაგო, რომ გამოსცხადებოდა

⁴¹არა მთელ ხალხს, არამედ ღვთის მიერ წინასწარ გამორჩეულ მოწმეებს, ჩვენ, ვინც მასთან ერთად ვჭამდით და ვსვამდით მისი მკვდრეთით აღდგომის შემდეგ;

⁴²და გვიბრძანა ჩვენ, გვექადაგა ხალხისთვის და დაგვემოწმებინა, რომ იგი არის ღვთის მიერ განჩინებული მსაჯული ცოცხალთა და მკვდართა.

⁴³ამას ყველა წინასწარმეტყველი მოწმობს, რომ მიიღებს ცოდვათა მიტევებას მისი სახელით ყველა, ვისაც სწამს მისი.

⁴⁴და როდესაც პეტრე ჯერ კიდევ ამბობდა ამ სიტყვებს, გარდამოვიდა სულიწმიდა ყველაზე, ვინც ისმენდა ამ სიტყვას.

⁴⁵და გაოგნდნენ წინადაცვეთილი მორწმუნეები, რომლებიც მოსულნი იყვნენ პეტრესთან ერთად, რომ წარმართებსაც მოეფინათ ნიჭი სულიწმიდისა,

⁴⁶რადგან ესმოდათ მათი, რომ ლაპარაკობდნენ ენებზე და ადიდებდნენ ღმერთს. მაშინ მიუგო პეტრემ:

⁴⁷განა ვინმეს შეუძლია, დაუშალოს წყლით ნათლისღება ამათ, რომელთაც მიიღეს სულიწმიდა, როგორც ჩვენ?

⁴⁸და უბრძანა მათ ნათლისღება იესო ქრისტეს სახელით. მაშინ სთხოვეს მას, დარჩენილიყო მათთან რამდენიმე დღე.