Read ახალი აღთქმა მოციქულთა საქმენი 11 Bible Online

მოციქულთა საქმენი 11 - ახალი აღთქმა bible

მოციქულთა საქმენი 11

¹და გაიგეს მოციქულებმა და ძმებმა, ვინც იყვნენ ჰურიასტანში, რომ წარმართებმაც მიიღეს ღვთის სიტყვა.

²ხოლო როცა ავიდა პეტრე იერუსალიმში, საყვედურობდნენ მას, ვინც წინადაცვეთილი იყო,

³და ეუბნებოდნენ: წინადაუცვეთელ კაცებთან შეხვედი და მათთან ერთად ჭამე.

⁴ხოლო პეტრემ დაიწყო და უამბო მათ თანამიმდევრობით და უთხრა:

⁵მე ვიყავი ქალაქ იოპეში და როცა ვლოცულობდი, გაოგნებით მოცულმა ვიხილე ხილვა: ჩამოდიოდა რაღაც ჭურჭელი, როგორც დიდი ტილო, რომელიც ოთხივე კიდით ეშვებოდა ზეციდან, და მოვიდა ჩემამდე;

⁶როდესაც შევხედე, დავაკვირდი და ვიხილე ქვეყნის ოთხფეხნი და მხეცები და ქვეწარმავლები და ცის ფრინველები,

⁷და გავიგონე ხმა, რომელიც მეუბნებოდა მე: ადექი, პეტრე, დაკალი და ჭამე.

⁸ხოლო მე ვთქვი: ნუ იქნება, უფალო, რადგან არაფერი წაბილწული და არაწმინდა არასოდეს შესულა ჩემს პირში.

⁹მომიგო მე ხმამ მეორედ ზეციდან: რაც ღმერთმა განწმინდა, შენ ნუ მიიჩნევ წაბილწულად.

¹⁰და ეს მოხდა სამგზის და კვლავ ავიდა ყევლაფერი ზეცად.

¹¹და აჰა, მაშინვე სამი კაცი, კესარიიდან გამოგზავნილი ჩემთან, მოადგა იმ სახლს, რომელშიც ვიყავი.

¹²და მითხრა მე სულმა, რომ წავსულიყავი მათთან ერთად და არაფერში დავეჭვებულიყავი; და წამოვიდა ჩემთან ერთად ეს ექვსი ძმა და შევედით იმ კაცის სახლში.

¹³და გვითხრა ჩვენ, როგორ იხილა თავის სახლში ანგელოზი, მდგომი, რომელმაც უთხრა მას: გაგზავნე იოპეში და მოუხმე სიმონს, პეტრედ წოდებულს,

¹⁴რომელიც გეტყვის შენ სიტყვას, რომლითაც ცხონდები შენ, და მთელი შენი სახლი.

¹⁵და როდესაც დავიწყე მე ლაპარაკი, გარდამოვიდა სულიწმიდა მათზე, როგორც ჩვენზე თავდაპირველად.

¹⁶და გამახსენდა უფლის სიტყვა, როგორ ამბობდა: იოანე ნათელსცემდა წყლით, ხოლო თქვენ ნათელიღებთ სულიწმიდით.

¹⁷ამიტომ თუ ისეთივე ნიჭი მისცა ღმერთმა მათ, როგორც ჩვენ, რომლებმაც ვირწმუნეთ უფალი იესო ქრისტე, მე ვინ ვიყავი, რომ შემძლებოდა, წინ აღვდგომოდი ღმერთს?

¹⁸ხოლო როცა ეს გაიგონეს, დადუმდნენ და ადიდებდნენ ღმერთს და ამბობდნენ: ნამდვილად, წარმართებსაც მისცა ღმერთმა სინანული საცხონებლად.

¹⁹და რომლებიც გაიფანტნენ სტეფანეს დროს მომხდარი დევნის გამო, მივიდნენ ფინიკიამდე და კვიპროსამდე და ანტიოქიამდე, და არავის ეუბნებოდნენ სიტყვას, გარდა იუდეველებისა.

²⁰და იყვნენ მათგან ზოგიერთები, კვიპროსელი და კირენელი კაცები, რომლებიც მივიდნენ ანტიოქიაში, და ესაუბრებოდნენ ელინისტებს და ახარებდნენ მათ უფალ იესოს.

²¹და იყო ხელი უფლისა მათთან და რიცხობრივად მრავალმა ირწმუნა და მოიქცა უფლისკენ.

²²და მივიდა ამბავი მათ შესახებ იერუსალიმის ეკლესიის ყურამდე და გაგზავნეს ბარნაბა, რომ მისულიყო ანტიოქიამდე,

²³რომელიც მივიდა და იხილა მადლი ღვთისა და გაიხარა და ევედრებოდა ყველას, წრფელი გულით ყოფილიყვნენ უფალთან,

²⁴რადგან იყო კაცი კეთილი და აღსავსე სულიწმიდით და რწმენით. და შეემატა მრავალი ხალხი უფალს.

²⁵და წავიდა ბარნაბა ტარსში სავლეს მოსაძებნად და იპოვა იგი და წამოიყვანა ანტიოქიაში.

²⁶და იყო, ისინი მთელი წლის განმავლობაში იკრიბებოდნენ ეკლესიაში და ასწავლიდნენ დიდძალ ხალხს; და პირველად ანტიოქიაში ეწოდათ მოწაფეებს ქრისტიანები.

²⁷და ამ დღეებში ჩამოვიდნენ იერუსალიმიდან წინასწარმეტყველები ანტიოქიაში.

²⁸და ადგა ერთი მათგანი, სახელად აგაბოსი, რომელიც აუწყებდა სულიწმიდით, რომ დიდი შიმშილობა უნდა ყოფილიყო მთელ ქვეყნიერებაზე, რაც იყო კიდეც კლავდიუს კეისრის დროს.

²⁹ხოლო მოწაფეთაგან თითოეულმა განსაზღვრა, ვის რა საშუალება ჰქონდა, რათა დახმარება გაეგზავნათ ჰურიასტანში მცხოვრები ძმებისთვის,

³⁰რაც აღასრულეს კიდეც, და გაუგზავნეს ხუცესებს ბარნაბას და სავლეს ხელით.