Read ახალი აღთქმა მოციქულთა საქმენი 12 Bible Online

მოციქულთა საქმენი 12 - ახალი აღთქმა bible

მოციქულთა საქმენი 12

¹და იმ დროს აღმართა ჰეროდე მეფემ ხელი ბოროტი განზრახვით ეკლესიის ზოგიერთ წევრზე

²და მოკლა იაკობი, იოანეს ძმა, მახვილით.

³და როცა ნახა, რომ ეს მოსაწონი იყო იუდეველთათვის, დამატებით შეიპყრო პეტრეც. და იყო უფუარობის დღეები.

⁴და შეიპყრო იგი, ჩასვა საპყრობილეში და გადასცა ჯარისკაცთა ოთხ ოთხეულს დასაცავად, უნდოდა, რომ პასექის შემდეგ წარედგინა იგი ხალხისთვის.

⁵ასე რომ, პეტრეს სდარაჯობდნენ საპყრობილეში, ხოლო ეკლესიის მიერ გულმხურვალედ აღევლინებოდა ლოცვა ღვთის მიმართ მისთვის.

⁶და როდესაც ჰეროდე აპირებდა მის გამოყვანას, იმ ღამეს ეძინა პეტრეს ორ ჯარისკაცს შორის, შეკრულს ორი ჯაჭვით, და მცველები კარის წინ სდარაჯობდნენ საპყრობილეს.

⁷და, აჰა, ანგელოზი უფლისა დაადგა და ნათელი გაბრწყინდა შენობაში; და ჰკრა გვერდში პეტრეს და გააღვიძა იგი და უთხრა: ადექი სწრაფად. — და დასცვივდა მას ჯაჭვები ხელებიდან.

⁸და უთხრა ანგელოზმა მას: შემოისარტყლე და ჩაიცვი შენი სანდლები. — და მან გააკეთა ასე. და უთხრა მას: შეიმოსე შენი სამოსი და გამომყევი მე.

⁹და გამოვიდა და გაჰყვა მას და არ იცოდა, რომ ცხადი იყო, რაც აღსრულდა ანგელოზის მიერ; ეგონა, რომ ჩვენებას ხედავდა.

¹⁰და გაიარეს პირველი საგუშაგო და მეორეც და მივიდნენ ქალაქში შესასვლელ რკინის კარიბჭესთან, რომელიც თვითონ გაიღო მათთვის, და როცა გავიდნენ, გაიარეს ერთი ქუჩა და მყისვე გაშორდა მას ანგელოზი.

¹¹და პეტრე გონს მოეგო და თქვა: ახლა ჭეშმარიტად ვიცი, რომ მოავლინა უფალმა თავისი ანგელოზი და მიხსნა მე ჰეროდეს ხელიდან და ყოველივე იმისგან, რასაც ელოდა იუდეველი ხალხი.

¹²და მიმოიხედა და მივიდა მარიამის, მარკოზად წოდებული იოანეს დედის, სახლში, სადაც მრავალნი იყვნენ შეკრებილნი და ლოცულობდნენ.

¹³და როდესაც დააკაკუნა პეტრემ ჭიშკარზე, გამოვიდა მისაყურადებლად ერთი მხევალი, სახელად როდე.

¹⁴და როცა იცნო პეტრეს ხმა, სიხარულისგან არ გაუღო ჭიშკარი, არამედ შეირბინა და აუწყა, რომ პეტრე იდგა ჭიშკართან.

¹⁵და მათ უთხრეს მას: შეიშალე. ხოლო იგი ამტკიცებდა, რომ ასე იყო. ისინი კი ამბობდნენ: ანგელოზია მისი.

¹⁶ხოლო პეტრე განაგრძობდა კაკუნს; და როდესაც გააღეს, დაინახეს იგი და გაოგნდნენ.

¹⁷და ანიშნა მათ ხელით, რომ გაჩუმებულიყვნენ, და უამბო მათ, როგორ გამოიყვანა უფალმა იგი საპყრობილიდან, და უთხრა: შეატყობინეთ ეს იაკობს და ძმებს. — და გამოვიდა და წავიდა სხვა ადგილას.

¹⁸და როცა გათენდა, ატყდა არცთუ ისე მცირე განგაში ჯარისკაცთა შორის იმის გამო, თუ რა იქნა პეტრე.

¹⁹ხოლო ჰეროდე ეძებდა მას და ვერ იპოვა; და დაკითხა მცველები და ბრძანა მათი დახოცვა და წამოვიდა ჰურიასტანიდან და კესარიაში იმყოფებოდა.

²⁰და იყო ჰეროდე გულმოსული ტვიროსელებზე და სიდონელებზე; ხოლო ისინი ერთად მივიდნენ მასთან და მიიმხრეს ვლასტოსი, მეფის მესაწოლე, და ითხოვდნენ მშვიდობას, რადგან მათი მხარე მისი სამეფოდან საზრდოობდა.

²¹და დათქმულ დღეს ჰეროდემ შეიმოსა სამეფო სამოსი, დაჯდა ამაღლებულ ადგილას და მიმართა მათ;

²²ხოლო ხალხი ყვიროდა: ღვთის ხმა არის და არა კაცისა

²³და მყისვე დასცა იგი უფლის ანგელოზმა იმის გამო, რომ არ მიაგო დიდება ღმერთს, და გახდა მატლების შესაჭმელი და ამოხდა სული.

²⁴ხოლო ღვთის სიტყვა აღორძინდებოდა და მრავლდებოდა.

²⁵ბარნაბა და სავლე დაბრუნდნენ იერუსალიმიდან ანტიოქიაში, როცა აღასრულეს საქველმოქმედო მსახურება, და თან წამოიყვანეს იოანე, მარკოზად წოდებული.