Read ახალი აღთქმა მოციქულთა საქმენი 14 Bible Online

მოციქულთა საქმენი 14 - ახალი აღთქმა bible

მოციქულთა საქმენი 14

¹და იყო, იკონიაში ჩვეულებისამებრ ერთად შევიდნენ ისინი იუდეველთა შესაკრებელში და ისე ისაუბრეს, რომ ირწმუნა იუდეველთა და ელინთა დიდმა სიმრავლემ,

²ხოლო იუდეველებმა, რომლებმაც არ ირწმუნეს, წააქეზეს და გააბოროტეს წარმართთა სულები ძმების წინააღმდეგ.

³ხოლო მათ დიდხანს დაჰყვეს იქ და განცხადებულად ქადაგებდნენ უფლის შესახებ, რომელიც, მოწმობდა რა თავისი სიტყვის მადლზე, სასწაულებსა და ნიშნებს აღასრულებდა მათი ხელით.

⁴და გაიყო ქალაქის მოსახლეობა და ზოგი იყო იუდეველებთან და ზოგი — მოციქულებთან.

⁵ხოლო როცა შეითქვნენ წარმართები და იუდეველები თავიანთ მთავრებთან ერთად, რათა შეურაცხოფა მიეყენებინათ და ჩაექოლათ ისინი,

⁶მიუხვდნენ და გაიქცნენ ლიკაონიის ქალაქებში — ლისტრსა და დერბეში და გარემოსოფლებში —

⁷და იქ ახარებდნენ.

⁸და იჯდა ერთი კაცი ლისტრაში, ფეხებდაუძლურებული, თავისი დედის მუცლიდან კოჭლი, რომელსაც არასდროს გაევლო.

⁹ამას ესმოდა პავლესი, რომელმაც საუბრისას მიაპყრო მას მზერა და როცა იხილა, რომ ჰქონდა რწმენა განკურნებისა,

¹⁰უთხრა დიდი ხმით: შენ გეუბნები უფალი იესო ქრისტეს სახელით: დადექი შენს ფეხებზე გამართულად! — და იგი წამოხტა და გაიარა.

¹¹ხოლო როცა ხალხმა იხილა, რა გააკეთა პავლემ, აიმაღლა თავისი ხმა და ლიკაონურად ამბობდა: ღმერთები დაემსგავსნენ ადამიანებს და გარდამოვიდნენ ჩვენთან.

¹²და უწოდებდნენ ბარნაბას ზევსს, ხოლო პავლეს — ჰერმესს, რადგან იგი იყო წარმმართველი სიტყვისა.

¹³და ქურუმმა ზევსისა, რომლის კერპიც იყო ქალაქის წინ, მოიყვანა კუროები და მოიტანა გვირგვინები კარიბჭესთან და ხალხთან ერთად უნდოდა ზორვა.

¹⁴ხოლო როდესაც გაიგეს ეს მოციქულებმა, ბარნაბამ და პავლემ, შემოიხიეს თავისი სამოსი, შეცვივდნენ ხალხში, ყვიროდნენ

¹⁵და ამბობდნენ: კაცნო, რას აკეთებთ ამას? ჩვენც თქვენი მსგავსი ადამიანები ვართ და გახარებთ თქვენ, რომ ამ ამაოებათაგან მოიქცეთ ცოცხალი ღმერთისკენ, რომელმაც შექმნა ცა და ქვეყანა, ზღვა და ყოველივე, რაც მათშია,

¹⁶რომელმაც გარდასულ თაობებში დაუშვა, რომ ყველა ხალხს თავისი გზით ევლო;

¹⁷თუმცა მოწმობის გარეშე არ დატოვა საკუთარი თავი, ქველმოქმედებდა რა, ზეციდან გაძლევდათ თქვენ წვიმას და ჟამს, ნაყოფის გამომღებელს, და ავსებდა საზრდოთი და სიხარულით თქვენს გულებს.

¹⁸და თქვეს რა ეს, ძლივს შეაჩერეს ხალხი, რომ არ ეზორათ მათთვის, არამედ თითოეული შინ წასულიყო; და იყვნენ ისინი იქ და ასწავლიდნენ.

¹⁹და მოვიდნენ ანტიოქიიდან და იკონიიდან იუდეველები და ვიდრე ისინი განცხადებულად ესაუბრებოდნენ, დაარწმუნეს ხალხი, განდგომოდნენ მათ, და ეუბნებოდნენ: ჭეშმარიტს არაფერს ამბობენ, არამედ ყველაფერს იტყუებიან. და ჩაქოლეს პავლე და გაათრიეს ქალაქის გარეთ, რადგან ეგონათ, რომ იგი მკვდარი იყო.

²⁰და როცა გარშემოეხვივნენ მოწაფეები მას, ადგა და შევიდა ქალაქში და მეორე დღეს წავიდა ბარნაბასთან ერთად დერბეში;

²¹და ახარებდნენ იმ ქალაქს და დაიმოწაფეს მრავალნი და დაბრუნდნენ ლისტრაში და იკონიაში და ანტიოქიაში

²²და განამტკიცებდნენ მოწაფეთა სულებს და ევედრებოდნენ, ყოფილიყვნენ რწმენით, რადგან მრავალი გასაჭირით გვმართებს ჩვენ შესვლა ღვთის სასუფეველში.

²³და ხელდასხმით უკურთხეს მათ მღვდლები თითოეული ეკლესიისთვის და ლოცვითა და მარხვით შეავედრეს ისინი უფალს, რომელიც ირწმუნეს.

²⁴და გაიარეს რა პისიდია, მივიდნენ პამფილიაში,

²⁵და იქადაგეს პერგეში უფლის სიტყვა და ჩავიდნენ ატალიაში.

²⁶და იქიდან გემით გაცურეს ანტიოქიაში, სადაც მიეცათ ღვთის მადლი იმ საქმისთვის, რომელიც აღასრულეს.

²⁷და როცა მივიდნენ, შეკრიბეს ეკლესია და აუწყეს, რა აღასრულა ღმერთმა მათ მიერ და რომ გაუღო წარმართებს რწმენის კარი.

²⁸და იქ დაჰყვეს არცთუ ისე ცოტა ხანი მოწაფეებთან.