Read ახალი აღთქმა მოციქულთა საქმენი 15 Bible Online

მოციქულთა საქმენი 15 - ახალი აღთქმა bible

მოციქულთა საქმენი 15

¹და ჩამოვიდნენ ზოგიერთები ჰურიასტანიდან და ასწავლიდნენ ძმებს: თუ არ წინადაიცვეთთ მოსეს სჯულით, ვერ შეძლებთ ცხონებას.

²და ჰქონდათ არცთუ ისე მცირე უთანხმოება და დავა პავლეს და ბარნაბას მათთან და გადაწყვიტეს, რომ ასულიყვნენ პავლე და ბარნაბა და სხვა ზოგიერთი მათგანი მოციქულებთან და ხუცესებთან იერუსალიმში ამ სადავო საკითხის გამო.

³ასე რომ, ეკლესიის მიერ წარგზავნილებმა გაიარეს ფინიკია და სამარია და უამბობდნენ წარმართთა მოქცევის შესახებ და ანიჭებდნენ დიდ სიხარულს ყველა ძმას.

⁴და მივიდნენ რა იერუსალიმში, მიიღეს ისინი ეკლესიამ და მოციქულებმა და ხუცესებმა; ხოლო მათ აუწყეს, რა გააკეთა ღმერთმა მათ მიერ და როგორ გაუღო წარმართებს რწმენის კარი.

⁵და ადგა ფარისეველთა მოძღვრების ზოგიერთი მიმდევარი, რომელმაც ირწმუნა, და ამბობდა: მართებულია წინადაცვეთა მათთვის და მცნების მიცემა, რათა დაიცვან მოსეს სჯული.

⁶და შეიკრიბნენ მოციქულები და ხუცესები ამ სიტყვის განსახილველად.

⁷და იყო რა დიდი დავა, ადგა პეტრე და უთხრა მათ: კაცნო ძმანო, თქვენ უწყით, რომ პირველი დღეებიდანვე თქვენ შორის გამომარჩია ღმერთმა, რათა ჩემი პირიდან მოისმინონ წარმართებმა სახარების სიტყვა და ირწმუნონ.

⁸და გულთმეცნიერმა ღმერთმა დაამოწმა მათზე და მისცა სულიწმიდა, როგორც ჩვენ,

⁹და არაფრით განასხვავა ისინი ჩვენგან და რწმენით განწმინდა მათი გულები.

¹⁰ამიტომ ახლა რად სცდით ღმერთს და ადებთ ქედზე მოწაფეებს უღელს, რომელიც ვერც ჩვენმა მამებმა და ვერც ჩვენ შევძელით, რომ გვეტვირთა?

¹¹არამედ უფალი იესო ქრისტეს მადლით გვწამს, რომ ვცხონდებით, ისევე როგორც ისინი.

¹²და დადუმდა მთელი კრებული და უსმენდა ბარნაბას და პავლეს, რომლებიც უამბობდნენ, რამდენი სასწაული და ნიშანი აღასრულა ღმერთმა წარმართთა შორის მათ მიერ.

¹³და მას შემდეგ, რაც დადუმდნენ ისინი, მიუგო იაკობმა და უთხრა: კაცნო ძმანო, ისმინეთ ჩემი:

¹⁴სიმონმა გვიამბო, როგორ მოხედა ღმერთმა თავიდანვე წარმართებს, რათა გამოერჩია მათგან ერი თავისი სახელისათვის.

¹⁵და ამას ეთანხმება წინასწარმეტყველთა სიტყვები, როგორც დაწერილია:

¹⁶ამის შემდეგ მოვბრუნდები და აღვადგენ დავითის კარავს, დაცემულს, და დანგრეულს მისას აღვადგენ და გავმართავ მას,

¹⁷რათა მოიძიონ უფალი დანარჩენმა ადამიანებმა და ყველა წარმართმა, რომლებზეც წოდებულია ჩემი სახელი, თქვა უფალმა, რომელმაც აღასრულა ეს ყოველივე (ამოს.9,11-12),

¹⁸და ცნობილია დასაბამიდან ღვთისთვის ყოველი მისი საქმე.

¹⁹ამიტომ მე ასე განვსჯი: არ შევაწუხოთ ისინი, რომლებიც წარმართთაგან მოიქცნენ ღვთისკენ,

²⁰არამედ მივწეროთ მათ, რომ განერიდონ კერპთა ნაზორევის ჭამას და სიძვას, დამხრჩვალს და სისხლს; და რაც თავისთვის არ უნდათ, სხვებს ნუ გაუკეთებენ,

²¹რადგან ძველი თაობებიდან ყოველ ქალაქში ჰყავს თავისი მქადაგებლები მოსეს სჯულს და შესაკრებლებში ყოველ შაბათს იკითხება.

²²მაშინ საჭიროდ მიიჩნიეს მოციქულებმა და ხუცესებმა მთელ ეკლესიასთან ერთად, რომ გამოერჩიათ კაცები მათგან, რათა გაეგზავნათ ანტიოქიაში პავლესთან და ბარნაბასთან ერთად — იუდა, ბარსაბად წოდებული, და შილა — გამორჩეული კაცები ძმათა შორის,

²³და დაწერეს მათი ხელით ასე: მოციქულები და ხუცესები და ძმები — ანტიოქიაში და სირიაში და კილიკიაში მყოფ წარმართთაგან მოქცეულ ძმებს: გიხაროდეთ.

²⁴ვინაიდან გავიგეთ, რომ ზოგიერთმა ჩვენგან გამოსულმა აგაღელვათ თქვენ სიტყვით და აღაშფოთა თქვენი სულები, გეუბნებოდათ რა, რომ წინადაგეცვითათ და დაგეცვათ სჯული, რაც ჩვენ არ გვიბრძანებია მათთვის,

²⁵საჭიროდ მივიჩნიეთ ჩვენ, ერთსულოვნად გამოგვერჩია კაცები და გამოგვეგზავნა თქვენთან ჩვენს საყვარელ ბარნაბასთან და პავლესთან ერთად,

²⁶ადამიანებთან, რომლებმაც თავისი სული დადეს ჩვენი უფლის, იესო ქრისტეს, სახელისათვის.

²⁷ამიტომ გამოვგზავნეთ იუდა და შილა და ისინიც სიტყვით გაუწყებენ მასვე,

²⁸რადგან მიიჩნია სულიწმიდამ, და ჩვენც, რომ არანაირი ზედმეტი ტვირთი არ დაგადოთ თქვენ გარდა იმისა, რაც აუცილებელია:

²⁹განრიდება ნაკერპავისაგან და სისხლისაგან, დამხრჩვალისაგან და სიძვისაგან, და რაც არ გინდათ თქვენთვის, სხვას ნუ გაუკეთებთ; ამათგან დაიცავით თქვენი თავი და სიკეთე აკეთეთ. ჯანმრთელად იყავით.

³⁰და გაგზავნილები ჩავიდნენ ანტიოქიაში და შეკრიბეს კრებული და გადასცეს წერილი.

³¹და როცა წაიკითხეს, გაიხარეს ნუგეშის გამო.

³²ხოლო იუდამ და შილამ, რომლებიც წინასწარმეტყველები იყვნენ, მრავალი სიტყვით ანუგეშეს ძმები და განამტკიცეს,

³³და დაყვეს იქ ხანი და ძმებმა მშვიდობით გაუშვეს მოციქულებთან;

³⁴ხოლო შილამ საჭიროდ მიიჩნია იქვე დარჩენა,

³⁵პავლე და ბარნაბა კი იმყოფებოდნენ ანტიოქიაში, მრავალ სხვასთან ერთად ასწავლიდნენ და ახარებდნენ უფლის სიტყვას.

³⁶და გარკვეული დღეების შემდეგ უთხრა პავლემ ბარნაბას: მივბრუნდეთ და ვნახოთ, როგორ არიან ჩვენი ძმები ყველა იმ ქალაქში, სადაც ვიქადაგეთ უფლის სიტყვა.

³⁷და ბარნაბას უნდოდა, თან წაეყვანა იოანე, მარკოზად წოდებული,

³⁸ხოლო პავლეს მართებულად მიაჩნდა, რომ, ვინც ჩამოშორდა მათ პამფილიიდან და არ გაჰყვა საქმეზე, თან არ წაეყვანათ იგი.

³⁹და იყო უთანხმოება მათ შორის, ისე რომ, დაშორდნენ ისინი ერთმანეთს; და ბარნაბამ წაიყვანა მარკოზი და გემით გაცურა კვიპროსისკენ;

⁴⁰ხოლო პავლემ გამოარჩია შილა და წავიდა ძმების მიერ ღვთის მადლს მინდობილი;

⁴¹და დადიოდა სირიასა და კილიკიაში და განამტკიცებდა ეკლესიებს.