Read ახალი აღთქმა მოციქულთა საქმენი 17 Bible Online

მოციქულთა საქმენი 17 - ახალი აღთქმა bible

მოციქულთა საქმენი 17

¹და გაიარეს ამფიპოლისი და და აპოლონია და მივიდნენ თესალონიკში, სადაც იყო იუდეველთა შესაკრებელი.

²და როგორც ჩვეულება ჰქონდა პავლეს, შევიდა მათთან და სამ შაბათს მსჯელობდა მათთან წერილიდან,

³უხსნიდა და არწმუნებდა, რომ ქრისტე უნდა ვნებულიყო და აღმდგარიყო მკვდრეთით და რომ: ეს არის ქრისტე, იესო, რომელსაც მე გახარებთ თქვენ.

⁴და ზოგმა მათგანმა ირწმუნა და პავლესა და შილას მიემხრო როგორც ღვთისმოსავ ელინთა დიდი სიმრავლე, ასევე არცთუ ისე ცოტა წარჩინებული დედაკაცი.

⁵ხოლო შური აღეძრათ იუდეველებს, რომლებმაც არ ირწმუნეს, და მოიყვანეს სავაჭროდან ვიღაც უკეთური კაცები და შეკრიბეს ხალხი და აშფოთებდნენ ქალაქს; და მიადგნენ იასონის სახლს და ეძებდნენ მათ, რათა გამოეყვანათ ხალხის წინაშე.

⁶და როცა ვერ იპოვეს ისინი, თრევით მიიყვანეს იასონი და ზოგიერთი ძმა ქალაქის მთავრებთან და ყვიროდნენ: ვინც ქვეყნიერებას აშფოთებს, ისინი აქაც მოსულან,

⁷რომლებიც იასონს მიუღია; და ისინი, ყველანი, კეისრის ბრძანებების წინააღმდეგ მოქმედებენ, რადგან მეფეს უწოდებენ სხვას — იესოს.

⁸და ააღელვეს ხალხი და ქალაქის მთავრები, რომლებიც ისმენდნენ ამას.

⁹და მიიღეს თავდებობა იასონისგან და დანარჩენებისგან და გაუშვეს ისინი.

¹⁰ხოლო ძმებმა მაშინვე, ღამით გაგზავნეს პავლე და შილა ბერიაში, რომლებიც ჩასვლისთანავე იუდეველთა შესაკრებელში მივიდნენ.

¹¹ესენი თესალონიკელებზე კეთილშობილები იყვნენ. მათ მთელი გულმოდგინებით მიიღეს სიტყვა და ყოველდღე განიხილავდნენ წერილს, იყო თუ არა ეს ასე.

¹²ამიტომ მრავალმა მათგანმა ირწმუნა — კეთილშობილმა ელინმა, დედაკაცმაც და მამაკაცმაც, არცთუ ისე ცოტამ.

¹³ხოლო როგორც კი გაიგეს თესალონიკელმა იუდეველებმა, რომ ბერიაშიც ეუწყათ პავლესგან ღვთის სიტყვა, მივიდნენ იქაც და აშფოთებდნენ და აღელვებდნენ ხალხს.

¹⁴და მაშინ ძმებმა მყისვე გაამგზავრეს პავლე, რომ წასულიყო ზღვისკენ, შილა და ტიმოთე კი იქვე დარჩნენ.

¹⁵ხოლო გამცილებლებმა პავლე მიიყვანეს ათენამდე და, მიიღეს რა ბრძანება შილასა და ტიმოთესთვის, რომ ისინი რაც შეიძლება სწრაფად მისულიყვნენ მასთან, წამოვიდნენ.

¹⁶და ვიდრე ათენში ელოდებოდა მათ პავლე, შფოთავდა მისი სული, ხედავდა რა კერპებით სავსე ქალაქს.

¹⁷ამიტომ ესაუბრებოდა შესაკრებელში იუდეველებსა და ღვთისმოსავებს, და მოედნებზე — იმათ, ვინც ყოველდღე ხვდებოდა.

¹⁸ხოლო ზოგიერთი ეპიკურელი და სტოიკოსი ფილოსოფოსი ეკამათებოდა მას, ზოგი კი ამბობდა: რისი თქმა უნდა ამ ამაოდმეტყველს? ხოლო სხვები: უცხო ღმერთების მქადაგებელი ჩანს, რადგან იესოს და აღდგომას ახარებდა მათ.

¹⁹და წამოიყვანეს იგი და მიიყვანეს არეოპაგში და უთხრეს: შეიძლება გავიგოთ, რა არის ეს ახალი მოძღვრება, რომელსაც შენ ქადაგებ?

²⁰რადგან უცნაური რამ ესმის ჩვენს ყურებს; ამიტომ გვინდა, ვიცოდეთ, რას ნიშნავს ეს.

²¹ხოლო ათენელები, ყველა, და ჩამოსახლებული უცხოელები სხვას არაფერს უთმობდნენ დროს ისე, როგორც საუბარს რაიმეს შესახებ და სიახლის მოსმენას.

²²და დადგა პავლე არეოპაგის შუაში და თქვა: კაცნო ათენელნო, ყოველმხრივ ვხედავ, რომ მრავალი ღმერთის მსახურნი ხართ თქვენ,

²³რადგან, როდესაც მოვიარე და ვნახე თქვენი სალოცავები, აღმოვაჩინე სამსხვერპლოც, რომელზეც ეწერა: უცნობ ღმერთს. ამიტომ რომელსაც არ იცნობთ და ეთაყვანებით, მას გაუწყებთ მე თქვენ.

²⁴ღმერთი, რომელმაც შექმნა ქვეყანა და ყოველივე, რაც მასშია, იგი არის ცისა და ქვეყნის უფალი და არ მკვიდრობს ხელით ქმნილ ტაძრებში;

²⁵არც კაცთა ხელიდან ითხოვს მსახურებას, თითქოს რამე სჭირდებოდეს, არამედ თავად აძლევს ყველას სიცოცხლეს და სულს და ყოველივეს.

²⁶და შექმნა ერთი სისხლისგან კაცთა მთელი მოდგმა, რომ დამკვიდრებულიყო მთელი ქვეყნის პირზე, და განსაზღვრა განჩინებული ჟამები და საზღვრები მათი სამკვიდრებლისა,

²⁷რათა ეძიონ ღმერთი, იქნებ შეიგრძნონ იგი და იპოვონ, რადგან შორს არ იმყოფება თითოეული ჩვენგანისგან,

²⁸რადგან მის მიერ ვცოცხლობთ და ვმოძრაობთ და ვარსებობთ, როგორც თქვენმა ზოგიერთმა პოეტთაგანმა თქვა: რომლის მოდგმაც ვართ.

²⁹ამიტომ, რადგან ღვთის მოდგმა ვართ, არ უნდა გვეგონოს, რომ ოქრო გინდა ვერცხლი, გინდა ქვა, გამოსახული კაცის ხელოვნებით და განზრახვით, ღვთაების მსგავსია;

³⁰უმეცრების ჟამი ღმერთმა უგულებელყო და ახლა ამცნებს ყოველ კაცს ყველგან, რათა შეინანონ;

³¹რადგან დაადგინა დღე, როცა ინებებს ქვეყნიერების განკითხვას სიმართლით იმ კაცის მიერ, რომელიც განაჩინა, და მისი მკვდრეთით აღდგომით რწმენა მიჰმადლა ყველას.

³²ხოლო როცა მოისმინეს მკვდართა აღდგომის შესახებ, ზოგი დასცინოდა, ზოგმა კი თქვა: ამის შესახებ მერე მოვისმენთ შენგან.

³³და ასე გამოვიდა პავლე მათგან.

³⁴ხოლო ზოგიერთი კაცი მიემხრო მას და ირწმუნა, რომელთა შორის იყვნენ დიონისე არეოპაგელი და დედაკაცი, სახელად დამარისი, და სხვებიც მათთან ერთად.