Read ახალი აღთქმა მოციქულთა საქმენი 18 Bible Online

მოციქულთა საქმენი 18 - ახალი აღთქმა bible

მოციქულთა საქმენი 18

¹ამის შემდეგ წამოვიდა პავლე ათენიდან და მივიდა კორინთოში

²და ნახა ერთი იუდეველი, სახელად აკვილა, წარმოშობით პონტოელი, რომელიც ახლად იყო ჩამოსული იტალიიდან, და პრისკილა, მისი ცოლი, — რადგან ნაბრძანები ჰქონდა კლავდიუსს, რომ დაეტოვებინა ყველა იუდეველს რომი, — და მივიდა მათთან;

³და იმის გამო, რომ ერთი ხელობა ჰქონდათ, დარჩა მათთან და მუშაობდა, რადგან იყვნენ ხელობით მეკარვეები.

⁴და ესაუბრებოდა შესაკრებელში ყოველ შაბათს და არწმუნებდა იუდეველებს და ელინებს.

⁵და როცა ჩამოვიდნენ მაკედონიიდან შილა და ტიმოთე, სული აიძულებდა პავლეს და იგი მოწმობდა იუდეველთათვის, რომ ქრისტე არის იესო;

⁶ხოლო იმათ, ვინც ეწინააღმდეგებოდა და გმობდა, დაიბერტყა რა თავისი სამოსი, უთხრა: სისხლი თქვენი თქვენს თავზე იყოს. უბრალო ვარ მე. ამიერიდან წარმართებთან წავალ.

⁷და წამოვიდა იქიდან და შევიდა ვიღაც ღვთისმოსავის, სახელად იოსტოსის, სახლში, რომელიც ესაზღვრებოდა შესაკრებელს.

⁸ხოლო კრისპოსმა, შესაკრებლის მთავარმა, ირწმუნა უფალი მთელი თავისი სახლეულით; და მრავალმა კორინთელმა, ვინც ისმენდა, ირწმუნა და ნათელიღო.

⁹და უთხრა უფალმა ღამით პავლეს ჩვენებით: ნუ გეშინია, არამედ ილაპარაკე და ნუ გაჩუმდები,

¹⁰ვინაიდან მე ვარ შენთან, და ვერავინ შეგეხება ბოროტად შენ, რადგან მრავალი ხალხი მყავს ამ ქალაქში.

¹¹და დაჰყო იქ წელიწადი და ექვსი თვე და ასწავლიდა მათ ღვთის სიტყვას.

¹²ხოლო როცა გალიონი იყო აქაიას პროკონსული, იუდეველები ერთად დაესხნენ თავს პავლეს და მიიყვანეს იგი სამსჯავროზე

¹³და ამბობდნენ: ეს არწმუნებს ხალხს, რომ სჯულის საწინააღმდეგოდ ემსახურონ ღმერთს.

¹⁴და როცა პავლემ პირის გაღება დააპირა, უთხრა გალიონმა იუდეველებს: რომ ყოფილიყო რამე უსამართლობა ან ბოროტი განზრახვა, ჰოი, იუდეველნო, განვიხილავდი თქვენს სიტყვას.

¹⁵თუ გამოძიება ეხება მოძღვრებას, სახელებს და თქვენს სჯულს, თქვენ თვითონ მიხედეთ, რადგან მე არ მსურს, ამის მსაჯული ვიყო.

¹⁶და გამოყარა ისინი სამსჯავროდან.

¹⁷და შეიპყრეს ელინებმა, ყველამ, სოსთენი, შესაკრებლის მთავარი, და სცემდნენ სამსჯავროს წინ. და ამის გამო არ შეწუხებულა გალიონი.

¹⁸ხოლო პავლე კიდევ მრავალ დღეს დარჩა, ძმებს გამოეთხოვა და გემით გაცურა სირიისკენ, და მასთან ერთად იყვნენ პრისკილა და აკვილა, და მოიკვეცა თმა კენქრეში, რადგან აღთქმა ჰქონდა დადებული.

¹⁹და მიაღწია ეფესოს და ისინი დატოვა იქ, ხოლო თვითონ შევიდა შესაკრებელში და ესაუბრებოდა იუდეველებს.

²⁰ხოლო როდესაც ისინი სთხოვდნენ, უფრო მეტ ხანს დარჩენილიყო მათთან, არ დაეთანხმა,

²¹არამედ გამოეთხოვა მათ და უთხრა: მმართებს მე, მომავალ დღესასწაულზე უეჭველად იერუსალიმში ვიყო, და კვლავ დავბრუნდები თქვენთან ღვთის ნებით; — და გაემგზავრა ეფესოდან

²²და ჩავიდა კესარიაში. და ავიდა იერუსალიმში და მოიკითხა ეკლესია და ჩავიდა ანტიოქიაში

²³და დაჰყო ერთ ხანს; და წამოვიდა და თანამიმდევრობით მოიარა გალატიის ქვეყანა და ფრიგია და განამტკიცებდა ყველა მოწაფეს.

²⁴და ერთი იუდეველი, სახელად აპოლოსი, წარმოშობით ალექსანდრიელი, კაცი მჭევრმეტყველი, რომელიც ძლიერი იყო წერილში, მივიდა ეფესოში.

²⁵მას შესწავლილი ჰქონდა უფლის გზა და მხურვალე სულით საუბრობდა და ზედმიწევნით ასწავლიდა იესოს შესახებ და მხოლოდ იოანეს ნათლისცემა იცოდა.

²⁶მან გაბედულად დაიწყო ქადაგება შესაკრებელში. და მოუსმინეს მას აკვილამ და პრისკილამ და გამოიყვანეს იგი და ზედმიწევნით აუწყეს უფლის გზის შესახებ.

²⁷და როდესაც მოინდომა მან აქაიაში გადასვლა, გაამხნევეს ძმებმა და მისწერეს მოწაფეებს, რომ მიეღოთ იგი; და მივიდა და დიდად ეწეოდა მორწმუნეებს მადლით,

²⁸რადგან თავგამოდებით ამხელდა იუდეველებს სახალხოდ და უჩვენებდა წერილის მიხედვით, რომ ქრისტე არის იესო.