Read ახალი აღთქმა მოციქულთა საქმენი 19 Bible Online

მოციქულთა საქმენი 19 - ახალი აღთქმა bible

მოციქულთა საქმენი 19

¹და იყო, აპოლოსის ყოფნისას კორინთოში, პავლემ მოიარა ზემო მხარე, მივიდა ეფესოში და ნახა ვიღაც მოწაფეები

²და უთხრა მათ: სულიწმიდა თუ მიიღეთ, როცა ირწმუნეთ? ხოლო მათ უთხრეს მას: არც კი გვსმენია, რომ სულიწმიდა არსებობს.

³და უთხრა მათ: მაშ, რითი ნათელიღეთ? ხოლო მათ უთხრეს: იოანეს ნათლისცემით.

⁴და თქვა პავლემ: იოანე ნათელსცემდა სინანულის ნათლისცემით და ერს ეუბნებოდა, რომ ერწმუნათ მის შემდეგ მომავალი, ესე იგი იესო ქრისტე.

⁵ხოლო როცა მოისმინეს, ნათელიღეს უფალი იესო ქრისტეს სახელით.

⁶და პავლეს ხელის დადებით გადმოვიდა სულიწმიდა მათზე და ალაპარაკდნენ ენებზე და წინასწარმეტყველებდნენ.

⁷და ყველა იყო მამაკაცი, დაახლოებით თორმეტი.

⁸და შევიდა შესაკრებელში და გაბედულად ქადაგებდა სამი თვე და ესაუბრებოდა ღვთის სასუფევლის შესახებ და არწმუნებდა მათ.

⁹ხოლო რადგან ზოგიერთები გამწარდნენ და არ ირწმუნეს და აუგს ამბობდნენ უფლის გზის შესახებ მრავალთა წინაშე, გაშორდა მათ, გამოარჩია მოწაფეები და ყოველდღე საუბრობდა ვინმე ტირანოსის სასწავლებელში.

¹⁰და ასე იყო ორი წელი, ვიდრე ასიის ყველა მკვიდრმა არ მოისმინა უფალი იესოს სიტყვა, იუდეველებმაც და ელინებმაც.

¹¹და უჩვეულო სასწაულებს იქმოდა ღმერთი პავლეს ხელით,

¹²ისე რომ, უძლურებს ზედ ადებდნენ მის ოფლიან თავსაბურავებს ან სარტყლებს და შორდებოდა მათ სენი და უკეთური სულები გადიოდნენ მათგან.

¹³და დაიწყეს ვიღაც მოხეტიალე იუდეველმა შემლოცველებმაც იმათთვის, ვისთანაც იყვნენ უკეთური სულები, უფალი იესოს სახელის მოხმობა და ამბობდნენ: გაფიცებთ თქვენ იესოს, რომელსაც პავლე ქადაგებს.

¹⁴იყო ვიღაც სკევას, იუდეველთა მღვდელმთავრის, შვიდი ძე, რომლებიც ამას აკეთებდნენ.

¹⁵და მიუგო უკეთურმა სულმა და უთხრა მათ: იესო ვიცი და პავლესაც ვიცნობ, ხოლო თქვენ ვინ ხართ?

¹⁶და ეცა მათ კაცი, რომელთანაც იყო უკეთური სული, მოერია მათ და იმძლავრა მათზე, ისე რომ, შიშვლები და ნაგვემნი გამოიქცნენ იმ სახლიდან.

¹⁷და ეს ცნობილი გახდა ყველა იუდეველისა და ელინისათვის, რომლებიც მკვიდრობდნენ ეფესოში, და შიში დაეცა მათ ყველას და იდიდებოდა უფალი იესოს სახელი.

¹⁸და მორწმუნეთაგან მრავალი მოდიოდა და აღიარებდა და ამხელდა თავის საქმეებს.

¹⁹და მრავალმა გრძნეულების მოქმედმა შეაგროვა თავისი წიგნები და დაწვა ყველას წინაშე; და აღრიცხეს მათი საფასური და აღმოჩნდა ორმოცდაათი ათასი ვერცხლი.

²⁰ასეთი ძალით აღორძინდებოდა და მტკიცდებოდა სიტყვა უფლისა.

²¹და როდესაც ეს აღსრულდა, ჩაიდო პავლემ გულში, მაკედონიისა და აქაიის გავლით მისულიყო იერუსალიმში, და თქვა: ჩემი იქ ყოფნის შემდეგ მმართებს მე რომის ხილვაც.

²²და გაგზავნა მაკედონიაში თავისი ორი მსახური: ტიმოთე და ერასტი, ხოლო თვითონ დროებით გაჩერდა ასიაში.

²³და იყო იმ დროს არცთუ ისე მცირე შფოთი უფლის გზის გამო,

²⁴რადგან ვიღაც, სახელად დემეტრიოსი, ვერცხლის მჭედელი, აკეთებდა არტემიდას ვერცხლის ტაძრებს და აძლევდა ხელოსნებს არცთუ ისე მცირე შემოსავალს,

²⁵და შეკრიბა ისინი და მათნაირი ოსტატები და უთხრა: კაცნო, იცით, რომ ამ შემოსავალზეა დამოკიდებული ჩვენი კეთილდღეობა,

²⁶და ხედავთ და გესმით, რომ არა მხოლოდ ეფესოში, არამედ თითქმის მთელ ასიაში ამ პავლემ დაარწმუნა და გადაიბირა უამრავი ხალხი და ამბობს, რომ არ არიან ღმერთები ხელით ქმნილნი.

²⁷და არა მხოლოდ ეს საფრთხე გვემუქრება ჩვენ, რომ ჩვენი საქმიანობა სათაკილო გახდება, არამედ დიდი ქალღმერთის, არტემიდას, ტაძარიც არაფრად შეირაცხება და დაემხობა მისი დიდებულება, რომელსაც მთელი ასია და ქვეყნიერება პატივს მიაგებს.

²⁸ხოლო როდესაც ეს გაიგონეს, აღივსნენ ისინი გულისწყრომით და აყვირდნენ და ამბობდნენ: დიდია არტემიდა ეფესელთა!

²⁹და მოიცვა მთელი ქალაქი მღელვარებამ და ერთად გაემართნენ თეატრონისკენ და თან შეიპყრეს გაიოსი და არისტარქე მაკედონიელნი, პავლეს თანამგზავრნი.

³⁰ხოლო პავლეს უნდოდა, გასულიყო ხალხში და არ გაუშვეს იგი მოწაფეებმა.

³¹და ასიის ზოგიერთმა მთავარმაც, ვინც მისი მეგობარი იყო, გაგზავნა მასთან და ევედრებოდა, რომ არ გამოჩენილიყო თეატრონში,

³²რადგან კრებული აღელვებული იყო, სხვადასხვა რამეს ყვიროდა და უმრავლესობამ არ იცოდა, რისთვის იყვნენ შეკრებილნი.

³³ხალხიდან გამოიყვანეს ალექსანდრე, რომელიც წარადგინეს იუდეველებმა; და ალექსანდრემ ანიშნა ხელით, რომ უნდოდა, სიტყვა ეთქვა ხალხისთვის.

³⁴ხოლო ისინი, როდესაც მიხვდნენ, რომ იუდეველია, ყველანი ერთხმად დაახლოებით ორი საათის განმავლობაში ყვიროდნენ: დიდია არტემიდა ეფესელთა!

³⁵და დააწყნარა მდივანმა ხალხი და უთხრა: კაცნო ეფესელნო, ვინ არის კაცთაგან, ვინც არ იცის ეფესელთა ქალაქი, რომელიც არის მსახური დიდი ქალღმერთის, არტემიდასი და დიოპეტისა?

³⁶ვინაიდან ეს უცილობელია, გმართებთ თქვენ, რომ წყნარად იყოთ და არაფერი მოიმოქმედოთ წინდაუხედავად,

³⁷რადგან მოგიყვანიათ ეს კაცები, რომლებიც არც ტაძრის მძარცველები არიან, არც მგმობელნი ჩვენი ღმერთისა.

³⁸თუ დემეტრიოსს და მასთან მყოფ ხელოსნებს აქვთ ვინმეს წინააღმდეგ საჩივარი, სასამართლოები არსებობს და პროკონსულები არიან, ბრალი დასდონ ერთმანეთს;

³⁹ხოლო თუ სხვა რამეს ეძიებთ, კანონიერი კრებით გადაწყდეს,

⁴⁰რადგან საფრთხე გვემუქრება, რომ დაგვბრალდება დღევანდელი ამბოხი, ვინაიდან არანაირი მიზეზი არ არსებობს, რომლითაც შევძლებთ, პასუხი ვაგოთ თავყრილობის გამო. — ეს თქვა და დაითხოვა კრება.