Read ახალი აღთქმა მოციქულთა საქმენი 2 Bible Online

მოციქულთა საქმენი 2 - ახალი აღთქმა bible

მოციქულთა საქმენი 2

¹და როცა შესრულდა მეერგასე დღე, იყვნენ ყველანი ერთსულოვნად ერთად.

²და იყო უეცრად ზეციდან ხმაური, როგორც ძლიერი ქარის ქროლვა, და აავსო მთელი სახლი, სადაც ისინი ისხდნენ.

³და ეჩვენა მათ გაყოფილი ენები, ცეცხლის მსგავსი, და დაადგა სათითაოდ, თითოეულ მათგანს.

⁴და აღივსნენ ყველანი სულიწმიდით და იწყეს ლაპარაკი სხვადასხვა ენაზე ისე, როგორც სული ამეტყველებდა მათ.

⁵ხოლო იერუსალიმში იმყოფებოდნენ იუდეველები, ღვთისმოშიში კაცები ყველა იმ ხალხიდან, რომელიც არის ცის ქვეშ.

⁶და როცა ეს ხმა იყო, შეიკრიბნენ მრავალნი და შეშფოთდნენ, რადგან თითოეულს ესმოდა საკუთარ ენაზე, რასაც ისინი ამბობდნენ.

⁷გაოგნდა ყველა, და უკვირდათ და ეუბნებოდნენ ერთმანეთს: განა ესენი ყველანი, რომლებიც ლაპარაკობენ, გალილეველები არ არიან?

⁸და როგორ გვესმის ჩვენ, თითოეულს ჩვენს საკუთარ ენაზე, რომელშიც ნაშობნი ვართ?

⁹პართელნი, მიდიელნი და ელამელნი, მკვიდრნი შუამდინარეთისა და ჰურიასტანისა, კაპადოკიისა, პონტოსი და ასიისა,

¹⁰ფრიგიისა და პამფილიისა, ეგვიპტისა და კირენესთან მდებარე ლიბიის მხარეთა, ჩამოსული რომაელები, იუდეველები და პროზელიტები,

¹¹კრეტელნი და არაბნი ვისმენთ, რომ ისინი ჩვენს ენებზე ღვთის დიდებულებათა შესახებ მეტყველებენ.

¹²გაოგნდნენ ყველანი და საგონებელში ჩაცვივდნენ და ერთმანეთს ეუბნებოდნენ: რა უნდა იყოს ეს?

¹³ხოლო სხვები დასცინოდნენ და ამბობდნენ: მაჭრით არიან მთვრალნი;

¹⁴ხოლო პეტრე დადგა თერთმეტთან ერთად, აიმაღლა ხმა და მიმართა მათ: კაცნო იუდეველნო და იერუსალიმის ყოველნო მკვიდრნო, იყოს ეს თქვენთვის ცნობილი და ყურად იღეთ ჩემი სიტყვები:

¹⁵რადგან არ არიან ესენი მთვრალნი, როგორც თქვენ გგონიათ, ვინაიდან დღის მესამე ჟამია,

¹⁶არამედ ეს არის თქმული იოელ წინასწარმეტყველის მიერ:

¹⁷და იქნება უკანასკნელ დღეებში, ამბობს უფალი ღმერთი, — მივფენ ჩემი სულისგან ყოველ ხორციელს და იწინასწარმეტყველებენ თქვენი ძეები და თქვენი ასულები, და თქვენი ჭაბუკები ხილვებს იხილავენ და თქვენს მოხუცებულებს სიზმრებით განეცხადებათ.

¹⁸და ჩემს მონებს და ჩემს მხევლებს იმ დღეებში მივფენ ჩემი სულისგან და იწინასწარმეტყველებენ.

¹⁹და მოვავლენ ნიშნებს ცაში, ზემოთ, და სასწაულებს — ქვეყანაზე, ქვემოთ, სისხლს და ცეცხლს და კვამლის ალმურს;

²⁰მზე გადაიქცევა სიბნელედ და მთვარე — სისხლად, ვიდრე არ მოიწევა დღე უფლისა, დიდი და ჩინებული.

²¹და იქნება: ყოველი, რომელიც მოუხმობს უფლის სახელს, ცხონდება (იოელ.3,1-5).

²²კაცნო ისრაელელნო, ისმინეთ ეს სიტყვები: იესო ნაზორეველი, კაცი, მოვლინებული ღვთის მიერ თქვენთვის ძალით, ნიშნებითა და სასწაულებით, რომელნიც აღასრულა ღმერთმა მის მიერ თქვენ შორის, როგორც თავადაც იცით,

²³იგი, ღვთის განჩინებული განზრახვით და წინასწარცნობით გაცემული, შეიპყარით, უსჯულოთა ხელით დამსჭვალეთ და მოკალით,

²⁴რომელიც ღმერთმა აღადგინა და განაქარვა სიკვდილის ტკივილები, რადგან შეუძლებელი იყო მისი დაკავება სიკვდილის მიერ;

²⁵ვინაიდან დავითი ამბობს მის შესახებ: წინასწარ ვხედავ უფალს, ჩემ წინაშეა მარადის, რადგან ჩემ მარჯვნივ არის, რათა არ შევიძრა;

²⁶ამიტომ გაიხარა ჩემმა გულმა და გალობდა ჩემი ენა, და მეტიც, ჩემი ხორციც დამკვიდრდება სასოებით;

²⁷რადგან არ დატოვებ ჩემს სულს ჯოჯოხეთში და არ მისცემ შენს წმიდას, იხილოს ხრწნა;

²⁸მაუწყე მე გზები ცხოვრებისა და აღმავსე მე შენი პირის სიხარულით (ფს.15,8-11).

²⁹კაცნო ძმანო, მართებულია, ცხადად გითხრათ თქვენ მამამთავარ დავითის შესახებ, რომ აღესრულა და დაიმარხა და მისი საფლავი არის ჩვენთან ამ დღემდე.

³⁰ვინაიდან წინასწარმეტყველი იყო და იცოდა, რომ ფიცით შეჰფიცა მას ღმერთმა, რომ მისი მუცლის ნაყოფისგან ხორციელად აღადგენდა ქრისტეს და დასვამდა მის ტახტზე.

³¹წინასწარ იხილა და ამბობდა ქრისტეს აღდგომის შესახებ, რომ არ დარჩა მისი სული ჯოჯოხეთში, არც მისმა ხორცმა იხილა ხრწნა.

³²ეს იესო აღადგინა ღმერთმა, რისი მოწმენიც ვართ ჩვენ ყველანი.

³³ღვთის მარჯვენით ამაღლებულმა მამისაგან მიიღო სულიწმიდის აღთქმა და მოჰფინა იგი, რომელსაც ახლა თქვენ ხედავთ და გესმით,

³⁴რადგან არა დავითი ამაღლდა ზეცად, როგორც თვითონვე ამბობს: უთხრა უფალმა ჩემს უფალს: დაჯექი ჩემ მარჯვნივ,

³⁵ვიდრე დავცემ შენს მტრებს შენ ფეხთქვეშ (ფს.109,1).

³⁶მტკიცედ იცოდეს ისრაელის მთელმა სახლმა, რომ უფლად და ცხებულად ქმნა იგი ღმერთმა — ეს იესო, რომელიც თქვენ ჯვარს აცვით.

³⁷ხოლო ეს რომ გაიგონეს, მოულბათ გული და უთხრეს პეტრეს და დანარჩენ მოციქულებს: რა ვქნათ, კაცნო ძმანო?

³⁸ხოლო პეტრემ უთხრა მათ: შეინანეთ და ნათელიღეთ თითოეულმა თქვენგანმა იესო ქრისტეს სახელით მოსატევებლად ცოდვათა და მიიღებთ ნიჭს სულიწმიდისას,

³⁹რადგან თქვენია აღთქმა და თქვენი შვილებისა და ყველა შორეულისა, ვისაც მოუწოდებს უფალი ღმერთი ჩვენი.

⁴⁰და სხვა მრავალი სიტყვითაც მოწმობდა, ევედრებოდა მათ და ეუბნებოდა: იხსენით თავი ამ უკუღმართი მოდგმისგან.

⁴¹ხოლო მათ სიხარულით შეიწყნარეს მისი სიტყვა და ნათელიღეს; და შეემატათ იმ დღეს სამი ათასამდე სული.

⁴²და იყვნენ გამუდმებით მოციქულთა მიერ დამოძღვრასა და ერთობაში, პურის განტეხასა და ლოცვაში.

⁴³და შიშმა მოიცვა ყოველი სული და მრავალი ნიშანი და სასწაული აღესრულებოდა მოციქულთა მიერ.

⁴⁴ყველა მორწმუნე ერთად იყო და ყველაფერი საერთო ჰქონდათ;

⁴⁵და მამულებსა და ქონებას ყიდდნენ და უყოფდნენ მას ყველას, ვისაც რა სჭირდებოდა.

⁴⁶და ყოველდღე გამუდმებით, ერთსულოვნად იყვნენ ტაძარში, განტეხდნენ სახლებში პურს და იღებდნენ საზრდოს მხიარული და წრფელი გულით,

⁴⁷აქებდნენ ღმერთს და მადლმოსილნი იყვნენ მთელი ხალხის წინაშე, ხოლო უფალი ყოველდღე ჰმატებდა ეკლესიას გამოხსნილებს.