Read ახალი აღთქმა მოციქულთა საქმენი 23 Bible Online

მოციქულთა საქმენი 23 - ახალი აღთქმა bible

მოციქულთა საქმენი 23

¹და მიაპყრო მზერა პავლემ კრებულს და თქვა: კაცნო ძმანო, მე მთელი კეთილსინდისიერებით ვმოქალაქეობდი ღვთის წინაშე ამ დღემდე.

²ხოლო მღვდელმთავარმა ანანიამ უბრძანა თავის წინ მდგომთ, ტუჩებში ეცემათ მისთვის.

³მაშინ პავლემ უთხრა მას: შენს ცემას აპირებს ღმერთი, კედელო შეფეთქილო! და შენ ზიხარ ჩემს მსაჯულად სჯულისამებრ და უსჯულოდ ბრძანებ ჩემს ცემას?!

⁴ხოლო წინ მდგომებმა უთხრეს: ღვთის მღვდელმთავარს აგინებ?

⁵უთხრა პავლემ: არ ვიცოდი, ძმებო, რომ მღვდელმთავარია; რადგან წერია: შენი ერის მთავარზე არ თქვა აუგი (გამ.22,28).

⁶და როცა მიხვდა პავლე, რომ ერთ მხარეს არიან სადუკევლები, ხოლო მეორე მხარეს ფარისევლები, შესძახა საკრებულოში: კაცნო ძმანო, მე ფარისეველი ვარ, ძე ფარისევლისა, და სასოებისა და მკვდართა აღდგომის გამო განვისჯები.

⁷და როცა ეს თქვა მან, ჩამოვარდა უთანხმოება ფარისეველთა და სადუკეველთა შორის და გაიყო კრებული,

⁸რადგან სადუკევლები ამბობდნენ: არ არსებობს აღდგომა, არც ანგელოზი, არც სული, ხოლო ფარისევლები აღიარებდნენ ორივეს.

⁹და ატყდა დიდი ყვირილი და ადგნენ მწიგნობრები ფარისეველთა მხრიდან, კამათობდნენ და ამბობდნენ: ცუდს ვერაფერს ვხედავთ ამ კაცში; იქნებ სული ელაპარაკა მას ან ანგელოზი? ნუ ვართ ღვთისმბრძოლნი.

¹⁰და როცა უთანხმოება გაძლიერდა, შეეშინდა ათასისთავს, რომ შუაზე არ გაეგლიჯათ მათ პავლე, და უბრძანა ჯარისკაცებს, ჩასულიყვნენ და გამოეტაცათ იგი მათგან და მიეყვანათ ციხე-სიმაგრეში.

¹¹ხოლო მეორე ღამეს გამოეცხადა მას უფალი და უთხრა: გამხნევდი, პავლე, რადგან როგორც მოწმობდი ჩემ შესახებ იერუსალიმში, ისე გმართებს შენ რომშიც მოწმობა.

¹²და როცა გათენდა, შეიკრიბნენ ვიღაც იუდეველები, და დაიფიცეს და თქვეს, რომ არ ეჭამათ, არც ესვათ, ვიდრე არ მოკლავდნენ პავლეს.

¹³და იყო ორმოცზე მეტი, ვინც ეს შეთქმულება მოაწყო.

¹⁴ისინი მივიდნენ მღვდელმთავრებთან და უხუცესებთან და უთხრეს: ფიცით დავიფიცეთ, რომ არაფერი შევჭამოთ, ვიდრე არ მოვკლავთ პავლეს.

¹⁵ამიტომ ახლა თქვენ საკრებულოსთან ერთად შეატყობინეთ ათასისთავს, რომ ხვალ ჩამოიყვანოს იგი თქვენთან, ვითომ აპირებთ, ზედმიწევნით გამოიძიოთ მის შესახებ, ხოლო ჩვენ, ვიდრე მოგიახლოვდებათ იგი, მზად ვიქნებით მის მოსაკლავად.

¹⁶და გაიგონა პავლეს დისწულმა, რომ ჩასაფრებას აპირებდნენ, მივიდა და შევიდა ციხეში და უთხრა პავლეს.

¹⁷ხოლო პავლემ მოუხმო ერთერთ ასისთავს და უთხრა: ეს ჭაბუკი მიიყვანე ათასისთავთან, რადგან აქვს მისთვის რაღაც სათქმელი.

¹⁸ხოლო მან წაიყვანა იგი და მიიყვანა ათასისთავთან და უთხრა: პატიმარმა პავლემ მომიხმო მე და მთხოვა, ეს ჭაბუკი მომეყვანა შენთან, რადგან რაღაც აქვს შენთვის სათქმელი.

¹⁹და მოჰკიდა მას ხელი ათასისთავმა და გაიყვანა ცალკე და ეკითხებოდა: რა არის, რა გაქვს ჩემთვის სათქმელი?

²⁰ხოლო მან უთხრა: იუდეველები შეთანხმდნენ, გთხოვონ შენ, რომ ხვალ პავლე ჩაიყვანო საკრებულოში, ვითომ აპირებენ, ზედმიწევნით გამოიკითხონ რაღაც მის შესახებ,

²¹ამიტომ შენ ნუ ენდობი მათ, რადგან ჩასაფრებულია მათგან ორმოცზე მეტი კაცი, რომლებმაც დაიფიცეს, რომ არც ჭამონ, არც სვან, ვიდრე არ მოკლავენ მას, და ახლა მზად არიან და ელიან შენგან ბრძანებას.

²²ხოლო ათასისთავმა გაუშვა ჭაბუკი და უბრძანა: არავის უთხრა, რომ ეს შემატყობინე მე.

²³და მოუხმო ვიღაც ორ ასისთავს და უთხრა: გაამზადეთ ორასი ჯარისკაცი, რათა გაჰყვნენ კესარიამდე, და სამოცდაათი ცხენოსანი და ორასი შუბოსანი ღამის მესამე ჟამისთვის,

²⁴და მოიყვანეთ სახედარი, რათა შესვან პავლე და დაცვით მიიყვანონ მმართველ ფელიქსთან.

²⁵და მისწერა ამგვარი წერილი:

²⁶კლავდიუს ლუსია — ღირსეულ მმართველ ფელიქსს, გიხაროდეს.

²⁷ეს კაცი შეეპყროთ იუდეველებს და აპირებდნენ მის მოკვლას და მივადექი ჯარისკაცებითურთ და გამოვიხსენი იგი, როცა შევიტყვე, რომ რომაელია.

²⁸და მინდოდა, გამეგო მიზეზი, რის გამოც ბრალს სდებდნენ მას, და ჩავიყვანე იგი მათ საკრებულოში

²⁹და აღმოვაჩინე, რომ ბრალს სდებდნენ თავისი სჯულის საკითხთა გამო, და არანაირი ბრალი, ღირსი სიკვდილისა ან ბორკილებისა, არა აქვს.

³⁰ხოლო როდესაც მეუწყა მე, რომ ამ კაცის წინააღმდეგ შეთქმულების მოწყობას აპირებდნენ იუდეველები, მაშინვე გამოვგზავნე შენთან და ვუბრძანე მის ბრალმდებლებსაც, დაგლაპარაკებოდნენ შენ მის შესახებ; ჯანმრთელად იყავი.

³¹ხოლო ჯარისკაცებმა, როგორც მათ უბრძანეს, წაიყვანეს პავლე და მიიყვანეს ღამით ანტიპატრისში

³²და მეორე დღეს გადააბარეს ცხენოსნებს, რომ წაეყვანათ იგი, ხოლო თავად დაბრუნდნენ ციხე-სიმაგრეში.

³³და მათ, კესარიაში რომ შევიდნენ, გადასცეს წერილი მმართველს და პავლეც წარუდგინეს მას.

³⁴და წაიკითხა მმართველმა და ჰკითხა, თუ რომელი ოლქიდან იყო, და როცა შეიტყო, რომ კილიკიიდან, უთხრა:

³⁵მოგისმენ შენ, როცა შენი ბრალმდებლებიც მოვლენ; — და ბრძანა, ჰეროდეს პრეტორიუმში დაცვის ქვეშ ჰყოლოდათ იგი.