Read ახალი აღთქმა მოციქულთა საქმენი 24 Bible Online

მოციქულთა საქმენი 24 - ახალი აღთქმა bible

მოციქულთა საქმენი 24

¹ხუთი დღის შემდეგ ჩავიდა მღვდელმთავარი ანანია უხუცესებთან და ერთ რიტორ ტერტულუსთან ერთად, რომლებმაც უჩივლეს მმართველთან პავლეს.

²და როდესაც მოუხმეს მას, დაიწყო ბრალის დადება ტერტულუსმა და თქვა:

³დიდი მშვიდობა მოვიპოვეთ შენ მიერ და კეთილდღეობა მიეცა ამ ხალხს შენი მზრუნველობით, რასაც ყველგან და ყოველთვის დიდი მადლიერებით ვიღებთ, ღირსეულო ფელიქს;

⁴ხოლო ზედმეტად რომ არ დაგღალო შენ, გთხოვ, ჩვენი მოკლე სიტყვა მოისმინო შენი სულგრძელებით,

⁵რადგან ვიპოვეთ ეს კაცი, მავნე და შფოთის აღმძვრელი ქვეყნიერებაზე ყველა იუდეველს შორის, და ნაზორეველთა მწვალებლობის წინამძღვარი,

⁶რომელიც ტაძრის წაბილწვასაც ცდილობდა; შევიპყარით იგი და ჩვენი სჯულისამებრ გვინდოდა განსჯა.

⁷მაგრამ მოვიდა ლუსია ათასისთავი, დიდი ძალა იხმარა, გამოგვტაცა ჩვენ ხელიდან და შენთან გამოგზავნა

⁸და ბრძანა, მისი ბრალმდებლებიც მოვსულიყავით შენთან; მისგან შეგიძლია გაიგო, როცა შენ თვითონ განსჯი, იმ ყველაფრის შესახებ, რაშიც ჩვენ ბრალს ვდებთ მას.

⁹და ეთანხმებოდნენ იუდეველებიც და ამტკიცებდნენ, რომ ეს ასეა.

¹⁰და მიუგო პავლემ, როცა ანიშნა მას მმართველმა, და თქვა: ვიცი, რომ მრავალი წელი ხარ მსაჯული ამ ხალხისა, ამიტომ უფრო გულმოდგინედ დავიცავ თავს;

¹¹შენ შეგიძლია, გაიგო, რომ თორმეტ დღეზე მეტი არ არის, რაც ავედი იერუსალიმში თაყვანის საცემად;

¹²და არც ტაძარში ვუნახივარ მათ მე ვინმესთან მოსაუბრე, არც ხალხი წამიქეზებია ამბოხისკენ არც შესაკრებლებში და არც ქალაქში,

¹³არც შეუძლიათ, წარმოადგინონ შენ წინაშე ის, რის გამოც ახლა ბრალს მდებენ მე.

¹⁴ხოლო ამას ვაღიარებ შენ წინაშე, რომ ამ გზით, რომელსაც ეგენი მწვალებლობას უწოდებენ, ასე ვემსახურები მამათა ღმერთს და მწამს ყველაფერი, რაც სჯულშია და რაც წინასწარმეტყველებებშია დაწერილი.

¹⁵მაქვს ღვთისადმი სასოება, რომელსაც თავად ეგენიც ელიან, რომ უნდა მოხდეს აღდგომა მკვდართა, მართალთა და ცრუთა.

¹⁶ამისთვის თვითონაც ვიღვწი, რომ უმწიკვლო სინდისი მქონდეს ღვთისა და კაცთა წინაშე მუდამ.

¹⁷და მრავალი წლის შემდეგ მოვედი ჩემი ხალხისთვის მოწყალების და შესაწირავის გადასაცემად,

¹⁸რომლის დროსაც მე განწმედილი, ტაძარში ხალხისა და შფოთის გარეშე მნახა ზოგიერთმა ასიელმა იუდეველმა,

¹⁹რომლებიც უნდა მოსულიყვნენ შენ წინაშე და დაედოთ ბრალი, თუ რამე ჰქონდათ ჩემი საწინააღმდეგო.

²⁰ან თვითონ მაგათ თქვან, რა სიცრუე ნახეს ჩემში, როცა ვიდექი საკრებულოს წინაშე,

²¹ნუთუ იმ ერთი სიტყვის გამო, რომელიც ხმამაღლა ვთქვი, როცა ვიდექი მათ შორის? მკვდართა აღდგომის გამო განვისჯები მე დღეს თქვენ მიერ.

²²ხოლო ეს რომ მოისმინა ფელიქსმა, ზედმიწევნით იცოდა რა ამ გზის შესახებ, ვადა გადაუდო მათ და თქვა: როცა ლუსია ათასისთავი ჩამოვა, მაშინ გამოვიძიებ თქვენს საქმეს.

²³და უბრძანა ასისთავს პავლეს დაცვა, რომ თავისუფლად ყოფილიყო და არავის დაეშალა მისიანებისთვის მისი მსახურება ან შესვლა მასთან.

²⁴ხოლო რამდენიმე დღის შემდეგ მოვიდა ფელიქსი დრუსილასთან, თავის ცოლთან, ერთად, რომელიც იყო იუდეველი, და მოუხმო პავლეს და მოისმინა მისგან იესო ქრისტეს სარწმუნოების შესახებ.

²⁵და როცა იგი საუბრობდა სამართლიანობის და თავშეკავების და მომავალი სამსჯავროს შესახებ, შეშინდა ფელიქსი და უთხრა: ახლა წადი და როცა დროს გამოვნახავ, მოგიხმობ შენ. —

²⁶და ამასთან იმედი ჰქონდა, რომ ფულს მიიღებდა პავლესგან, რათა გაეთავისუფლებინა იგი; ამიტომაც ხშირ-ხშირად უხმობდა და ესაუბრებოდა მას.

²⁷ხოლო როცა ორი წელი გავიდა, მოვიდა ფელიქსის შემცვლელი პორციუს ფესტუსი, და რადგან უნდოდა ფელიქსს იუდეველთა მომადლიერება, დატოვა პავლე შებორკილი.