Read ახალი აღთქმა მოციქულთა საქმენი 25 Bible Online

მოციქულთა საქმენი 25 - ახალი აღთქმა bible

მოციქულთა საქმენი 25

¹ფესტუსი, ოლქი რომ ჩაიბარა, სამი დღის შემდეგ კესარიიდან იერუსალიმში ავიდა.

²და მღვდელმთავარმა და წარჩინებულმა იუდეველებმა უჩივლეს მასთან პავლეს და ევედრებოდნენ მას

³და სთხოვდნენ, გაეღო წყალობა და მოეხმო იგი იერუსალიმში, რადგან აპირებდნენ ჩასაფრებას და მის მოკვლას გზაზე.

⁴ხოლო ფესტუსმა მიუგო, რომ პავლე დაცვის ქვეშ იმყოფებოდა კესარიაში და მალე თვითონაც აპირებდა იქ გამგზავრებას.

⁵ამიტომ ვისაც თქვენ შორის შეუძლია, — თქვა მან, — ჩემთან ერთად წამოვიდეს და თუ რამე არის ამ კაცში უჯერო, ბრალი დასდოს მას.

⁶და დაჰყო მათთან არა უმეტეს ათი დღისა და ჩავიდა კესარიაში და მეორე დღეს დაჯდა მსაჯულის ტახტზე და ბრძანა, მოეყვანათ პავლე.

⁷და როცა მოვიდა იგი, გარშემოერტყნენ მას იერუსალიმიდან ჩამოსული იუდეველები და პავლეს მრავალი და მძიმე ბრალდება წაუყენეს, რომლის დამტკიცებაც არ შეეძლოთ.

⁸ხოლო მან თავის დასაცავად თქვა: არც იუდეველთა სჯულის, არც ტაძრის, არც კეისრის წინაშე არაფერი შემიცოდავს.

⁹ფესტუსს უნდოდა იუდეველთა მომადლიერება და მიუგო პავლეს და უთხრა: გინდა იერუსალიმში ასვლა, რათა იქ განისაჯო ამის გამო ჩემ წინაშე?

¹⁰და უთხრა პავლემ: კეისრის მსაჯულის ტახტის წინაშე ვდგავარ, სადაც მართებულია ჩემი განსჯა. იუდეველებისთვის არაფერი დამიშავებია, როგორც შენც უკეთესად იცი;

¹¹თუ ვაშავებ და სიკვდილის ღირსი რამე ჩამიდენია, არ გავექცევი სიკვდილს, ხოლო თუ არ არსებობს ის, რაშიც ესენი ბრალს მდებენ მე, არავის შეუძლია ჩემი გადაცემა მათთვის. კეისარს მივმართავ!

¹²მაშინ ფესტუსი მოელაპარაკა სათათბიროს და მიუგო: კეისარს მიმართე? კეისართან წახვალ!

¹³და როცა გავიდა რამდენიმე დღე, მეფე აგრიპა და ბერენიკე ჩავიდნენ კესარიაში ფესტუსის მოსაკითხად.

¹⁴და რადგან მრავალი დღე დაჰყვეს იქ, ფესტუსმა მოახსენა მეფეს პავლეს შესახებ და უთხრა: ერთი კაცია დარჩენილი, ფელიქსისგან შებორკილი,

¹⁵რომლის გამოც, ვიყავი რა იერუსალიმში, იჩივლეს მღვდელმთავრებმა და იუდეველთა უხუცესებმა და ითხოვდნენ მის დასჯას,

¹⁶რომელთაც მივუგე: არ არის რომაელთა წესი, გადასცენ კაცი სასიკვდილოდ, ვიდრე ბრალდებულს პირისპირ არ დაუყენებენ ბრალმდებლებს და არ მისცემენ საშუალებას, თავი დაიცვას ბრალდებისგან.

¹⁷ამიტომ როდესაც შეიკრიბნენ ისინი აქ, დაუყოვნებლივ, მეორე დღესვე დავჯექი მსაჯულის ტახტზე და ვბრძანე, მოეყვანათ ის კაცი,

¹⁸რომლის გამოც წარდგნენ ბრალმდებლები და ვერანაირი ბრალდება ვერ წაუყენეს, რასაც ვვარაუდობდი;

¹⁹რაღაც კამათიც ჰქონდათ მასთან საკუთარ სარწმუნოებაზე და ვიღაც იესოსთან დაკავშირებით, რომელიც მოკვდა და რომელზეც პავლე ამტკიცებდა, რომ ცოცხალია.

²⁰და საგონებელში ჩავარდნილმა ამ კამათის გამო ვუთხარი მას, თუ ისურვებდა წასვლას იერუსალიმში და იქ განსჯას ამის გამო.

²¹ხოლო პავლემ მოითხოვა, დაცვის ქვეშ ყოფილიყო იგი, სანამ სევასტოსი განსჯიდა; და ვბრძანე მისი დაცვა, ვიდრე გავგზავნი მას კეისართან.

²²და აგრიპამ უთხრა ფესტუსს: მინდა მეც მაგ კაცის მოსმენა. ხოლო მან უთხრა: ხვალ მოუსმენ მას.

²³და მეორე დღეს მოვიდნენ აგრიპა და ბერენიკე მთელი ბრწყინვალებით და შევიდნენ სასამართლო დარბაზში ათასისთავებთან და ქალაქის წარჩინებულ კაცებთან ერთად; და როცა ბრძანა ფესტუსმა, მოიყვანეს პავლე.

²⁴და თქვა ფესტუსმა: მეფე აგრიპავ და ყოველნო კაცნო, რომლებიც ჩვენთან ერთად ხართ, ხედავთ ამას, რომლის გამოც იუდეველთა მთელი სიმრავლე მთხოვდა მე იერუსალიმში და აქაც ღაღადებდნენ: აღარ უნდა იცოცხლოს მაგან.

²⁵ხოლო მე მივხვდი, რომ არაფერი, ღირსი სიკვდილისა, არ ჩაუდენია მას; და როცა მან თვითონ მოითხოვა, მიემართა სევასტოსისთვის, გადავწყვიტე, გამეგზავნა იგი,

²⁶რომლის შესახებაც დაზუსტებით არაფერი მაქვს ხელმწიფისთვის მისაწერი; ამიტომ მოვიყვანე იგი თქვენ წინაშე და უფრო კი შენ წინაშე, მეფე აგრიპავ, რათა მოძიების შემდეგ ვიცოდე, რა მივწერო,

²⁷რადგან არაგონივრულად მიმაჩნია მე, გავუგზავნო შებორკილი და მისი ბრალდება კი არ ვაუწყო.