Read ახალი აღთქმა მოციქულთა საქმენი 28 Bible Online

მოციქულთა საქმენი 28 - ახალი აღთქმა bible

მოციქულთა საქმენი 28

¹და როცა გადავრჩით, მაშინ გავიგეთ, რომ მელიტე ერქვა კუნძულს.

²ბარბაროსებმა გამოიჩინეს უჩვეულო კაცთმოყვარეობა ჩვენ მიმართ, რადგან დაანთეს კოცონი და შეგვიფარეს ჩვენ ყველანი იმის გამო, რომ დაიწყო წვიმა და ციოდა.

³ხოლო როცა პავლემ მოაგროვა დიდძალი ფიჩხი და დაყარა კოცონზე, სიმხურვალის გამო გამოვიდა იქედნე და შემოეხვია მას ხელზე.

⁴როგორც კი დაინახეს ბარბაროსებმა მის ხელზე ჩამოკიდებული გველი, ერთმანეთს ეუბნებოდნენ: უეჭველად მკვლელია ეს კაცი, ზღვას გადაურჩა, მაგრამ სამართალმა არ გაუშვა, რომ ეცოცხლა.

⁵ხოლო მან ჩააგდო გველი ცეცხლში და ცუდი არაფერი შემთხვევია.

⁶ხოლო ისინი ელოდნენ, რომ დასივდებოდა ან დაეცემოდა უეცრად მკვდარი; და როცა დიდხანს ელოდნენ და დაინახეს, რომ უჩვეულო არაფერი შეემთხვა მას, შეიცვალეს აზრი და ამბობდნენ: ღმერთია იგი.

⁷ხოლო იმ ადგილის გარშემო მდებარეობდა მამულები კუნძულის მთავრისა, სახელად პოპლიოსისა, რომელმაც მიგვიღო ჩვენ და სამი დღე გულთბილად გვიმასპინძლა.

⁸და პოპლიოსის მამა ცხელებით და ნაწლავთა სნეულებით იყო შეპყრობილი და იწვა; მასთან შევიდა პავლე, ილოცა, დაადო მას ხელები და განკურნა იგი.

⁹როდესაც ეს მოხდა, სხვებიც, რომელებიც ამ კუნძულზე უძლურებაში იყვნენ, მოდიოდნენ და იკურნებოდნენ,

¹⁰რომელთაც დიდი პატივი გვცეს ჩვენ და წამოსვლისას ჩაგვიწყვეს, რაც გვჭირდებოდა.

¹¹სამი თვის შემდეგ გავემგზავრეთ ალექსანდრიის გემით, რომელმაც გამოიზამთრა კუნძულზე და რომელსაც დიოსკურების ნიშანი ჰქონდა.

¹²და ჩავედით სირაკუზაში და დავრჩით სამი დღე,

¹³საიდანაც წამოვედით და მივაღწიეთ რეგიუმს. და ერთი დღის შემდეგ ამოვარდა სამხრეთის ქარი და მეორე დღეს მივედით პუტეოლიში,

¹⁴სადაც ვნახეთ ძმები; და გვევედრებოდნენ რა, დავრჩით შვიდი დღე. და ასე მივედით რომში.

¹⁵და იქაურმა ძმებმა გაიგეს ჩვენ შესახებ და გამოვიდნენ ჩვენ შესახვედრად აპიუსის ფორუმამდე და სამ სასტუმრომდე, და ნახა რა ისინი პავლემ, მადლობდა ღმერთს და მხნეობა შეემატა.

¹⁶როცა შევედით რომში, ასისთავმა გადასცა პატიმრები დაცვის უფროსს, ხოლო პავლეს ნება დართეს, ცალკე ყოფილიყო თავის მცველ ჯარისკაცთან ერთად.

¹⁷და იყო, სამი დღის შემდეგ მოუხმო პავლემ იუდეველთა წარჩინებულებს, რომლებიც იყვნენ იქ. და როცა შეიკრიბნენ ისინი, უთხრა მათ: კაცნო ძმანო, მე, რომელსაც არაფერი ჩამიდენია ერის ან მამათა წეს-ჩვეულებების საწინააღმდეგო, დამაპატიმრეს და იერუსალიმიდან გადამცეს რომაელთა ხელში,

¹⁸რომელთაც განმსაჯეს მე და უნდოდათ ჩემი განთავისუფლება იმის გამო, რომ არანაირი სასიკვდილო დანაშაული არ ჩამიდენია;

¹⁹ხოლო რადგან იუდეველები ეწინააღმდეგებოდნენ, იძულებული გავხდი, მიმემართა კეისრისთვის, მაგრამ არა იმის გამო, რომ ჩემი ხალხისთვის რამეში დამედო ბრალი.

²⁰სწორედ ამ მიზეზით მოგიწვიეთ თქვენ, რათა მენახეთ და მეთქვა, რომ ისრაელის სასოებისთვის მადევს ეს ჯაჭვი.

²¹ხოლო მათ უთხრეს მას: ჩვენ არც წერილი მიგვიღია შენ შესახებ ჰურიასტანიდან, არც მოსულა ვინმე ძმათაგან და შეუტყობინებია ან უთქვამს რამე ცუდი შენ შესახებ.

²²ამიტომ სასურველი იქნებოდა, შენგან მოგვესმინა, რას ფიქრობ, რადგან ცნობილია ჩვენთვის, რომ ამ მწვალებლობის შესახებ ყველგან კამათია.

²³და დაუნიშნეს მას დღე და მივიდნენ მასთან სტუმრად მრავალნი, რომელთაც დილიდან საღამომდე უამბობდა, და მოწმობდა ღვთის სასუფეველზე და არწმუნებდა მათ იესოს შესახებ მოსეს სჯულისა და წინასწარმეტყველთა მიხედვით.

²⁴და ზოგიერთმა დაიჯერა მისი სიტყვები, ხოლო ზოგიერთმა არ ირწმუნა.

²⁵და ვერ შეთანხმდნენ ერთმანეთში; და როცა მიდიოდნენ, უთხრა პავლემ ერთი სიტყვა: კარგად ეუბნებოდა სულიწმიდა ესაია წინასწარმეტყველის მიერ თქვენს მამებს,

²⁶როდესაც ამბობდა: მიდი ამ ერთან და უთხარი: სმენით გესმოდეთ და ვერ გაიგოთ, ხედვით ხედავდეთ და ვერ იხილოთ;

²⁷რადგან გაქვავდა ამ ხალხის გული და ყურით ძნელად ისმინეს და თვალები დახუჭეს, რომ არ იხილონ თვალით და არ ისმინონ ყურით და არ გაიგონ გულით და არ მოიქცნენ და არ განვკურნო ისინი (ეს.6,9-10).

²⁸ამიტომ იცოდეთ თქვენ, რომ წარმართთათვის იქნა მოვლენილი ღვთისგან ეს ხსნა; და ისინიც მოისმენენ.

²⁹და ეს რომ თქვა, წავიდნენ იუდეველები და დიდი დავა ჰქონდათ ერთმანეთში.

³⁰ხოლო დაჰყო იქ პავლემ მთელი ორი წელი საკუთარი სახსრებით და იღებდა ყველას, ვინც მოდიოდა მასთან,

³¹და ქადაგებდა ღვთის სასუფეველს და მთელი გაბედულებით, დაუბრკოლებლად ასწავლიდა უფალი იესო ქრისტეს შესახებ.