Read ახალი აღთქმა მოციქულთა საქმენი 3 Bible Online

მოციქულთა საქმენი 3 - ახალი აღთქმა bible

მოციქულთა საქმენი 3

¹პეტრე და იოანე ადიოდნენ ტაძარში მეცხრე ჟამის ლოცვაზე.

²და ვიღაც კაცი, კოჭლი თავისი დედის მუცლიდან, მოჰყავდათ და ყოველდღე სვამდნენ ტაძრის კართან, რომელსაც ეწოდებოდა მშვენიერი, ტაძარში შემსვლელთაგან მოწყალების სათხოვნელად,

³რომელმაც იხილა პეტრე და იოანე, ტაძარში შესვლას რომ აპირებდნენ, და სთხოვა მოწყალება.

⁴დააკვირდა მას პეტრე იოანესთან ერთად და უთხრა: შემოგვხედე ჩვენ.

⁵ხოლო იგი შეჰყურებდა მათ და ელოდა, რომ რამეს მიიღებდა მათგან.

⁶უთხრა პეტრემ: ვერცხლი და ოქრო არა მაქვს მე, ხოლო რაც მაქვს, იმას გაძლევ შენ: იესო ქრისტე ნაზორეველის სახელით ადექი და იარე! —

⁷და მოჰკიდა ხელი მის მარჯვენას და ააყენა; და მყისვე გაუმაგრდა მას ტერფები და კოჭები;

⁸და წამოხტა და გაიარა და შევიდა მათთან ერთად ტაძარში და დადიოდა და ხტოდა და აქებდა ღმერთს.

⁹და იხილა იგი მთელმა ხალხმა, რომ დადიოდა და აქებდა ღმერთს,

¹⁰და იცნეს იგი, რომ ის იყო, ვინც მოწყალებისთვის იჯდა ტაძრის მშვენიერ კარიბჭესთან, და აღივსნენ შიშითა და განცვიფრებით იმის გამო, რაც მასზე აღსრულდა.

¹¹და როცა განკურნებული კოჭლი აკავებდა პეტრეს და იოანეს, მთელმა განცვიფრებულმა ხალხმა მიირბინა მათთან სტოაში, რომელსაც ეწოდება სოლომონისა.

¹²როდესაც იხილა პეტრემ, უთხრა ხალხს: კაცნო ისრაელელნო, რად გიკვირთ ეს? ან ჩვენ რად შემოგვყურებთ, თითქოს საკუთარი ძალით ანდა ღვთისმოსაობით შევაძლებინეთ მაგას სიარული?

¹³ღმერთმა აბრაამისამ და ისააკისამ და იაკობისამ, ჩვენი მამების ღმერთმა ადიდა თავისი ძე, იესო, რომელიც თქვენ გაეცით და უარყავით პილატეს წინაშე, რომელმაც განაჩინა მისი განთავისუფლება;

¹⁴თქვენ კი წმიდა და მართალი უარყავით და ითხოვეთ, კაცი, მკვლელი, ებოძებინა თქვენთვის;

¹⁵ხოლო წინამძღვარი ცხოვრებისა მოკალით, რომელიც ღმერთმა აღადგინა მკვდრეთით, რისი მოწმენიც ჩვენ ვართ.

¹⁶და მისი სახელის რწმენით ეს, ვისაც ხედავთ და იცნობთ, განამტკიცა მისმა სახელმა და მისმიერმა რწმენამ მისცა მას ეს სიმრთელე თქვენ ყველას წინაშე.

¹⁷და ახლა, ძმანო, ვიცი, რომ უმეცრებით მოიმოქმედეთ ეს, როგორც თქვენმა მთავრებმა.

¹⁸ხოლო ღმერთმა, რომელმაც წინასწარ აუწყა ყველა თავისი წინასწარმეტყველის პირით ვნება ქრისტესი, ასე აღასრულა.

¹⁹ამიტომ შეინანეთ და მოიქეცით, რათა აღიხოცოს თქვენი ცოდვები,

²⁰რათა, როცა მოიწევა ჟამი შვებისა უფლის პირისგან, მოავლინოს თქვენთვის წინასწარ განჩინებული ქრისტე იესო,

²¹რომელიც ზეცამ უნდა შეიწყნაროს იმ დრომდე, ვიდრე არ აღდგება ყოველივე, რასაც ამბობდა ღმერთი ყველა თავისი წმიდა წინასწარმეტყველის პირით დასაბამიდან;

²²რადგან მოსემ უთხრა მამებს: წინასწარმეტყველს აღგიდგენთ თქვენ უფალი ღმერთი თქვენს ძმათაგან, ჩემს მსგავსს; მისი ისმინეთ იმ ყველაფრისამებრ, რასაც გეტყვით თქვენ.

²³და იქნება, ყოველი სული, რომელიც არ შეისმენს იმ წინასწარმეტყველისას, მოიკვეთება ერიდან (2სჯ,18,15-20).

²⁴და ყველა წინასწარმეტყველი სამუელიდან მოყოლებული და შემდგომნი, რომლებიც ამბობდნენ, წინასწარ იუწყებოდნენ ამ დღეებს.

²⁵თქვენ ხართ ძენი წინასწარმეტყველთა და აღთქმისა, რომელიც აღუთქვა ღმერთმა თქვენს მამებს, როდესაც უთხრა აბრაამს: შენი თესლით იკურთხება ქვეყნის ყველა ტომი (დაბ.22,18).

²⁶პირველად თქვენ აღგიდგინათ ღმერთმა თავისი ძე, იესო, და მოგივლინათ იგი თქვენს მაკურთხევლად, რათა მოიქცეთ თითოეული თქვენი უკეთურებისგან.