Read ახალი აღთქმა მოციქულთა საქმენი 4 Bible Online

მოციქულთა საქმენი 4 - ახალი აღთქმა bible

მოციქულთა საქმენი 4

¹ხოლო ვიდრე ისინი ხალხს ესაუბრებოდნენ, მოადგნენ მათ მღვდლები და ტაძრის გამგებელი და სადუკევლები,

²განრისხებულები იმის გამო, რომ ისინი ასწავლიდნენ ხალხს და აუწყებდნენ იესოს მიერ მკვდრეთით აღდგომას,

³და დაადეს მათ ხელი და ჩასხეს საკანში მეორე დღემდე, რადგან უკვე მწუხრი იყო.

⁴ხოლო მრავალმა, ვინც ისმინა მათი სიტყვა, ირწმუნა; და იყო მამაკაცთა რიცხვი ხუთი ათასამდე.

⁵და იყო, მეორე დღეს შეიკრიბნენ მათი მთავრები და უხუცესები მწიგნობრები იერუსალიმში,

⁶და ანა მღვდელმთავარი, კაიაფა, იოანე და ალექსანდრე და ვინც იყვნენ მღვდელმთავრის გვარიდან;

⁷და დააყენეს ისინი შუაში და ეკითხებოდნენ: რა ძალით ან ვისი სახელით მოიმოქმედეთ თქვენ ეს?

⁸მაშინ პეტრე აღივსო სულიწმიდით და უთხრა მათ: ერის მთავარნო და ისრაელის უხუცესნო,

⁹თუ ჩვენ დღეს განვისჯებით უძლური კაცისთვის აღსრულებული კეთილი საქმის გამო, რომლითაც იგი განიკურნა,

¹⁰იცოდეთ თქვენ ყველამ და ისრაელის მთელმა ხალხმა, რომ იესო ქრისტე ნაზორეველის სახელით, რომელიც თქვენ ჯვარს აცვით და რომელიც ღმერთმა აღადგინა მკვდრეთით, მის მიერ, დგას იგი თქვენ წინაშე ჯანმრთელი.

¹¹ეს არის ლოდი, რომელიც დაიწუნეთ თქვენ, მშენებლებმა, და რომელიც იქცა თავკიდურად.

¹²და სხვა არავის მიერ არის ცხონება, არც არის სხვა სახელი ცის ქვეშ მოცემული კაცთათვის, რომლითაც გვმართებს ჩვენ ცხონება.

¹³და ისინი, ხედავდნენ რა პეტრესა და იოანეს გაბედულებას, ხვდებოდნენ, რომ უწიგნური და უბრალო კაცები არიან, და უკვირდათ; თან იცოდნენ, რომ ისინი, იესოსთან იყვნენ,

¹⁴მაგრამ ხედავდნენ იმ კაცს, მათთან მდგომს, განკურნებულს, და ვერაფერს ამბობდნენ საწინააღმდეგოს;

¹⁵და უბრძანეს მათ საკრებულოდან გარეთ გასვლა და ბჭობდნენ ერთმანეთში

¹⁶და ამბობდნენ: რა ვუყოთ ამ კაცებს? რადგან მათ მიერ ცხადი სასწაული აღსრულდა, რომელიც იერუსალიმის ყველა მკვიდრისთვის ცნობილია, და ვერ შევძლებთ უარყოფას,

¹⁷მაგრამ უფრო მეტად რომ არ გავრცელდეს ხალხში, დავემუქროთ მათ, რომ ამ სახელის შესახებ კაცთაგან არავის აღარ ელაპარაკონ.

¹⁸და მოუხმეს მათ და უბრძანეს, რომ აღარაფერი ეთქვათ, აღარც ესწავლებინათ იესოს სახელის შესახებ.

¹⁹ხოლო პეტრემ და იოანემ მიუგეს მათ და უთხრეს: განა სამართლიანია ღვთის წინაშე, რომ თქვენ უფრო გისმინოთ, ვიდრე ღმერთს? განსაჯეთ,

²⁰რადგან ჩვენ არ შეგვიძლია არ ვთქვათ, რაც ვიხილეთ და ვისმინეთ.

²¹ხოლო ისინი კვლავ დაემუქრნენ და, რადგან ვერ იპოვეს საბაბი მათ დასასჯელად, გაათავისუფლეს ხალხის გამო, რადგან ყველანი ადიდებდნენ ღმერთს იმისთვის, რაც მოხდა;

²²რადგან ორმოც წელზე მეტის იყო ის კაცი, ვისზეც აღსრულდა განკურნების ეს სასწაული.

²³ხოლო ისინი, განთავისუფლებულნი, მივიდნენ თავისიანებთან და აუწყეს, რაც მღვდელმთავრებმა და უხუცესებმა უთხრეს მათ.

²⁴ხოლო მათ, ეს რომ გაიგონეს, ერთსულოვნად აიმაღლეს ხმა ღვთის მიმართ და თქვეს: მეუფეო, შენ, რომელმაც შექმენი ცა და ქვეყანა, ზღვა და ყოველივე, რაც მასშია,

²⁵რომელმაც დავითის, ჩვენი მამის და შენი მსახურის, პირით თქვი სულიწმიდის მიერ: რად აღიძრნენ წარმართნი და ერმა განიზრახა ამაო?

²⁶მოადგნენ მეფენი ქვეყნისა და მთავარნი შეიკრიბნენ ერთად უფლისა და მისი ცხებულის წინააღმდეგ (ფს.2,1–2);

²⁷რადგან ჭეშმარიტად შეიკრიბნენ ამ ქალაქში შენი წმიდა ძის, იესოს, წინააღმდეგ, რომელსაც შენ სცხე, ჰეროდე და პონტოელი პილატე წარმართებთან და ისრაელის ერთან ერთად

²⁸აღსასრულებლად იმისა, რაც შენმა ხელმა და შენმა ზრახვამ წინასწარ განაგო, რომ მომხდარიყო.

²⁹და ახლა, უფალო, მოხედე მათ მუქარას და მიეცი შენს მონებს, მთელი გამბედაობით თქვან შენი სიტყვა,

³⁰როდესაც გაიწვდი შენს ხელს განსაკურნებლად და სასწაულებისა და ნიშნების აღსასრულებლად შენი წმიდა ძის, იესოს, სახელით.

³¹და მათი ლოცვისას შეიძრა ის ადგილი, სადაც იყვნენ შეკრებილნი, და აღივსნენ ყველანი სულიწმიდით და გაბედულად ამბობდნენ ღვთის სიტყვას.

³²ხოლო მრავალს, ვინც ირწმუნა, ერთი გული და სული ჰქონდა და არავინ ამბობდა თავის ქონებაზე, რომ თავისი იყო, არამედ მათ ყველაფერი საერთო ჰქონდათ.

³³და დიდი ძალით მოწმობდნენ მოციქულები უფალ იესო ქრისტეს აღდგომას და დიდი მადლი იყო ყოველ მათგანზე,

³⁴და არავინ იყო გაჭირვებული მათ შორის, რადგან, ვინც იყო მფლობელი მამულებისა ან სახლებისა, ყიდდნენ და მოჰქონდათ გაყიდულის საფასური

³⁵და დებდნენ მოციქულთა ფეხებთან; და ეძლეოდა თითოეულს, ვისაც რა სჭირდებოდა.

³⁶ხოლო იოსიამ, რომელსაც მოციქულთა მიერ ეწოდა ბარნაბა, რაც ითარგმნება: ძე ნუგეშისცემისა, ლევიანმა, წარმოშობით კვიპრელმა,

³⁷რომელსაც ჰქონდა მამული, გაყიდა იგი და მოიტანა ფული და დადო მოციქულთა ფეხებთან.