Read ახალი აღთქმა მოციქულთა საქმენი 5 Bible Online

მოციქულთა საქმენი 5 - ახალი აღთქმა bible

მოციქულთა საქმენი 5

¹ვიღაც კაცმა, სახელად ანანიამ, თავის ცოლთან, საფირასთან, ერთად გაყიდა მამული

²და მოაკლო საფასურს — იცოდა ეს მისმა ცოლმაც — და მოიტანა რაღაც ნაწილი და დადო მოციქულთა ფეხებთან.

³ხოლო პეტრემ უთხრა: ანანია, რატომ აავსო შენი გული სატანამ, რომ გეცრუა სულიწმიდასთან და მოგეკლო მამულის საფასურისთვის?

⁴განა შენი არ იყო, რაც გქონდა? და რაც გაყიდე, შენს მფლობელობაში არ იყო? რად ჩაიდე შენს გულში ეს საქმე? არა ადამიანებს ეცრუე შენ, არამედ ღმერთს.

⁵ხოლო როცა გაიგონა ანანიამ ეს სიტყვები, დაეცა და განუტევა სული; და დიდმა შიშმა მოიცვა ყველა, ვინც ეს გაიგო.

⁶და ადგნენ ახალგაზრდები, შემოსეს იგი და გაიტანეს და დამარხეს.

⁷და იყო, სამიოდე საათის შემდეგ მისი ცოლი, რომელმაც არ იცოდა, რაც მოხდა, შემოვიდა.

⁸და უთხრა მას პეტრემ: მითხარი მე, ამდენად გაყიდეთ მამული? ხოლო მან უთხრა: ჰო, მაგდენად.

⁹და უთხრა პეტრემ მას: რად შეითქვით თქვენ უფლის სულის გამოსაცდელად? აჰა, შენი ქმრის დამმარხველთა ფეხები კართან დგანან და გაგიტანენ შენც.

¹⁰და დაეცა მყისვე მის ფეხებთან და განუტევა სული; და როცა შემოვიდნენ ის ჭაბუკები, ნახეს იგი მკვდარი და გაიტანეს და დამარხეს თავის ქმართან.

¹¹და დიდმა შიშმა მოიცვა მთელი ეკლესია და ყველა, ვინც გაიგო ეს.

¹²ხოლო მოციქულთა ხელით აღესრულებოდა მრავალი სასწაული და ნიშანი ხალხში. და იყვნენ ყველანი ერთსულოვნად სოლომონის სტოაში.

¹³და სხვა ვერავინ კადნიერდებოდა, შედგომოდა მათ, მაგრამ ხალხი ადიდებდა მათ;

¹⁴და უფროდაუფრო ემატებოდნენ მორწმუნენი უფალს, სიმრავლე მამაკაცთა და დედაკაცთა,

¹⁵ისე რომ, ქუჩებში გამოჰყავდათ უძლურები და აწვენდნენ სარეცლებზე და საწოლებზე, რათა, როცა პეტრე გაივლიდა, ჩრდილი მაინც მისდგომოდა რომელიმე მათგანს.

¹⁶და იკრიბებოდნენ იერუსალიმში მრავალნი გარშემო ქალაქებიდან და მოჰყავდათ უძლურნი და არაწმინდა სულთაგან შეპყრობილნი და იკურნებოდნენ ყველანი.

¹⁷აღდგა მღვდელმთავარი, და ყველა, ვინც მასთან იყო სადუკეველთა მწვალებლობიდან, და აღივსნენ შურით

¹⁸და დაადეს ხელი მოციქულებს და ჩასხეს ისინი საზოგადო საკანში.

¹⁹ხოლო უფლის ანგელოზმა ღამით გაუხსნა საპყრობილის კარი და გამოიყვანა ისინი და უთხრა:

²⁰მიდით და დადექით და უთხარით ტაძარში ხალხს ყოველი სიტყვა ამ ცხოვრებისა.

²¹ხოლო ეს რომ გაიგონეს, შევიდნენ ისინი ცისკრისას ტაძარში და ასწავლიდნენ. როდესაც მოვიდა მღვდელმთავარი, და მასთან მყოფნი, მოიწვიეს საკრებულო და ისრაელის ძეთა მთელი უხუცესობა და გაგზავნეს საპყრობილეში მოციქულთა მოსაყვანად.

²²ხოლო როცა მივიდნენ მსახურები, ვერ იპოვეს ისინი საპყრობილეში; დაბრუნდნენ და აუწყეს

²³და უთხრეს: ვნახეთ საპყრობილე საგულდაგულოდ დაკეტილი და კარების წინ მდგარი მცველები, ხოლო როცა გავაღეთ, შიგნით ვერავინ ვიპოვეთ.

²⁴როგორც კი გაიგონეს ეს სიტყვები, ტაძრის გამგებელი და მღვდელმთავრები საგონებელში ჩაცვივდნენ, თუ რა უნდა მომხდარიყო.

²⁵და მოვიდა ვიღაც, აუწყა მათ და უთხრა: აჰა, კაცები, რომლებიც ჩასხით საპყრობილეში, ტაძარში არიან, დგანან და ასწავლიან ხალხს.

²⁶მაშინ წავიდა გამგებელი მსახურებთან ერთად და მოიყვანა ისინი ძალდატანების გარეშე, რადგან ეშინოდათ ხალხისა, რომ არ ჩაექოლათ.

²⁷ხოლო როცა მოიყვანეს ისინი, დააყენეს საკრებულოს წინაშე და ჰკითხა მათ მღვდელმთავარმა

²⁸და უთხრა: განა ბრძანებით არ გიბრძანეთ თქვენ, აღარ გესწავლებინათ ამ სახელით?! და აჰა, აგივსიათ იერუსალიმი თქვენი მოძღვრებით და გინდათ, მოაწიოთ ჩვენზე სისხლი ამ კაცისა.

²⁹ხოლო მიუგო პეტრემ, და მოციქულებმა და უთხრეს: მორჩილება ღვთისა უფრო გვმართებს, ვიდრე კაცთა.

³⁰ჩვენი მამების ღმერთმა აღადგინა იესო, რომელიც თქვენ ძელზე დაკიდეთ და მოკალით.

³¹იგი ღმერთმა წინამძღვრად და მაცხოვრად აამაღლა თავისი მარჯვენით, რათა მიეცა ისრაელისთვის სინანული და ცოდვათა მიტევება.

³²და ამ სიტყვებით ჩვენ ვართ მისი მოწმენი და სულიწმიდა, რომელიც უბოძა ღმერთმა თავის მორჩილებს.

³³ხოლო ისინი, როცა გაიგონეს ეს, გულზე სკდებოდნენ და უნდოდათ მათი დახოცვა.

³⁴და ადგა საკრებულოში ერთი ფარისეველი, სახელად გამალიელი, სჯულისმოძღვარი, პატივცემული მთელ ერში, და ბრძანა, მცირე ხნით გარეთ გაეყვანათ მოციქულები,

³⁵და უთხრა მათ: კაცნო ისრაელელნო, ფრთხილად იყავით თქვენ ამ ადამიანებთან; რა გინდათ, რომ უყოთ?

³⁶რადგან რამდენიმე ხნის წინ აღდგა თევდა და ამბობდა თავის თავზე, რომ დიდი ვინმეა, და მას რიცხვით ოთხასამდე კაცი მიემხრო; იგი მოკლეს და ყველა, ვინც მას ემორჩილებოდა, გაიფანტა და აღარ არის.

³⁷ამის შემდეგ აღდგა იუდა გალილეველი აღწერის დღეებში და თან გაიყოლა დიდძალი ხალხი; ისიც დაიღუპა და ყველა, ვინც მას ემორჩილებოდა, გაიფანტა.

³⁸და ახლა გეუბნებით თქვენ: დაეხსენით ამ კაცებს და გაუშვით ისინი, რადგან, თუ კაცთაგან არის ეს განზრახვა ან ეს საქმე, ჩაიშლება,

³⁹ხოლო თუ ღვთისაგან არის, ვერ შეძლებთ მის ჩაშლას და ვაითუ ღვთისმბრძოლნიც აღმოჩნდეთ.

⁴⁰ხოლო ისინი დაემორჩილნენ მას და მოუხმეს მოციქულებს, სცემეს და უბრძანეს, რომ აღარ ელაპარაკათ იესოს სახელის შესახებ, და გაუშვეს,

⁴¹ხოლო ისინი მიდიოდნენ გახარებულები საკრებულოდან, რადგან ღირსი გახდნენ მისი სახელის გამო შეურაცხყოფისა;

⁴²და ყოველდღე ტაძარში და სახლებში დაუცხრომლად მოძღვრავდნენ და ახარებდნენ იესო ქრისტეს.