Read ახალი აღთქმა მოციქულთა საქმენი 6 Bible Online

მოციქულთა საქმენი 6 - ახალი აღთქმა bible

მოციქულთა საქმენი 6

¹იმ დღეებში, როდესაც გამრავლდნენ მოწაფეები, დრტვინავდნენ ელინისტები ებრაელებზე, რადგან უგულებელყოფილნი იყვნენ მათი ქვრივები ყოველდღიური მომსახურებისას.

²მაშინ თორმეტმა მოუხმო მოწაფეთა სიმრავლეს და უთხრა: არ არის კარგი ჩვენთვის ღვთის სიტყვის დატოვება და ტაბლების მსახურება;

³ამიტომ გამოარჩიეთ, ძმებო, თქვენგან სარწმუნო კაცები, შვიდნი, სავსე სულიწმიდითა და სიბრძნით, რომელთაც დავადგენთ ამ საქმიანობისთვის,

⁴ხოლო ჩვენ ლოცვასა და სიტყვის მსახურებაში ვიქნებით გამუდმებით.

⁵და მოსაწონი აღმოჩნდა ეს სიტყვა მთელი სიმრავლისთვის და გამოარჩიეს სტეფანე, კაცი აღსავსე რწმენითა და სულიწმიდით, და ფილიპე და პროხორე და ნიკანორი და ტიმონი და პარმენი და ნიკოლოზი, ანტიოქიელი პროზელიტი;

⁶და დააყენეს მოციქულთა წინაშე და ილოცეს და ხელი დაასხეს მათ.

⁷და სიტყვა ღვთისა აღორძინდებოდა და ძლიერ მრავლდებოდა მოწაფეთა რიცხვი იერუსალიმში და იუდეველ მღვდელთაგან ბევრი ემორჩილებოდა რწმენას

⁸ხოლო სტეფანე, სავსე მადლითა და ძალით, აღასრულებდა დიდ სასწაულებსა და ნიშნებს ხალხში.

⁹ადგნენ ზოგიერთები შესაკრებლიდან, რომელსაც ეწოდება ლიბერტინელთა, კირენელთა და ალექსანდრიელთა, და ასევე, რომლებიც იყვნენ კილიკიიდან და ასიიდან, და ეკამათებოდნენ სტეფანეს,

¹⁰და ვერ შეძლეს, წინ აღდგომოდნენ სიბრძნეს და სულს, რომლითაც მეტყველებდა იგი.

¹¹მაშინ წააქეზეს ვიღაც კაცები, რომლებიც ამბობდნენ: გავიგონეთ მის მიერ ნათქვამი გმობის სიტყვები მოსეზე და ღმერთზე;

¹²და აღძრეს ხალხი, უხუცესები და მწიგნობრები და მიადგნენ და შეიპყრეს იგი და წაიყვანეს საკრებულოში.

¹³და წარადგინეს ცრუ მოწმეები, რომლებმაც თქვეს: ეს კაცი განუწყვეტლივ ამბობს გმობის სიტყვებს ამ წმიდა ადგილსა და სჯულზე,

¹⁴რადგან გავიგონეთ, რომ იგი ამბობდა: ეს იესო ნაზორეველი დაანგრევს ამ ადგილს და შეცვლის წეს-ჩვეულებებს, რომლებიც გადმოგვცა ჩვენ მოსემ.

¹⁵და შეხედა მას ყველამ, ვინც იჯდა საკრებულოში, და იხილეს მისი პირი, როგორც პირი ანგელოზისა.