Read ახალი აღთქმა მოციქულთა საქმენი 8 Bible Online

მოციქულთა საქმენი 8 - ახალი აღთქმა bible

მოციქულთა საქმენი 8

¹ხოლო სავლე იწონებდა მის მკვლელობას. და იყო იმ დღეს დიდი დევნა ეკლესიისა იერუსალიმში; და ყველა, მოციქულების გარდა, გაიფანტა ჰურიასტანისა და სამარიის სოფლებში.

²და დაკრძალეს სტეფანე ღვთისმოშიშმა კაცებმა და გამართეს დიდი გლოვა მასზე.

³სავლე კი არბევდა ეკლესიას, სახლებში შედიოდა და თრევით გამოჰყავდა მამაკაცები და დედაკაცები და მიჰყავდა საპყრობილეში.

⁴და რომლებიც გაიფანტნენ, დადიოდნენ და ახარებდნენ სიტყვას.

⁵ხოლო ფილიპე ჩავიდა სამარიის ქალაქში და უქადაგებდა მათ ქრისტეს.

⁶და ხალხი ერთსულოვნად ყურად იღებდა ფილიპეს ნათქვამს, როცა უსმენდა მას, და ხედავდა სასწაულებს, რომლებსაც აღასრულებდა,

⁷რადგან მრავალთაგან, ვისთანაც იყვნენ არაწმინდა სულები, ხმამაღალი ყვირილით გამოდიოდნენ და მრავალი დავრდომილი და კოჭლი იკურნებოდა.

⁸და იყო დიდი სიხარული იმ ქალაქში.

⁹იყო ვიღაც კაცი, სახელად სიმონი, რომელიც მანამდე ქალაქში გრძნეულობდა და ხიბლავდა სამარიელ ხალხს და ამბობდა საკუთარ თავზე, რომ დიდი ვინმეა,

¹⁰რომლისაც სჯეროდა ყველას, პატარიდან დიდამდე, და ამბობდნენ: ეს არის ღვთის დიდი ძალა.

¹¹და სჯეროდათ მისი იმის გამო, რომ დიდი ხანია, გრძნეულებით ხიბლავდა მათ.

¹²ხოლო როცა ირწმუნეს ფილიპესი, რომელიც ახარებდა ღვთის სასუფევლისა და იესო ქრისტეს სახელის შესახებ, ნათელს იღებდნენ მამაკაცებიც და დედაკაცებიც.

¹³და თვითონ სიმონმაც ირწმუნა და ნათელიღო და იყო გამუდმებით ფილიპესთან და ხედავდა სასწაულებსა და დიდ ძალებს, რომლებიც აღესრულებოდა, და გაოცებული იყო.

¹⁴გაიგეს იერუსალიმში მყოფმა მოციქულებმა, რომ მიიღო სამარიამ ღვთის სიტყვა, და გაგზავნეს მათთან პეტრე და იოანე,

¹⁵რომლებიც ჩავიდნენ და ილოცეს მათთვის, რათა მიეღოთ სულიწმიდა,

¹⁶რადგან ჯერ არ იყო არც ერთ მათგანზე გადმოსული, არამედ მხოლოდ განბანილნი იყვნენ უფალი იესოს სახელით.

¹⁷მაშინ დაადეს მათ ხელი, და მიიღეს სულიწმიდა.

¹⁸და როცა ნახა სიმონმა, რომ მოციქულთა ხელის დადებით ეძლეოდათ სულიწმიდა, მიუტანა მათ ფული

¹⁹და უთხრა: მომეცით მეც ეს ძალაუფლება, რათა, ვისაც დავადებ ხელს, მიიღოს სულიწმიდა.

²⁰ხოლო პეტრემ უთხრა მას: შენი ვერცხლი შენთან იყოს წარსაწყმედად, რადგან გეგონა, ღვთის საბოძვარს ფულით მოიპოვებდი.

²¹არა გაქვს შენ ნაწილი, არც წილი ამ სიტყვაში, რადგან შენი გული არ არის წრფელი ღვთის წინაშე.

²²ამიტომ შეინანე ეს შენი უკეთურება და ევედრე უფალს, იქნებ მოგეტევოს შენი გულის ზრახვა,

²³რადგან ნაღვლის სიმწარეში და სიცრუესთან შეკრულს გხედავ შენ.

²⁴ხოლო სიმონმა მიუგო და უთხრა: ევედრეთ თქვენ ჩემთვის უფალს, რათა არაფერი მოიწიოს ჩემზე, რაც თქვენ თქვით.

²⁵ხოლო მათ დაამოწმეს და იქადაგეს უფლის სიტყვა და როცა ბრუნდებოდნენ იერუსალიმში, სამარიელთა მრავალ დაბას ახარებდნენ.

²⁶და ანგელოზი უფლისა ეუბნებოდა ფილიპეს და უთხრა: ადექი და წადი სამხრეთით, გზით, რომელიც ჩადის იერუსალიმიდან ღაზაში. იგი უდაბურია.

²⁷და ადგა და წავიდა. და აჰა, კაცი ეთიოპიელი, საჭურისი, ეთიოპიელთა დედოფლის, კანდაკეს, დიდებული, რომელიც განაგებდა მთელ მის საგანძურს, მოსული იყო იერუსალიმში;

²⁸ხოლო როდესაც ბრუნდებოდა და იჯდა თავის ეტლში, კითხულობდა ესაია წინასწარმეტყველს.

²⁹და უთხრა სულიწმიდამ ფილიპეს: მიდი და მიუახლოვდი ამ ეტლს.

³⁰და მიირბინა ფილიპემ და გაიგონა, რომ იგი კითხულობდა ესაია წინასწარმეტყველს და უთხრა: გესმის კი, რასაც კითხულობ?

³¹ხოლო მან უთხრა: როგორ შევძლებ გაგებას, თუ ვინმე არ მიხელმძღვანელებს? — და შეევედრა ფილიპეს, ასულიყო და დამჯდარიყო მასთან.

³²ხოლო ადგილი წერილისა, რომელსაც კითხულობდა, იყო ეს: როგორც ცხვარი დასაკლავად იქნა მიყვანილი და როგორც ტარიგი თავისი მპარსველის წინაშე უხმოდ არის, ასევე არ აღებს პირს.

³³თავისი სიმდაბლის გამო წაერთვა მას თავისი სამართალი, ხოლო მის მოდგმაზე ვინ მოგვითხრობს? რადგან აღიხოცა ქვეყნიდან მისი სიცოცხლე (ეს.53,7-8).

³⁴მიუგო საჭურისმა ფილიპეს და უთხრა: გევედრები შენ, ვისზე ამბობს წინასწარმეტყველი ამას, თავის თავზე თუ სხვა ვინმეზე?

³⁵და გახსნა ფილიპემ პირი და დაუწყო მას ამ წერილიდან ხარება იესოს შესახებ.

³⁶ხოლო როცა მიდიოდნენ გზაზე, მიადგნენ ერთ წყალს და უთხრა საჭურისმა: აჰა, წყალი, რაღა მაბრკოლებს მე, რომ ნათელვიღო?

³⁷და უთხრა ფილიპემ: თუ გწამს მთელი შენი გულით, მართებულია. მიუგო და უთხრა: მწამს, რომ იესო ქრისტე არის ძე ღვთისა.

³⁸და უბრძანა, გაეჩერებინათ ეტლი, და ჩავიდა ორივე წყალში, ფილიპეც და საჭურისიც, და ნათელი სცა მას.

³⁹და როცა ამოვიდნენ წყლიდან, სულიწმიდა გადმოვიდა საჭურისზე და უფლის ანგელოზმა წარიტაცა ფილიპე და ვეღარ იხილა იგი საჭურისმა და წავიდა თავის გზაზე გახარებული.

⁴⁰ხოლო ფილიპე აღმოჩნდა აზოტში და მიდიოდა და ახარებდა ყველა ქალაქს, ვიდრე მივიდოდა კესარიაში.