Read ახალი აღთქმა მოციქულთა საქმენი 9 Bible Online

მოციქულთა საქმენი 9 - ახალი აღთქმა bible

მოციქულთა საქმენი 9

¹ხოლო სავლე, კვლავ აღსავსე მუქარით და უფლის მოწაფეთა დახოცვის სურვილით, მივიდა მღვდელმთავართან

²და ითხოვა მისგან წერილები დამასკოს შესაკრებელთა მიმართ, რათა, თუ ვინმეს ნახავდა ამ გზის მიმდევარს, მამაკაცს ან დედაკაცს, შეკრული მოეყვანა იერუსალიმში.

³ხოლო როცა მიდიოდა იგი და მიუახლოვდა დამასკოს, უეცრად მის გარშემო გაბრწყინდა ნათელი ზეციდან,

⁴და დაეცა მიწაზე და გაიგონა ხმა, რომელმაც უთხრა მას: სავლე, სავლე, რად მდევნი მე? ძნელია შენთვის, დეზს წიხლი ჰკრა,

⁵ხოლო მან უთხრა: შენ ვინ ხარ, უფალო? და უფალმა უთხრა: მე ვარ იესო, რომელსაც შენ მდევნი;

⁶არამედ ადექი და შედი ქალაქში და გეტყვიან შენ, რაც უნდა გააკეთო.

⁷ხოლო მისი თანამგზავრი კაცები ენაჩავარდნილები იდგნენ, ესმოდათ ხმა, მაგრამ ვერაფერს ხედავდნენ;

⁸ადგა სავლე მიწიდან, თვალები გახელილი ჰქონდა და ვერაფერს ხედავდა; და მოჰკიდეს ხელი მას და შეიყვანეს დამასკოში,

⁹და სამი დღე ვერ ხედავდა და არც ჭამდა და არც სვამდა.

¹⁰ხოლო იყო ერთი მოწაფე დამასკოში, სახელად ანანია, და უთხრა მას უფალმა ხილვაში: ანანია! და მან უთხრა: აჰა მე, უფალო.

¹¹უთხრა მას უფალმა: ადექი და მიდი ქუჩაზე, რომელსაც ეწოდება სწორი, და მოძებნე იუდას სახლში სავლე სახელად, ტარსელი, რადგან აჰა, ლოცულობს.

¹²და იხილა მან ხილვაში კაცი, სახელად ანანია, რომელიც შევიდა და დაადო მას ხელი, რათა ახილვოდა თვალები.

¹³და მიუგო ანანიამ: უფალო, მრავალთაგან გამიგია ამ კაცის შესახებ, რამდენი ბოროტება გაუკეთა შენს წმიდანებს იერუსალიმში.

¹⁴და აქაც აქვს ძალაუფლება მღვდელმთავართაგან, რომ შეიპყროს ყველა, ვინც უხმობს შენს სახელს.

¹⁵და უთხრა მას უფალმა: წადი, რადგან ჩემთვის რჩეული ჭურჭელია იგი, რათა აღამაღლოს ჩემი სახელი წარმართთა, მეფეთა და ისრაელის ძეთა წინაშე;

¹⁶ხოლო მე ვუჩვენებ მას, რამდენი უნდა ევნოს მას ჩემი სახელის გამო.

¹⁷და წავიდა ანანია და შევიდა სახლში და დაადო მას ხელი და უთხრა: სავლე, ძმაო, უფალმა მომავლინა მე, იესომ, რომელიც გეჩვენა შენ გზაზე, რომლითაც მოდიოდი, რათა აგეხილოს თვალები და აღივსო სულიწმიდით.

¹⁸და მყისვე მოსცილდა მას თვალებიდან რაღაც ქერცლივით და აეხილა მაშინვე და ადგა და ნათელიღო;

¹⁹და მიიღო საზრდო და მოძლიერდა. და იყო დამასკოში მყოფ მოწაფეებთან რამდენიმე დღე.

²⁰და მაშინვე იქადაგა შესაკრებლებში იესოს შესახებ, რომ იგი არის ძე ღვთისა.

²¹და გაოგნებული იყო ყველა, ვისაც ესმოდა, და ამბობდნენ: განა ეს არ არის, ვინც დევნიდა იერუსალიმში იმათ, ვინც უხმობდა იესოს სახელს, და აქაც იმისთვის არ იყო მოსული, რომ ისინი შეპყრობილნი მიეყვანა მღვდელმთავრებთან?

²²ხოლო სავლე უფრო ძლიერდებოდა და საგონებელში ყრიდა დამასკოში მკვიდრ იუდეველებს, არწმუნებდა რა, რომ ეს არის ქრისტე.

²³როცა გავიდა მრავალი დღე, განიზრახეს იუდეველებმა მისი მოკვლა.

²⁴და ცნობილი გახდა სავლესთვის მათი შეთქმულება, ხოლო ისინი სდარაჯობდნენ კარიბჭეებს დღე და ღამე, რათა მოეკლათ იგი.

²⁵და მიიყვანეს იგი მოწაფეებმა ღამით და გალავნიდან ჩაუშვეს გოდრით.

²⁶და როდესაც მივიდა სავლე იერუსალიმში, ცდილობდა, შეერთებოდა მოწაფეებს და ყველას ეშინოდა მისი, რადგან არ სჯეროდათ, რომ მოწაფე იყო.

²⁷ხოლო ბარნაბამ წამოიყვანა იგი და მიიყვანა მოციქულებთან და უამბო მათ, თუ როგორ იხილა გზაზე უფალი და რომ ესაუბრა მას და როგორ ქადაგებდა განცხადებულად დამასკოში იესოს სახელით.

²⁸და იყო მათთან ერთად და შედიოდა და გამოდიოდა იერუსალიმში და განცხადებულად ქადაგებდა უფალი იესოს სახელით,

²⁹და ესაუბრებოდა და ეკამათებოდა ელინისტებს, ხოლო მათ დააპირეს მისი მოკვლა.

³⁰და როცა გაიგეს ძმებმა, ჩაიყვანეს იგი კესარიაში და გაგზავნეს ტარსში.

³¹ხოლო ეკლესიები მთელ ჰურიასტანში და გალილეაში და სამარიაში იყვნენ მშვიდობით და აღორძინდებოდნენ და წარიმართებოდნენ უფლის შიშით და სულიწმიდის ნუგეშისცემით მრავლდებოდნენ.

³²და იყო, პეტრე მიმოდიოდა რა ყველგან, ჩავიდა იმ წმიდანებთანაც, რომლებიც მკვიდრობდნენ ლიდაში;

³³და ნახა იქ ვიღაც კაცი, სახელად ენეა, რომელიც რვა წლიდან ლოგინად იყო ჩავარდნილი, რადგან იყო დავრდომილი.

³⁴და უთხრა მას პეტრემ: ენეა, გკურნავს შენ იესო ქრისტე; ადექი და აალაგე საწოლი შენ თვითონ! — და მაშინვე ადგა.

³⁵და იხილა იგი ლიდისა და სარონის ყოველმა მკვიდრმა, ვინც მოიქცა უფლისკენ.

³⁶ხოლო იოპეში იყო ერთი მოწაფე, სახელად ტაბითა, რაც თარგმანით ნიშნავს ქურციკს. იგი აღსავსე იყო კეთილი საქმეებით და მოწყალებას გასცემდა;

³⁷და იყო, იმ დღეებში დასნეულდა იგი და მოკვდა; და განბანეს და დაასვენეს ზედა ოთახში.

³⁸რადგან ახლოს არის ლიდა იოპესთან, გაიგეს მოწაფეებმა, რომ პეტრე იქ იყო, და გაგზავნეს მასთან ორი კაცი და შეევედრნენ: ნუ დააყოვნებ ჩვენამდე მოსვლას.

³⁹და ადგა პეტრე და წავიდა მათთან; როცა იგი მივიდა, აიყვანეს ზედა ოთახში და გარშემოეხვია მას ყველა ქვრივი, ტიროდნენ და უჩვენებდნენ კვართებს და სამოსლებს, რასაც ქურციკი ამზადებდა, ვიდრე მათთან იმყოფებოდა.

⁴⁰ხოლო პეტრემ გაიყვანა გარეთ ყველა და მოიყარა მუხლი, ილოცა და მიუბრუნდა გვამს და უთხრა: ტაბითა, ადექი! ხოლო მან გაახილა თვალები, იხილა პეტრე და წამოჯდა.

⁴¹და გაუწოდა მას ხელი და ააყენა იგი, მოუხმო წმიდანებს და ქვრივებს და წარუდგინა იგი ცოცხალი.

⁴²და ცნობილი გახდა ეს მთელი იოპესთვის და მრავალმა ირწმუნა უფალი.

⁴³და იყო, მრავალი დღე დარჩა იგი იოპეში ვინმე სიმონ მეტყავესთან.