Read ახალი აღთქმა ეპისტოლე წმიდა იაკობ მოციქულისა 1 Bible Online

ეპისტოლე წმიდა იაკობ მოციქულისა 1 - ახალი აღთქმა bible

ეპისტოლე წმიდა იაკობ მოციქულისა 1

¹იაკობი, ღვთისა და უფლის იესო ქრისტეს, მონა, თორმეტ ტომს, განთესილს — გიხაროდეთ.

²ყოველივე სიხარულად მიიჩნიეთ, ჩემო ძმებო, როცა სხვადასხვაგვარ განსაცდელში ჩაცვივდებით.

³იცოდეთ, რომ თქვენი რწმენის გამოცდა ქმნის მოთმინებას,

⁴ხოლო მოთმინებას სრულყოფილი საქმე ახლდეს, რათა იყოთ სრულყოფილნი და უზადონი, არაფრით ნაკლულევანნი.

⁵ხოლო თუ რომელიმე თქვენგანს აკლია სიბრძნე, ითხოვოს ღვთისაგან, რომელიც აძლევს ყველას უპირობოდ და არ აყვედრის, და მიეცემა მას.

⁶და ითხოვოს რწმენით და ნურაფერი დააეჭვებს, რადგან, ვინც დაეჭვდება, მსგავსია ზღვის ღელვისა, ქარით აღძრულისა და მიმოტაცებულისა.

⁷არ ეგონოს იმ კაცს, რომ რამეს მიიღებს ღვთისაგან.

⁸კაცი ორგული მერყევია თავის ყველა გზაზე.

⁹იქადდეს დამდაბლებული ძმა თავისი სიმაღლით,

¹⁰ხოლო მდიდარი — თავისი სიმდაბლით, რადგან როგორც ბალახის ყვავილი წარმავალია;

¹¹რადგან ამოვიდა მზე მცხუნვარებით და გაახმო ბალახი და დასცვივდა მას ყვავილი და მისი პირის მშვენიერება განქარდა; ასევე მდიდარიც თავის სარბიელზე დაჭკნება.

¹²ნეტარია კაცი, რომელიც ითმენს განსაცდელს, რადგან გამოცდილი მიიღებს ცხოვრების გვირგვინს, რომელიც აღუთქვა ღმერთმა თავის მოყვარეებს.

¹³ნურავინ იტყვის განსაცდელისას: ღვთისგან გამოვიცდები, რადგან ღმერთი არ გამოიცდება ბოროტისგან და არავის გამოსცდის იგი,

¹⁴არამედ თითოეული გამოიცდება საკუთარი გულისთქმისგან, წარიტაცება რა და ცდუნდება.

¹⁵შემდეგ გულისთქმა ჩასახავს და შობს ცოდვას, ხოლო აღსრულებული ცოდვა შობს სიკვდილს.

¹⁶ნუ ცდებით, ჩემო საყვარელო ძმებო.

¹⁷ყოველი მოცემული კეთილი და ყოველი სრულყოფილი საბოძვარი ზეგარდამო არის გარდამოსული ნათელთა მამისაგან, რომელთანაც არ არის ცვალებადობა ან ცვლილების აჩრდილი.

¹⁸ინება და გვშვა ჩვენ ჭეშმარიტების სიტყვით, რათა ვიყოთ ჩვენ რაიმე პირველნაყოფი მის ქმნილებათაგან.

¹⁹ასე რომ, ჩემო საყვარელო ძმებო, იყოს ყოველი კაცი მოსწრაფე სმენისას, თავშეკავებული საუბრისას, თავშეკავებული გულისწყრომისას,

²⁰რადგან კაცის გულისწყრომა არ აღასრულებს ღვთის სამართალს.

²¹ამიტომ მოიშორეთ ყოველგვარი სიბილწე და ნასახი უკეთურებისა და სიმშვიდით მიიღეთ ნერგი სიტყვისა, რომელსაც შეუძლია თქვენი სულების ცხონება.

²²და იყავით აღმსრულებელნი სიტყვისა და არა მხოლოდ მსმენელნი, მაცდუნებელნი საკუთარი თავისა,

²³რადგან თუ ვინმე მსმენელია სიტყვისა და არა აღმსრულებელი, იგი მსგავსია კაცისა, რომელიც სარკეში აკვირდება თავის სახეს, რომელიც ნაბოძები აქვს დაბადებიდან;

²⁴რადგან დააკვირდა საკუთარ თავს და წავიდა და მყისვე დაავიწყდა, როგორი იყო.

²⁵ხოლო ვინც ჩასწვდა თავისუფლების სრულყოფილ სჯულს და შეუდგა მას, იგი არის არა მსმენელი და დამვიწყებელი, არამედ აღმსრულებელი საქმისა; იგი ნეტარი იქნება თავის საქმიანობაში.

²⁶თუ ვინმეს ჰგონია თქვენ შორის, რომ კეთილმსახურია, და აღვირს არ ამოსდებს თავის ენას, არამედ აცდუნებს თავის გულს, ამაოა მისი მსახურება.

²⁷წმინდა და უბიწო მსახურება ღვთისა და მამის წინაშე — ეს არის: მიხედვა ობოლთა და ქვრივთა მათ გასაჭირში და უმანკოდ დაცვა თავისა ამ სოფლისგან.