Read ახალი აღთქმა ეპისტოლე წმიდა იაკობ მოციქულისა 2 Bible Online

ეპისტოლე წმიდა იაკობ მოციქულისა 2 - ახალი აღთქმა bible

ეპისტოლე წმიდა იაკობ მოციქულისა 2

¹ჩემო ძმებო, მიკერძოებით ნუ გაქვთ რწმენა ჩვენი უფლის, იესო ქრისტეს, დიდებისა;

²რადგან თუ შევა თქვენს შესაკრებელში კაცი ოქროს ბეჭდით და ბრწყინვალე სამოსით და შევა გლახაკიც შელახული სამოსით

³და შეხედავთ ბრწყინვალე სამოსით შემოსილს და ეტყვით მას: შენ დაჯექი აქ კარგად. — და გლახაკს ეტყვით: შენ დადექი იქ ან დაჯექი აქ, ჩემ ფეხთით. —

⁴განა არ განასხვავეთ თქვენს თავში და არ გახდით მსაჯულები ბოროტი გულისზრახვებით?

⁵ისმინეთ, ჩემო საყვარელო ძმებო: განა ღმერთმა არ გამოირჩია გლახაკნი ამ სოფლისა, მდიდარნი რწმენით და მემკვიდრენი სასუფევლისა, რომელიც აღუთქვა თავის მოყვარეებს?

⁶ხოლო თქვენ შეურაცხყავით გლახაკი. განა მდიდრები არ მძლავრობენ თქვენზე და არ მიგათრევენ თქვენ სამსჯავროში?

⁷განა ისინი არ გმობენ კეთილ სახელს, რომლითაც იწოდებით თქვენ?

⁸თუკი წერილის მიხედვით: შეიყვარე მოყვასი შენი, როგორც თავი შენი. — აღასრულებთ სამეუფო სჯულს, კარგად იქცევით;

⁹ხოლო თუ მიკერძოებულნი ხართ, ცოდვას ჩადიხართ, და იმხილებით სჯულით, როგორც მისი დამრღვევნი;

¹⁰რადგან ვინც მთელ სჯულს დაიცავს და ერთით შესცოდავს, იქნება ყველაფერში დამნაშავე;

¹¹რადგან ვინც თქვა: ნუ იმრუშებ. — მანვე თქვა: ნუ მოკლავ — ხოლო თუ არ იმრუშებ და მოკლავ, იქნები დამრღვევი სჯულისა.

¹²ისე თქვით და ისე აკეთეთ, როგორც თავისუფლების სჯულით განსასჯელებმა,

¹³რადგან მსჯავრი უმოწყალოა მათთვის, ვინც არ იქმს წყალობას. აღმატებულია წყალობა მსჯავრზე.

¹⁴რა სარგებელია, ჩემო ძმებო, თუ ვინმე იტყვის: რწმენა მაქვს. — ხოლო საქმეები არ ექნება? განა შეუძლია რწმენას მისი ცხონება?

¹⁵ხოლო თუ ძმა ან და შიშველი იქნება და დღიურ საზრდო ეკლდება

¹⁶და ეტყვის მათ რომელიმე თქვენგანი: წადით მშვიდობით, გათბით და გაძეხით. — და არ მისცემს მათ, რაც საჭიროა სხეულისთვის, რა სარგებელი იქნება?

¹⁷ასევე რწმენაც, თუ საქმეები არ ექნება, მკვდარია თავისთავად.

¹⁸მაგრამ თუ იტყვის ვინმე: შენ რწმენა გაქვს და მე საქმეები მაქვს; — მიჩვენე მე შენი რწმენა შენი საქმეების გარეშე და მე გიჩვენებ შენ ჩემი საქმეებით ჩემს რწმენას.

¹⁹შენ გწამს, რომ ერთია ღმერთი, კარგს აკეთებ. ეშმაკებსაც სწამთ და ძრწიან.

²⁰გინდა, იცოდე, ჰოი, ამაო კაცო, რომ რწმენა საქმეთა გარეშე მკვდარია?

²¹აბრაამი, ჩვენი მამა, განა საქმეებით არ გამართლდა, შესწირა რა ისააკი, თავისი ძე, სამსხვერპლოზე?

²²ხედავ, რომ რწმენა შეეწია მის საქმეებს და საქმეებით რწმენა სრულყოფილი იქნა.

²³და აღსრულდა წერილი, რომელიც ამბობს: ირწმუნა აბრაამმა ღვთისა და შეერაცხა მას სიმართლედ (დაბ.15,6). — და ღვთის მეგობარი ეწოდა.

²⁴ხედავთ, რომ საქმეებით მართლდება კაცი და არა მხოლოდ რწმენით?!

²⁵ასევე რააბ მეძავიც, განა საქმეებით არ გამართლდა, როცა მიიღო მსტოვრები და სხვა გზით გაუშვა?

²⁶რადგან როგორც სხეული სულის გარეშე მკვდარია, ასევე რწმენაც საქმეების გარეშე მკვდარია.