Read ახალი აღთქმა ეპისტოლე წმიდა იაკობ მოციქულისა 3 Bible Online

ეპისტოლე წმიდა იაკობ მოციქულისა 3 - ახალი აღთქმა bible

ეპისტოლე წმიდა იაკობ მოციქულისა 3

¹მრავალნი ნუ მოძღვრავთ, ჩემო ძმებო, იცოდეთ, რომ უფრო დიდ სასჯელს მივიღებთ,

²რადგან ფრიად ვცდებით ყოველნი. ვინც სიტყვით არ ცდება, იგი სრულყოფილი კაცია, შეუძლია მთელ სხეულსაც ამოსდოს აღვირი.

³თუ ცხენს აღვირს ამოვდებთ პირში, რათა დავიმორჩილოთ იგი, მთელ მის სხეულსაც მოვაბრუნებთ.

⁴აჰა, გემებიც, დიდ-დიდნი და ძლიერი ქართაგან მიმოტაცებულნი, მიბრუნდებიან მცირე საჭით, საითაც მის წარმმართველს სურს წასვლა.

⁵ასევე ენაც მცირე ასოა და დიდად ქედმაღლობს. აჰა, მცირედი ცეცხლი რამდენად ბევრ ნივთიერებას ეკიდება.

⁶და ენაც ცეცხლია, სამკაული სიცრუისა. ენა ისეთია ჩვენს ასოთა შორის, რომ შეაგინებს მთელ სხეულს და აღაგზნებს ცხოვრების ბორბალს და აღგზნებულია გეენისგან,

⁷რადგან ყოველგვარი ბუნება მხეცთა და ფრინველთა, ქვეწარმავალთა და ზღვის ცხოველთა თვინიერდება და მოთვინიერებულია კაცობრივი ბუნების მიერ,

⁸ხოლო მოთვინიერება ენისა არავის ძალუძს კაცთაგან, დაუდგრომელი ბოროტია, სავსე მომაკვდინებელი გესლით.

⁹ამით ვაკურთხებთ ღმერთსა და მამას და ამით ვწყევლით ადამიანებს, რომლებიც ღვთის მსგავსად არიან შექმნილნი.

¹⁰ერთი და იმავე პირიდან გამოდის კურთხევა და წყევლა. არ ეგების, ჩემო საყვარელო ძმებო, ეს რომ ასე იყოს.

¹¹ნუთუ წყაროს ერთი და იმავე თვალიდან გამოდის ტკბილი და მწარე?

¹²ნუთუ შეუძლია, ჩემო ძმებო, ლეღვის ხეს ზეთისხილი მოისხას ან ვაზს — ლეღვი? ასევე ვერცერთი წყარო ვერ გადმოადენს მლაშე და ტკბილ წყალს.

¹³ვინც არის ბრძენი და მცოდნე თქვენ შორის, სიბრძნის სიმშვიდით კეთილი ცხოვრების წესით აჩვენოს თავისი საქმეები.

¹⁴ხოლო თუ მწარე შური გაქვთ და შუღლი თქვენს გულში, ნუ იქადით და ნუ ცრუობთ ჭეშმარიტების მიმართ.

¹⁵არ არის ეს სიბრძნე ზეგარდამოსული, არამედ ამქვეყნიური, ფშვინვიერი და ეშმაკეული;

¹⁶რადგან სადაც არის შური და შუღლი, იქ არის შფოთი და ყოველგვარი უჯერო საქმე.

¹⁷ხოლო ზეგარდამო სიბრძნე, უწინარეს ყოვლისა, არის უბიწო, შემდეგ მშვიდი, სახიერი, მორჩილი, სავსე წყალობით და კეთილ საქმეთა ნაყოფით, მიუკერძოებელი და შეუორგულებელი.

¹⁸ხოლო ნაყოფი სიმართლისა სიმშვიდით ითესება მშვიდობისმყოფელთათვის.