Read ახალი აღთქმა ეპისტოლე წმიდა იაკობ მოციქულისა 4 Bible Online

ეპისტოლე წმიდა იაკობ მოციქულისა 4 - ახალი აღთქმა bible

ეპისტოლე წმიდა იაკობ მოციქულისა 4

¹საიდან არის ბრძოლა და დავა თქვენ შორის? განა არა იქიდან, თქვენი გულისთქმებიდან, რომლებიც იბრძვიან თქვენი სხეულის ასოებში?

²გწადიათ და არა გაქვთ; კლავთ და გშურთ და არ შეგიძლიათ მიღწევა; დავობთ და იბრძვით და არა გაქვთ, რადგან არ ითხოვთ თქვენ;

³ითხოვთ და ვერ იღებთ, რადგან ცუდად ითხოვთ, რათა თქვენს სიამოვნებებში დახარჯოთ.

⁴მრუშნო და მეძავნო, არ იცით, რომ ამ სოფლის სიყვარული მტრობაა ღვთისა? ამიტომ ვისაც სწადია, მეგობარი იყოს ამ სოფლისა, ღვთის მტერი ხდება.

⁵ნუთუ გგონიათ, რომ ამაოდ ამბობს წერილი: მოშურნეობით სურს სულს ღმერთი, რომელმაც დაამკვიდრა იგი ჩვენში

⁶და აძლევს მეტ მადლს; ამიტომ ამბობს: ღმერთი ამპარტავანთ წინ აღუდგება, ხოლო მდაბალთ აძლევს მადლს (იგავ.3,34).

⁷ამიტომ დაემორჩილეთ ღმერთს, წინ აღუდექით ეშმაკს და გაიქცევა თქვენგან;

⁸მიუახლოვდით ღმერთს და მოგიახლოვდებათ თქვენ. განიწმინდეთ ხელები, ცოდვილნო, და უბიწოყავთ გულები, ორგულნო.

⁹დამწუხრდით და იგლოვეთ და იტირეთ; თქვენი სიცილი გლოვად გადაიქცეს და სიხარული მწუხარებად.

¹⁰დამდაბლდით უფლის წინაშე და აგამაღლებთ თქვენ.

¹¹ავს ნუ ამბობთ ერთმანეთზე, ძმებო. ვინც ავს ამბობს ძმაზე და განიკითხავს თავის ძმას, ავს ამბობს სჯულზე და განიკითხავს სჯულს. თუ სჯულს განიკითხავ, არა ხარ აღმსრულებელი სჯულისა, არამედ განმკითხველი.

¹²ერთია სჯულმდებელი და განმკითხველი, რომელსაც შეუძლია ცხონება და წარწყმედა; ხოლო შენ ვინ ხარ, რომელიც განიკითხავ მოყვასს?

¹³და ახლა ვინც ამბობთ: დღეს ან ხვალ წავალთ ამა და ამ ქალაქში და დავყოფთ იქ ერთ წელიწადს და ვივაჭრებთ და მოგებას მივიღებთ, —

¹⁴რომლებმაც არაფერი იცით ხვალისა, როგორი იქნება თქვენი ცხოვრება, რადგან კვამლი ხართ, რომელიც ცოტა ხანს ჩანს და მერე ქრება,

¹⁵ნაცვლად იმისა, რომ თქვენ თქვათ: თუ უფალი ინებებს, ვიცოცხლებთ და გავაკეთებთ ამას ან იმას.

¹⁶ხოლო ახლა ქედმაღლობთ თქვენი ზვაობით. ყოველი ასეთი ქედმაღლობა ბოროტებაა.

¹⁷ამიტომ, ვინც იცის სიკეთის კეთება და არ აკეთებს, სცოდავს იგი.