Read ახალი აღთქმა ეპისტოლე წმიდა იაკობ მოციქულისა 5 Bible Online

ეპისტოლე წმიდა იაკობ მოციქულისა 5 - ახალი აღთქმა bible

ეპისტოლე წმიდა იაკობ მოციქულისა 5

¹და ახლა, მდიდრებო, ტიროდეთ და გოდებდეთ უბედურებათა გამო, რომელიც თქვენზე მოიწევა.

²თქვენი სიმდიდრე დალპა და თქვენი სამოსი ჩრჩილმა შეჭამა,

³თქვენი ოქრო და ვერცხლი დაჟანგდა და მათი ჟანგი მოწმობა იქნება თქვენზე და შეჭამს თქვენს სხეულს, როგორც ცეცხლი. ეს დაიუნჯეთ უკანასკნელი დღეებისთვის.

⁴აჰა, საზღაური, რომელიც თქვენ დააკელით მუშაკებს, რომელთაც მომკეს თქვენი ყანები, ღაღადებს და მომკელთა ღაღადებამ უფალ საბაოთის ყურამდე მიაღწია.

⁵ფუფუნებაში იყავით ამ ქვეყანაზე და განცხრომაში; გაიძღეთ თქვენი გულები, როგორც დაკვლის დღისათვის.

⁶მსჯავრი დასდეთ, მოკალით მართალი და წინ არ აღგიდგათ თქვენ.

⁷ამიტომ სულგრძელი იყავით, ძმებო, უფლის მოსვლამდე. აჰა, მიწათმოქმედი ელოდება მიწის ძვირფას ნაყოფს; დიდხანს ითმენს მის გამო, ვიდრე არ მიიღებს ადრეულ და გვიან წვიმას.

⁸სულგრძელი იყავით თქვენც, განიმტკიცეთ თქვენი გულები, რადგან უფლის მოსვლა მოახლოებულია.

⁹ნუ დრტვინავთ, ძმებო, ერთმანეთზე, რათა არ იყოთ განკითხულნი; აჰა, განმკითხველი კარების წინ დგას.

¹⁰ჭირთათმენისა და სულგრძელების მაგალითად გყავდეთ, ჩემო ძმებო, წინასწარმეტყველნი, რომლებიც უფლის სახელით მეტყველებდნენ.

¹¹აჰა, შევნატრით მათ, რომელთაც დაითმინეს. იობის მოთმინების შესახებ გსმენიათ და აღსასრული უფლისა იხილეთ, რადგან მრავალმოწყალეა უფალი და შემწყნარებელი.

¹²ხოლო უწინარეს ყოვლისა, ჩემო ძმებო, ნუ დაიფიცებთ ნურც ცას, ნურც ქვეყანას, ნურც სხვა რამე საფიცარს. და იყოს თქვენი ჰო ჰო და არა არა, რათა ორგულობაში არ ჩაცვივდეთ.

¹³უჭირს ვინმეს თქვენ შორის? ილოცოს. ულხინს ვინმეს? იგალობოს.

¹⁴უძლურია ვინმე თქვენ შორის? მოუხმოს ეკლესიის ხუცესებს და ილოცონ მისთვის და სცხონ მას ზეთი უფლის სახელით.

¹⁵და რწმენით ლოცვა გადაარჩენს სნეულს და აღადგენს მას უფალი; და თუ ცოდვები აქვს ჩადენილი, მიეტევება მას.

¹⁶აღიარეთ ერთმანეთის წინაშე ცოდვები და ილოცეთ ერთმანეთისთვის, რათა განიკურნოთ, რადგან მრავლის შემძლეა მართლის ძლიერი ვედრება.

¹⁷ელია ადამიანი იყო, ჩვენი მსგავსი, და ლოცვით ილოცა, რომ არ ეწვიმა, და არ იწვიმა ქვეყანაზე სამი წელი და ექვსი თვე;

¹⁸და კვლავ ილოცა და ზეცამ წვიმა მოავლინა და მიწამ აღმოაცენა თავისი ნაყოფი.

¹⁹ძმებო, თუ ვინმე თქვენ შორის ჭეშმარიტების გზას ასცდება და ვინმე მოაქცევს მას,

²⁰იცოდეს, რომ, ვინც მოაქცევს გზასაცდენილ ცოდვილს, იხსნის სულს სიკვდილისაგან და გადაფარავს ცოდვათა სიმრავლეს.