Read ახალი აღთქმა პირველი ეპისტოლე წმიდა პეტრე მოციქულისა 1 Bible Online

პირველი ეპისტოლე წმიდა პეტრე მოციქულისა 1 - ახალი აღთქმა bible

პირველი ეპისტოლე წმიდა პეტრე მოციქულისა 1

¹პეტრე, მოციქული იესო ქრისტესი — განთესილ მწირებს პონტოსი, გალატიისა, კაპადოკიისა, ასიისა და ბითვინიისა, გამორჩეულებს

²წინასწარცნობით ღვთისა მამისა, განწმედით სულისა, დასამორჩილებლად და საპკურებლად იესო ქრისტეს სისხლით — მადლი თქვენთან და მშვიდობა გამრავლდეს.

³კურთხეულია ღმერთი და მამა ჩვენი უფლის, იესო ქრისტესი, რომელმაც თავისი მრავალი წყალობით ხელახლა გვშვა ჩვენ იესო ქრისტეს მკვდრეთით აღდგომით, რათა გვქონდეს ცოცხალი სასოება,

⁴სამკვიდრებელი უხრწნელი, შეუგინებელი და დაუჭკნობელი, დაცული ზეცაში თქვენთვის,

⁵რომელნიც ღვთის ძალით გარემოცულნი ხართ რწმენით საცხონებლად, რომელიც გამზადებულია, რათა გაცხადდეს უკანასკნელ ჟამს.

⁶ამის გამო გიხაროდეთ. ახლა, თუ საჭირო იქნება, მცირედ დამწუხრდებით მრავალგვარი განსაცდელით,

⁷რათა თქვენი რწმენის გამოცდა ცეცხლით გამოცდილ წარმავალ ოქროზე უფრო ძვირფასი აღმოჩნდეს ქებად, პატივად და დიდებად იესო ქრისტეს გამოცხადებისას,

⁸რომელიც არ გიხილავთ და გიყვართ, რომელსაც ვერ ხედავთ ახლა და გწამთ: გიხაროდეთ გამოუთქმელი და დიდებული სიხარულით

⁹და მიიღებთ თქვენი რწმენის აღსრულებას — სულთა ცხონებას.

¹⁰ამ ცხონების შესახებ გამოიძიეს და გამოიკვლიეს წინასწარმეტყველებმა, რომლებიც თქვენთვის ამ მადლზე წინასწარმეტყველებდნენ

¹¹და იკვლევდნენ, რომელი ან როგორი ჟამის შესახებ აუწყებდა მათში მყოფი სული ქრისტესი, რომელიც წინასწარ მოწმობდა ქრისტეს ვნებებზე და მის შემდგომ დიდებაზე,

¹²და რომელთაც გამოეცხადათ, რომ არა თავის თავს, არამედ თქვენ გემსახურებოდნენ ამით, რაც ახლა გეუწყათ თქვენ იმათგან, ვინც გახარათ თქვენ სულიწმიდით, რომელიც მოვლენილია ზეციდან, და რისი ხილვაც სწადიათ ანგელოზებს.

¹³ამიტომ შემოისარტყლეთ წელნი თქვენი გონებისა, იფხიზლეთ, სრული იმედი გქონდეთ თქვენზე მოწევნადი მადლისა იესო ქრისტეს გამოცხადებისას.

¹⁴როგორც შვილები მორჩილებისა ნუ მიემსგავსებით თქვენი უმეცრების თავდაპირველ გულისთქმებს,

¹⁵არამედ თქვენი წმიდა მხმობელისამებრ თავადაც წმიდა იყავით მთელი თქვენი ცხოვრების წესით,

¹⁶ვინაიდან წერია: წმიდა იყავით, რადგან მე წმიდა ვარ (ლევ.19,2).

¹⁷და თუ მამას უწოდებთ მას, რომელიც თითოეულს საქმისამებრ პირუთვნელად განსჯის, შიშით აღასრულეთ თქვენი მწირობის ჟამი.

¹⁸იცოდეთ, რომ არა ხრწნადი ვერცხლით ან ოქროთი ხართ გამოხსნილნი თქვენი მამების მიერ გადმოცემული ამაო ცხოვრების წესიდან,

¹⁹არამედ პატიოსანი სისხლით ქრისტესი, როგორც უბიწო და უმანკო ტარიგისა,

²⁰რომელიც წინასწარუწყებული იყო ქვეყნის შექმნამდე და უკანასკნელ ჟამს გაცხადდა თქვენთვის,

²¹რომლებმაც მის მიერ ირწმუნეთ ღმერთი, რომელმაც იგი აღადგინა მკვდრეთით და მისცა მას დიდება, რათა გქონდეთ თქვენ რწმენა და სასოება ღვთის მიმართ.

²²სულიწმიდით განიწმინდეთ თქვენი სულები ჭეშმარიტებისადმი მორჩილებით, ძმათმოყვარეობისათვის შეუორგულებელნი იყავით, წმიდა გულით გიყვარდეთ ერთმანეთი გულითადად.

²³ხელახლა ხართ შობილნი არა ხრწნადი თესლისგან, არამედ უხრწნელისგან ცოცხალი ღმერთის სიტყვით, რომელიც მყოფობს უკუნისამდე,

²⁴რადგან ყოველი ხორციელი ბალახივით არის და ყოველგვარი დიდება კაცისა ბალახის ყვავილივით; გახმა ბალახი და მას ყვავილი დასცვივდა;

²⁵ხოლო სიტყვა უფლისა მყოფობს უკუნისამდე (ეს.40,6-8). და ეს არის სიტყვა, რომელიც გეხარათ თქვენ.