Read ახალი აღთქმა პირველი ეპისტოლე წმიდა პეტრე მოციქულისა 2 Bible Online

პირველი ეპისტოლე წმიდა პეტრე მოციქულისა 2 - ახალი აღთქმა bible

პირველი ეპისტოლე წმიდა პეტრე მოციქულისა 2

¹ამიტომ მოიშორეთ ყოველგვარი უკეთურება და ყოველგვარი მზაკვრობა, თვალთმაქცობა, შური და ყოველგვარი ავსიტყვაობა.

²როგორც ახალშობილ ჩვილებს, უზაკველი სიტყვიერი რძე გსურდეთ, რათა მისი მეშვეობით აღიზარდოთ საცხონებლად,

³თუ განიცადეთ, რომ ტკბილია უფალი (ფს.33,8),

⁴რომელთანაც მიხვედით, ცოცხალ ლოდთან, რომელიც კაცთაგან დაწუნებულ იქნა, ხოლო ღვთის მიერ — გამორჩეული და პატიოსანი.

⁵და თქვენც, როგორც ცოცხალი ლოდები, შენდებოდეთ სულიერ სახლად, სამღვდელოდ წმიდად, სულიერ მსხვერპლთა შესაწირავად, რომელიც სათნოა ღვთისათვის იესო ქრისტეს მიერ;

⁶რადგან წერია წერილში: აჰა, ვდებ სიონში ლოდს, ქვაკუთხედს, რჩეულს, პატიოსანს და ვინც ირწმუნებს მისას, არ შერცხვება (ეს.28,16).

⁷ამიტომ თქვენთვის, მორწმუნეთათვის, იგი არის პატივი, ხოლო ურჩთათვის ლოდი, რომელიც დაიწუნეს მშენებლებმა. იგი იქცა თავკიდურად და ლოდად დაბრკოლებისა და კლდედ საცდურისა (ფს.117,22; ეს.8,14), —

⁸რომლებიც ბრკოლდებიან, რადგან ეურჩებიან სიტყვას, რისთვისაც იყვნენ განწესებულნი.

⁹ხოლო თქვენ ხართ მოდგმა რჩეული, სამეუფო სამღვდელო, ხალხი წმიდა, ერი შეძენილი, რათა აუწყებდეთ იმის სათნოებებს, რომელმაც ბნელიდან მოგიწოდათ თქვენ თავის საკვირველ ნათელში (გამ.19,6),

¹⁰რომლებიც ოდესღაც არ იყავით ერი, ხოლო ახლა ერი ხართ ღვთისა; რომლებიც არ იყავით შეწყალებულნი, ხოლო ახლა შეწყალებულნი ხართ (ოს.1,6,9; 2,25).

¹¹საყვარელნო, გთხოვთ როგორც მწირებს და ხიზნებს, განერიდოთ ხორციელ გულისთქმებს, რომლებიც ებრძვიან სულს;

¹²თქვენი ცხოვრების წესი წარმართთა შორის იყოს კეთილი, რათა, როცა ავს იტყვიან თქვენზე, როგორც ბოროტმოქმედებზე, თქვენს კეთილ საქმეებს რომ იხილავენ, ადიდონ ღმერთი მოხედვის დღეს.

¹³ამიტომ დაემორჩილეთ ყოველგვარ კაცობრივ დადგენილებას უფლის გამო: გინდა მეფეს, როგორც ყველაზე აღმატებულს,

¹⁴გინდა მთავრებს, როგორც მის მიერ გამოგზავნილებს ბოროტმოქმედთა დასასჯელად, ხოლო კეთილისმოქმედთა საქებად,

¹⁵რადგან ასეთია ნება ღვთისა: კეთილისმოქმედთა მიერ უგუნურ კაცთა უმეცრების დადუმება —

¹⁶დაემორჩილეთ როგორც თავისუფლები, არა როგორც ისინი, რომელთაც თავისუფლება აქვთ უკეთურების საფარველად, არამედ როგორც ღვთის მონები.

¹⁷ყველას პატივი ეცით, ძმები გიყვარდეთ, ღვთისა გეშინოდეთ, მეფეს პატივს სცემდეთ.

¹⁸მსახურები დაემორჩილეთ ყოველგვარი მოშიშებით ბატონებს, არა მხოლოდ კეთილებსა და ლმობიერებს, არამედ უკეთურებსაც,

¹⁹რადგან მადლი ღვთისაგან ეს არის, ვინმე თუ ღვთის ხსოვნის გამო დაითმენს მწუხარებას, როცა უსამართლოდ იტანჯება,

²⁰რადგან რა არის საქებარი, თუ სცოდავთ და გცემენ და მოითმენთ? არამედ თუ სიკეთეს იქმთ და გტანჯავენ და მოითმენთ — ეს არის მადლი ღვთისაგან.

²¹ამისთვის ხართ მოწოდებულნი, რადგან ქრისტემაც ივნო ჩვენთვის და თქვენ დაგიტოვათ მაგალითი, რათა შეუდგეთ მის კვალს;

²²რომელსაც ცოდვა არ ჩაუდენია, არც ზაკვა გაგონილა მისი პირიდან;

²³რომელსაც კიცხავდნენ და პასუხად არავის კიცხავდა, ევნებოდა და არ ემუქრებოდა, არამედ გადასცემდა მართალ მსაჯულს;

²⁴რომელმაც ჩვენი ცოდვები იტვირთა თავისი სხეულით ძელზე, რათა ცოდვებს განვეშოროთ და სიმართლით ვიცხოვროთ, რომლის ჭრილობითაც განიკურნეთ;

²⁵რადგან იყავით როგორც გზასაცდენილი ცხვრები, მაგრამ ახლა დაუბრუნდით მწყემსს და თქვენი სულების ზედამხედველს.