Read ახალი აღთქმა პირველი ეპისტოლე წმიდა პეტრე მოციქულისა 3 Bible Online

პირველი ეპისტოლე წმიდა პეტრე მოციქულისა 3 - ახალი აღთქმა bible

პირველი ეპისტოლე წმიდა პეტრე მოციქულისა 3

¹მსგავსადვე ცოლები დაემორჩილეთ საკუთარ ქმრებს, რათა, თუ რომელიმე ეურჩება სიტყვას, ცოლების ცხოვრების წესით სიტყვის გარეშე იყვნენ შეძენილნი,

²როცა იხილავენ თქვენს მოშიშ, უბიწო ცხოვრების წესს,

³რომელთა სამკაულიც იყოს არა გარეგნული თმის დაწვნა და ოქროს ასხმა ან სამოსით შემოსვა,

⁴არამედ დაფარული გულის კაცი მშვიდი და მყუდრო სულის უხრწნელებით, რომელიც ძვირფასია ღვთის წინაშე.

⁵რადგან ასევე ოდესღაც წმიდა დედაკაცებიც, რომლებიც სასოებდნენ ღმერთს, იმკობდნენ თავს საკუთარი ქმრებისადმი მორჩილებით,

⁶როგორც სარრა ემორჩილებოდა აბრაამს და ბატონს უწოდებდა მას და რომლის შვილებიც ხართ, როცა სიკეთეს აკეთებთ და არ გაშინებთ არანაირი შიში.

⁷ქმრებიც ასევე თანაცხოვრობდით გონივრულად; ცოლებს, როგორც უუძლურეს ჭურჭელს, მიაგეთ პატივი, როგორც თანამკვიდრებს მადლმოსილი ცხოვრებისა, რათა არ ბრკოლდებოდეთ თქვენ ლოცვისას.

⁸ხოლო დასასრულ, იყავით თანამოაზრენი, თანამგრძნობნი, ძმათმოყვარენი, გულმოწყალენი და თავმდაბალნი;

⁹ნუ მიაგებთ ბოროტებას ბოროტების წილ, ნურც გინებას — გინების წილ, პირიქით, აკურთხეთ და იცოდეთ, იმისთვის ხართ გამორჩეულნი, რომ კურთხევა დაიმკვიდროთ;

¹⁰რადგან ვისაც ნებავს ცხოვრების სიყვარული და ხილვა კეთილი დღეებისა, დააცხროს თავისი ენა ბოროტებისგან და მისი ბაგეები ნუ იტყვიან ზაკვას,

¹¹მოიქცეს ბოროტებისგან და ქმნას სიკეთე, მოიძიოს მშვიდობა და მისდევდეს მას,

¹²რადგან უფლის თვალები — მართლებისაკენ და მისი ყურები — მათი ლოცვისაკენ, ხოლო უფლის პირი — ბოროტმოქმედთა წინააღმდეგ (ფს.33,13-16).

¹³და ვინ გიბოროტებთ თქვენ, თუ სიკეთის მაძიებელნი იქნებით?

¹⁴და თუნდაც რომ გევნოთ სიმართლისათვის, ნეტარნი ხართ, ხოლო მათი შიში ნუ შეგაშინებთ, ნურც შეგაძრწუნებთ (ეს.8,12),

¹⁵არამედ უფალი ღმერთი წმიდაყავთ თქვენს გულებში და მზად იყავით მუდამ, ყველას, ვინც გეკითხებათ თქვენი იმედის შესახებ, გასცეთ პასუხი მშვიდად და მოშიშებით;

¹⁶სინდისი კეთილი გქონდეთ, რათა, რის გამოც ავს ამბობენ თქვენზე, როგორც ბოროტმოქმედებზე, შერცხვეთ შეურაცხმყოფელებს თქვენი ქრისტესმიერი კეთილი ცხოვრების წესისა,

¹⁷რადგან უმჯობესია, სიკეთე აკეთოთ და გევნოთ, თუ სურს ღვთის ნებას, ვიდრე ბოროტება აკეთოთ;

¹⁸რადგან ქრისტეც ერთგზის ევნო ჩვენი ცოდვების გამო, მართალი — ცრუთათვის, რათა ჩვენ მივეყვანეთ ღმერთთან; მოკვდა ხორცით და გაცოცხლდა სულით,

¹⁹რომლითაც საპყრობილეში მყოფ სულებთან მივიდა და უქადაგა,

²⁰რომლებიც ოდესღაც ურჩნი იყვნენ, როცა ღვთის სულგრძელება ელოდა მათ ნოეს დღეებში კიდობნის მზადებისას, რომელშიც ცოტანი, ანუ რვა სული, გადაურჩა წყალს,

²¹რომლის მსგავსადაც თქვენ ახლა გაცხონებთ ნათლისღება — არა ხორცთაგან მწიკვლის მოშორება, არამედ კეთილი სინდისით ღვთისაკენ სწრაფვა აღდგომით იესო ქრისტესი,

²²რომელიც არის ღვთის მარჯვნივ, ამაღლდა რა ზეცად, და დაემორჩილნენ მას ანგელოზები და ხელმწიფებანი და ძალნი.