Read ახალი აღთქმა პირველი ეპისტოლე წმიდა პეტრე მოციქულისა 4 Bible Online

პირველი ეპისტოლე წმიდა პეტრე მოციქულისა 4 - ახალი აღთქმა bible

პირველი ეპისტოლე წმიდა პეტრე მოციქულისა 4

¹ასე რომ, ქრისტე ევნო ჩვენთვის ხორცით და თქვენც ამავე აზრით აღიჭურვეთ, რადგან, ვინც ევნო ხორცით, შეწყვიტა ცოდვის ჩადენა,

²რათა არა კაცთა გულისთქმებით, არამედ ღვთის ნებით იცხოვროთ დარჩენილი ჟამი ხორციელი ცხოვრებისა;

³რადგან საკმარისია, რომ განვლილი ჟამი იცხოვრეთ წარმართთა სურვილებისამებრ, რომლებიც მისდევენ გარყვნილებას, გულისთქმებს, მემთვრალეობას, ლაღობას, ღრეობას და უჯერო კერპთმსახურებას,

⁴რის გამოც უკვირთ, რომ არ მისდევთ თქვენ იმავე აღვირახსნილ გარყვნილებას, და გგმობენ.

⁵ისინი პასუხს აგებენ იმის წინაშე, რომელიც მზად არის ცოცხალთა და მკვდართა განსასჯელად.

⁶იმისთვის ეხარათ მკვდრებსაც, რათა ადამიანურად დასჯილებმა ხორცით, იცოცხლონ ღვთის მიერ სულით.

⁷ყველაფრის აღსასრული მოახლოებულია. ამიტომ კეთილგონიერნი იყავით და იფხიზლეთ ლოცვისათვის.

⁸უწინარეს ყოვლისა, ერთმანეთის გულითადი სიყვარული გქონდეთ, რადგან სიყვარული ფარავს ცოდვათა სიმრავლეს (იგავ.10,12).

⁹სტუმართმოყვარე იყავით დრტვინვის გარეშე ერთმანეთთან.

¹⁰თითოეული, რა ნიჭიც მიიღეთ, იმით ემსახურეთ ერთმანეთს, როგორც ღვთის მრავალგვარი მადლის კეთილი მნეები.

¹¹თუ ვინმე ამბობს, თქვას ისე, როგორც ღვთის სიტყვა; თუ ვინმე მსახურობს, იმსახუროს ძალით, რომელსაც აძლევს ღმერთი, რათა ყველაფრით იდიდებოდეს ღმერთი იესო ქრისტეს მიერ, რომლისაც არის დიდება და სიმტკიცე უკუნითი უკუნისამდე, ამინ.

¹²საყვარელნო, ნუ გეუცხოებათ თქვენში ეს წვა, რომელიც თქვენ გამოსაცდელად ხდება, თითქოს უცხო რამე შეგემთხვათ თქვენ,

¹³არამედ, რამდენადაც თანაზიარნი იქნებით ქრისტეს ვნებებისა, გიხაროდეთ, რათა მისი დიდების განცხადებისასაც გაიხაროთ და მხიარულნი იყოთ.

¹⁴თუ გლანძღავენ ქრისტეს სახელის გამო, ნეტარნი ხართ, რადგან სული დიდებისა და ღვთისა დავანებულია თქვენზე; მათ მიერ იგმობა, ხოლო თქვენ მიერ იდიდება.

¹⁵ოღონდ არცერთ თქვენგანს არ ევნოს როგორც მკვლელს ან მპარავს, ან ბოროტმოქმედს, ან როგორც სხვის საქმეში ჩამრევს,

¹⁶ხოლო თუ — როგორც ქრისტიანს, ნუ გრცხვენიათ, არამედ ადიდეთ ღმერთი ამ ხვედრით.

¹⁷რადგან დროა, დაიწყოს განსჯა ღვთის სახლიდან, ხოლო თუ პირველად ჩვენგან, როგორი იქნება აღსასრული ღვთის სახარების ურჩთა?

¹⁸და თუ მართალი ძნელად გადარჩება, უღვთო და ცოდვილი სადღა აღმოჩნდება (იგავ.11,31)?

¹⁹ასე რომ, ვინც ევნება ღვთის ნებით, როგორც სარწმუნო შემოქმედს, კეთილი საქმეებით შეავედროს თავისი სული.