Read ახალი აღთქმა პირველი ეპისტოლე წმიდა პეტრე მოციქულისა 5 Bible Online

პირველი ეპისტოლე წმიდა პეტრე მოციქულისა 5 - ახალი აღთქმა bible

პირველი ეპისტოლე წმიდა პეტრე მოციქულისა 5

¹ხუცესებს თქვენ შორის ვევედრები, როგორც თანახუცესი და ქრისტეს ვნებათა მოწმე და მისი მომავალი დიდების გამოცხადების თანაზიარი:

²დამწყსეთ თქვენ შორის მყოფი სამწყსო ღვთისა და ზედამხედველობდეთ არა იძულებით, არამედ ნებაყოფლობით, არა ანგარებით, არამედ გულმოდგინებით,

³არა როგორც წილხვდომილთა ბატონები, არამედ მაგალითი იყავით სამწყსოსათვის,

⁴და მწყემსმთავრის გამოცხადებისას მიიღებთ დიდების უჭკნობ გვირგვინს.

⁵მსგავსადვე, უმცროსები დაემორჩილეთ უხუცესებს და ყველამ ერთმანეთის მორჩილებით სიმდაბლე შეიმოსეთ, რადგან ღმერთი ამპარტავანთ წინ აღუდგება, ხოლო მდაბალთ აძლევს მადლს (იგავ.3,34).

⁶ამიტომ, დამდაბლდით ღვთის მტკიცე ხელის ქვეშ, რათა აღგამაღლოთ თავის დროზე.

⁷თქვენი ყველა საზრუნავი მიანდეთ მას, რადგან იგი ზრუნავს თქვენზე.

⁸იფხიზლეთ, მღვიძარე იყავით, რადგან თქვენი მეტოქე ეშმაკი, როგორც მბრდღვინავი ლომი, დადის და ეძებს, ვინ შთანთქას.

⁹წინ აღუდეგით მას მტკიცენი რწმენით. იცოდეთ, რომ იმავე სატანჯველს განიცდის თქვენი ძმობა ამ სოფელში.

¹⁰ხოლო ღმერთი ყოველგვარი მადლისა, რომელმაც მოგიწოდათ თქვენ თავის საუკუნო დიდებაში ქრისტე იესოს მიერ, ცოტაოდენს რომ დაიტანჯებით, თავად აღგადგენთ თქვენ, განგამტკიცებთ, გაგაძლიერებთ და ურყევს გაგხდით.

¹¹მას დიდება და სიმტკიცე უკუნითი უკუნისამდე, ამინ.

¹²სილუანეს, როგორც მგონია, თქვენი სარწმუნო ძმის, მეშვეობით, მცირეოდენი მოგწერეთ, განუგეშებთ და ვმოწმობ, რომ ეს არის ჭეშმარიტი მადლი ღვთისა, რომელზეც დგახართ.

¹³მოკითხვას გითვლიან თქვენ რჩეულთა ერთობა ბაბილონში და მარკოზი, ჩემი ძე.

¹⁴მოიკითხეთ ერთმანეთი სიყვარულის ამბორით.

¹⁵მშვიდობა თქვენ ყოველთა ქრისტე იესოს მიერ, ამინ.