Read ახალი აღთქმა მეორე ეპისტოლე წმიდა პეტრე მოციქულისა 1 Bible Online

მეორე ეპისტოლე წმიდა პეტრე მოციქულისა 1 - ახალი აღთქმა bible

მეორე ეპისტოლე წმიდა პეტრე მოციქულისა 1

¹სიმონ-პეტრე, მონა და მოციქული იესო ქრისტესი — იმათ, ვისაც იმავე ღირსების სარწმუნოება ხვდა წილად, რაც ჩვენ, ჩვენი ღვთისა და მაცხოვრის, იესო ქრისტეს, სიმართლით:

²მადლი თქვენდა და მშვიდობა გამრავლდეს ღვთისა და ჩვენი უფლის, იესო ქრისტეს, შემეცნებით.

³როგორც მისი ღვთაებრივი ძალისგან მოგვენიჭა ჩვენ ყოველივე ცხოვრებისათვის და ღვთისმოსაობისათვის იმის შემეცნებით, ვინც მოგვიწოდა ჩვენ თავისი დიდებით და სახიერებით,

⁴რომელთა მიერაც მოგვანიჭა ჩვენ ძვირფასი და დიდებული აღთქმანი, რათა მათ მიერ გახდეთ თანაზიარნი ღვთაებრივი ბუნებისა და განერიდოთ ამ სოფლის გულისთქმით ხრწნას,

⁵ასევე ამაში გამოიჩინეთ მთელი გულმოდგინება და წარმოაჩინეთ თქვენს რწმენაში სათნოება, და სათნოებაში — შემეცნება,

⁶და შემეცნებაში — თავშეკავება, და თავშეკავებაში — მოთმინება და მოთმინებაში — ღვთისმოსაობა,

⁷და ღვთისმოსაობაში — ძმათმოყვარეობა, და ძმათმოყვარეობაში — სიყვარული,

⁸რადგან, თუ ეს თქვენშია და მრავლდება, არ იქნებით უქმად, არც უნაყოფოდ ჩვენი უფლის, იესო ქრისტეს, შემეცნებისას;

⁹ხოლო ვისაც ეს არა აქვს, ბრმა არის, თვალდახუჭული, რადგან დაავიწყდა განწმენდა თავისი ძველი ცოდვებისგან.

¹⁰ამიტომ, ძმანო, უფრო მეტად ეცადეთ, კეთილი საქმეებით განამტკიცოთ თქვენი მოწოდება და რჩეულობა, რადგან ამის მოქმედნი არასოდეს შეცდებით;

¹¹არამედ ასე გულუხვად გებოძებათ თქვენ შესვლა ჩვენი უფლის და მაცხოვრის, იესო ქრისტეს, საუკუნო სასუფეველში.

¹²ამიტომ არასოდეს დამეზარება ამის შეხსენება თქვენთვის, თუმცა იცით და მტკიცედ დგახართ მოწევნულ ჭეშმარიტებაზე.

¹³და სამართლიანად მიმაჩნია, რომ, ვიდრე ვარ ამ სამყოფელში, გამოგაფხიზლოთ თქვენ შეხსენებით.

¹⁴ვიცი, რომ მალე უნდა დავტოვო ჩემი სამყოფელი, როგორც უფალმა ჩვენმა, იესო ქრისტემ, გამომიცხადა მე,

¹⁵და ვეცდები, რათა ჩემი გასვლის შემდეგაც ყოველ ჯერზე იხსენებდეთ თქვენ ამას,

¹⁶რადგან არა გამოგონილ ზღაპრებს აყოლილებმა გაუწყეთ თქვენ ჩვენი უფლის, იესო ქრისტეს, ძალა და მოსვლა, არამედ თვითმხილველებმა მისი დიდებულებისა,

¹⁷რადგან მიიღო მამა ღმერთისგან პატივი და დიდება — ხმა, რომელიც მოვიდა ასეთი დიდადმშვენიერი დიდებიდან მასზე: ეს არის ძე ჩემი საყვარელი, რომელიც სათნოა ჩემთვის.

¹⁸და ეს ხმა, გადმოსული ზეციდან, ჩვენ გავიგონეთ, როცა მასთან ერთად ვიყავით წმიდა მთაზე.

¹⁹და გვაქვს უმტკიცესი წინასწარმეტყველური სიტყვა, რომელსაც, კარგს აკეთებთ, რომ შეუდექით, როგორც სანთელს, რომელიც ანათებს ბნელ ადგილას, ვიდრე დღე გათენდება და ცისკრის ვარსკვლავი ამობრწყინდება თქვენს გულებში.

²⁰უწინარეს ყოვლისა, იცოდეთ, რომ წერილის არცერთი წინასწარმეტყველება თვითნებურად არ განიმარტება,

²¹რადგან კაცის ნებით არასოდეს მოცემულა წინასწარმეტყველება, არამედ სულიწმიდით აღძრული ღვთის წმინდა კაცები გამოთქვამდნენ.