Read ახალი აღთქმა მეორე ეპისტოლე წმიდა პეტრე მოციქულისა 2 Bible Online

მეორე ეპისტოლე წმიდა პეტრე მოციქულისა 2 - ახალი აღთქმა bible

მეორე ეპისტოლე წმიდა პეტრე მოციქულისა 2

¹ხოლო იყვნენ ცრუწინასწარმეტყველნიც ერში, როგორც თქვენ შორისაც იქნებიან ცრუმოძღვრები, რომლებიც შემოიტანენ წარმწყმედელ მწვალებლობებს და თავის გამომსყიდველ მეუფეს უარყოფენ და სწრაფად მოიწევენ საკუთარ თავზე წარწყმედას.

²და მრავალნი აჰყვებიან მათ გარყვნილებას, რომელთა გამოც ჭეშმარიტების გზა დაიგმობა;

³და ანგარების გამო მაცდური სიტყვებით მოგისყიდიან თქვენ ისინი, რომელთა სასჯელიც ოდითგანვე არ ცხრება და მათი წარწყმედა არ თვლემს.

⁴რადგან თუ ღმერთმა ცოდვით დაცემული ანგელოზები არ დაინდო, არამედ წყვდიადის ჯაჭვებით შეკრულნი ჯოჯოხეთში ჩაყარა და გადასცა დასაცავად სამსჯავროსთვის,

⁵და თუ არც ის პირველი ქვეყანა დაინდო, არამედ ნოე, მერვე მქადაგებელი სიმართლისა, დაიცვა და წარღვნა მოაწია უღმრთოთა სოფელზე,

⁶და თუ სოდომისა და გომორის ქალაქების დაქცევა განაჩინა და ფერფლად აქცია და მაგალითად მისცა მომავალ უღვთოებს,

⁷ხოლო მართალი ლოტი, გატანჯული უსჯულოთა გარყვნილი ქცევით, იხსნა —

⁸რადგან მართალი, დამკვიდრდა რა მათ შორის, მათი უწესო საქმეების ხედვით და სმენით ყოველდღიურად ტანჯავდა მართალ სულს —

⁹იცის უფალმა ღვთისმოსავთა განსაცდელისგან გამოხსნა, ხოლო უსჯულოთა დაცვა განკითხვის დღისთვის დასასჯელად,

¹⁰ხოლო უფრო მეტად იმათი, რომლებიც ხორციელი გულისთქმების სიბილწეს მისდევენ და უფლებას უგულებელყოფენ; კადნიერები, თავხედები, დიდებათა წინაშე არ ძრწიან, არამედ გმობენ,

¹¹მაშინ როდესაც ანგელოზებს, რომლებიც ძლიერებით და ძალით აღმატებულნი არიან, არ გამოაქვთ მათთვის უფლის წინაშე გმობის მსჯავრი.

¹²ხოლო ესენი, როგორც პირუტყვი ცხოველები, ბუნებით ნაშობნი დასაჭერად და დასახოცად, გმობენ იმას, რაშიც უმეცარნი არიან; თავისი გახრწნით გაიხრწნებიან

¹³და მიიღებენ უსჯულოების საზღაურს. სიამოვნებად მიაჩნიათ ყოველდღიური განცხრომა; ბილწნი და მანკიერნი, განცხრომით არიან თავის ცდომილებაში და თქვენთან ერთად ილხენენ.

¹⁴თვალები სავსე აქვთ მრუშობით და დაუცხრომელი ცოდვებით და აცდუნებენ მერყევ სულებს; გულები აქვთ გაწვრთნილი ანგარებით, შვილები წყევლისა!

¹⁵დატოვეს სწორი გზა, შეცდნენ და გაჰყვნენ ბალაამ ბოსორის ძის გზას, რომელმაც სიცრუის საზღაური შეიყვარა.

¹⁶მისი უსჯულოების მამხილებელი იყო უტყვი სახედარი, რომელიც ადამიანის ხმით ამეტყველდა და შეაჩერა წინასწარმეტყველის უგუნურება.

¹⁷ესენი არიან უწყლო წყაროები, ქარიშხლისგან მიმოტაცებული ღრუბლები, რომელთათვისაც სიბნელე წყვდიადისა საუკუნოდ არის დაცული,

¹⁸რადგან მაღალფარდოვანი ამაოდმეტყველებით აცდუნებენ ბილწი ხორციელი გულისთქმებით იმათ, ვინც ოდნავ დასცილდა მაცდური ცხოვრების წესის მიმდევრებს;

¹⁹თავისუფლებას აღუთქვამენ მათ, თვითონ კი არიან მონები გახრწნილებისა, რადგან ვინც რითია ძლეული, იმას ემონება;

²⁰რადგან, რომლებიც გაექცნენ ამ სოფლის სიბილწეთ ჩვენი უფლის და მაცხოვრის, იესო ქრისტეს, შემეცნებით და კვლავ იხლართებიან და იძლევიან მათგან, იქნება მათთვის უკანასკნელი პირველზე უარესი,

²¹რადგან უმჯობესი იყო მათთვის, არ შეეცნოთ გზა სიმართლისა, ვიდრე შეეცნოთ და პირი ებრუნებინათ მათთვის მიცემული წმიდა მცნებისგან.

²²დაემართათ მათ იმ ჭეშმარიტი ანდაზისამებრ: ძაღლი მიუბრუნდა თავის ნარწყევს და დაბანილი ღორი – წუმპეს საგორაოდ.