Read ახალი აღთქმა მეორე ეპისტოლე წმიდა პეტრე მოციქულისა 3 Bible Online

მეორე ეპისტოლე წმიდა პეტრე მოციქულისა 3 - ახალი აღთქმა bible

მეორე ეპისტოლე წმიდა პეტრე მოციქულისა 3

¹აჰა, საყვარელნო, უკვე მეორე ეპისტოლეს გწერთ თქვენ, რომლებშიც შეხსენებით ვაღვიძებ თქვენს უმწიკვლო გონებას,

²რათა გახსოვდეთ ადრე ნათქვამი სიტყვები წმიდა წინასწარმეტყველებისა და თქვენი მოციქულებისა მცნება უფლისა და მაცხოვრისა.

³უწინარეს ყოვლისა, იცოდეთ, რომ უკანასკნელ დღეებში მოვლენ მკრეხელები, თავისი გულისთქმებისამებრ მავალნი,

⁴და იტყვიან: სად არის აღთქმა მისი მოსვლისა? რადგან მას შემდეგ, რაც მამებმა განისვენეს, ყოველივე ისევე რჩება შექმნის დასაბამიდან.

⁵რადგან ეს უნდათ, დაფარულია მათთვის, რომ ცანი იყვნენ პირველად და ქვეყანა წყლისგან და წყლით შეიქმნა ღვთის სიტყვით,

⁶რომლის მიერაც მაშინდელი ქვეყანა წყლით წაირღვნა და მოისპო.

⁷ხოლო ახლა ცანი და ქვეყანა იმავე სიტყვით არიან დაცულნი, ცეცხლისთვის შენახულნი განკითხვის დღემდე და უღვთო კაცთა წარსაწყმედად.

⁸ხოლო ეს ერთიც ნუ იქნება დაფარული თქვენთვის, საყვარელნო, რომ ერთი დღე უფლისთვის როგორც ათასი წელი, და ათასი წელი — როგორც ერთი დღე;

⁹არ აყოვნებს უფალი აღთქმის აღსრულებას, როგორც ზოგიერთებს დაყოვნებად მიაჩნიათ, არამედ სულგრძელია თქვენ მიმართ, რადგან არ სურს არავის წარწყმედა, არამედ — რომ ყველა სინანულით მოიქცეს.

¹⁰ხოლო მოვა უფლის დღე, როგორც მპარავი ღამით, როცა ცანი გრგვინვით წარხდებიან და აალებული პირველსაწყისები დაიშლება და ქვეყანა და მისი საქმეები დაიწვება.

¹¹რადგან ეს ყოველივე ასე დაიშლება, როგორები უნდა იყოთ წმიდა ცხოვრების წესით და ღვთისმოსაობით თქვენ,

¹²რომლებიც ელოდებით და ესწრაფით ღვთის დღის მოსვლას, როდესაც ცეცხლმოდებული ცანი დაირღვევიან და აალებული პირველსაწყისები დადნება?!

¹³ახალ ცებს და ახალ ქვეყანას, მისი აღთქმისამებრ, მოველით, რომლებშიც სიმართლე მკვიდრობს.

¹⁴ამიტომ, საყვარელნო, ელოდებით რა ამას, ისწრაფეთ, რომ უმანკონი და უბიწონი მშვიდობით აღმოჩნდეთ მის წინაშე,

¹⁵და ჩვენი უფლის სულგრძელება ხსნად მიიჩნიეთ, როგორც ჩვენმა საყვარელმა ძმამ, პავლემაც, მისთვის მოცემული სიბრძნისამებრ მოგწერათ თქვენ,

¹⁶როგორც ამის შესახებ ამბობს თავის ყველა ეპისტოლეში, რომლებშიც ძნელად გასაგებია ზოგი რამ, რასაც უსწავლელნი და მერყევნი თავის წარსაწყმედად ამახინჯებენ ისევე, როგორც სხვა წერილებს.

¹⁷ასე რომ, საყვარელნო, რადგან თქვენ წინასწარ იცით ეს, გაფრთხილდით, რათა არ გაგიტაცოთ უსჯულოთა საცდურმა და არ დაკარგოთ თქვენი სიმტკიცე,

¹⁸არამედ აღიზარდოთ ჩვენი უფლისა და მაცხოვრის, იესო ქრისტეს, მადლითა და შემეცნებით. მისია დიდება აწ და საუკუნო დღეს, ამინ.