Read ახალი აღთქმა პირველი ეპისტოლე წმიდა იოანე მოციქულისა 1 Bible Online

პირველი ეპისტოლე წმიდა იოანე მოციქულისა 1 - ახალი აღთქმა bible

პირველი ეპისტოლე წმიდა იოანე მოციქულისა 1

¹რომელიც იყო დასაბამიდან, რომელიც ვისმინეთ, რომელიც ვიხილეთ ჩვენი თვალით, რომელსაც ვჭვრეტდით და ჩვენი ხელით ვეხებოდით — ცხოვრების სიტყვის შესახებ გაუწყებთ. —

²და ცხოვრება განცხადდა და ვიხილეთ და ვმოწმობთ და გაუწყებთ თქვენ საუკუნო ცხოვრებას, რომელიც იყო მამასთან და გამოგვიჩნდა ჩვენ,

³რომელიც ვიხილეთ და ვისმინეთ, გაუწყებთ თქვენ, რათა თქვენც თანაზიარნი იყოთ ჩვენი, ხოლო ჩვენ თანაზიარნი ვართ მამისა და მისი ძის, იესო ქრისტესი.

⁴და ამას გწერთ თქვენ, რათა ჩვენი სიხარული სრულყოფილი იყოს.

⁵და ეს არის აღთქმა, რომელიც ვისმინეთ მისგან და გაუწყებთ თქვენ, რომ ღმერთი არის ნათელი და არავითარი სიბნელე არ არის მასში.

⁶თუ ვამბობთ, რომ თანაზიარნი ვართ მისი და ბნელში დავდივართ, ვტყუით და არ ვიქმთ ჭეშმარიტებას,

⁷ხოლო თუ ნათელში დავდივართ, როგორც იგი არის ნათელში, თანაზიარნი ვართ ერთმანეთისა და სისხლი მისი ძის, იესო ქრისტესი, განგვწმენდს ჩვენ ყოველგვარი ცოდვისგან.

⁸თუ ვამბობთ, რომ ცოდვა არა გვაქვს, საკუთარ თავს ვაცდუნებთ და ჭეშმარიტება არ არის ჩვენში.

⁹თუ ვაღიარებთ ჩვენს ცოდვებს, სარწმუნოა და მართალი და მოგვიტევებს ჩვენ ცოდვებს და განგვწმენდს ჩვენ ყოველგვარი უსჯულოებისგან.

¹⁰თუ ვამბობთ, რომ არ შეგვიცოდავს, ცრუდ წარმოვაჩენთ მას და მისი სიტყვა არ არის ჩვენ შორის.