Read ახალი აღთქმა პირველი ეპისტოლე წმიდა იოანე მოციქულისა 2 Bible Online

პირველი ეპისტოლე წმიდა იოანე მოციქულისა 2 - ახალი აღთქმა bible

პირველი ეპისტოლე წმიდა იოანე მოციქულისა 2

¹შვილნო ჩემნო, ამას გწერთ თქვენ, რათა არ სცოდოთ; და თუ ვინმე შესცოდავს, მეოხი გვყავს მამის წინაშე — ქრისტე იესო მართალი.

²და იგი არის მლხინებელი ჩვენი ცოდვებისა, არა მხოლოდ ჩვენისა, არამედ მთელი სოფლისა.

³და ამით ვხვდებით, რომ შევიცანით იგი, თუ მის მცნებებს ვიცავთ.

⁴ვინც ამბობს: შევიცანი იგი. — და მის მცნებებს არ იცავს, ცრუა და ჭეშმარიტება არ არის მასში;

⁵ხოლო ვინც იცავს მის სიტყვას, ღვთის სიყვარული ჭეშმარიტად აღსრულებულია მასში. ამით ვხვდებით, რომ მასთან ვართ.

⁶ვინც ამბობს, რომ მასთან არის, მართებს, ისე იქცეოდეს, როგორც იგი იქცეოდა.

⁷ძმანო, ახალ მცნებას არ გწერთ თქვენ, არამედ ძველ მცნებას, რომელიც გქონდათ დასაბამიდან. ძველი მცნება არის სიტყვა, რომელიც ისმინეთ დასაბამიდან.

⁸ასევე ახალ მცნებას გწერთ თქვენ, რომელიც ჭეშმარიტად არის მასში და თქვენში, რადგან ბნელი მიდის და ჭეშმარიტი ნათელი უკვე ანათებს.

⁹ვინც ამბობს, რომ ნათელშია, და თავისი ძმა სძულს, იგი ბნელშია აქამდე.

¹⁰ვისაც უყვარს თავისი ძმა, ნათელშია და საცდური არ არის მასში,

¹¹ხოლო ვისაც სძულს თავისი ძმა, ბნელშია და ბნელში დადის და არ იცის, საით მიდის, რადგან ბნელმა დაუბრმავა მას თვალები.

¹²გწერთ თქვენ, შვილნო, რომ მოგეტევებათ თქვენ ცოდვები მისი სახელით;

¹³გწერთ თქვენ, მამანო, რადგან შეიცანით იგი, რომელიც დასაბამიდან არის; გწერთ თქვენ ჭაბუკნო, რადგან სძლიეთ ბოროტს; გწერთ თქვენ, ყრმანო, რადგან შეიცანით მამა.

¹⁴მოგწერეთ თქვენ, მამანო, რადგან შეიცანით იგი, რომელიც არის დასაბამიდან; მოგწერეთ თქვენ, ჭაბუკნო, რადგან ძლიერნი ხართ და ღვთის სიტყვა არის თქვენში და სძლიეთ ბოროტს.

¹⁵ნუ გიყვართ ეს სოფელი, ნურც ის, რაც ამ სოფელშია. ვისაც უყვარს ეს სოფელი, არ არის სიყვარული მამისა მასში,

¹⁶რადგან ყველაფერი, რაც ამ სოფელშია — გულისთქმა ხორცისა და გულისთქმა თვალისა და ზვაობა ამ ცხოვრებისა — არ არის მამისაგან, არამედ ამ სოფლისგან არის.

¹⁷და ეს სოფელი წარმავალია და მისი გულისთქმაც, ხოლო ვინც ასრულებს ღვთის ნებას, იქნება უკუნისამდე.

¹⁸ყრმანო, უკანასკნელი ჟამია და, როგორც გსმენიათ, ანტიქრისტე მოდის. და ახლაც მრავლად არიან ანტიქრისტეები, რითიც ვხვდებით, რომ უკანასკნელი ჟამია.

¹⁹ჩვენგან გავიდნენ, მაგრამ არ იყვნენ ჩვენგანნი, რადგან ჩვენგანნი რომ ყოფილიყვნენ, ჩვენთან დარჩებოდნენ, არამედ განცხადდა, რომ არ არიან ყველანი ჩვენგანნი.

²⁰და თქვენ ცხებულება გაქვთ წმიდისაგან და იცით ყოველივე.

²¹არ მომიწერია თქვენთვის, რომ არ იცით ჭეშმარიტება, არამედ — რომ იცით იგი და რომ არავითარი სიცრუე არ არის ჭეშმარიტებისგან.

²²ვინ არის ცრუ? განა არა ის, რომელიც უარყოფს, რომ იესო არის ქრისტე? ეს არის ანტიქრისტე, რომელიც უარყოფს მამას და ძეს.

²³ვინც უარყოფს ძეს, არც მამა ჰყავს; ვინც აღიარებს ძეს, მამაც ჰყავს.

²⁴ამიტომ თქვენ რაც ისმინეთ დასაბამიდან, თქვენში იყოს. თუ თქვენში იქნება, რაც დასაბამიდან ისმინეთ, თქვენც ძეში და მამაში იქნებით.

²⁵და ეს არის აღთქმა, რომელიც მან აღგვითქვა ჩვენ — ცხოვრება საუკუნო.

²⁶ეს მოგწერეთ თქვენ თქვენი მაცდუნებლების შესახებ.

²⁷და ცხებულება, რომელიც თქვენ მიიღეთ მისგან, თქვენშია და არ გჭირდებათ, რომ ვინმემ გასწავლოთ თქვენ, არამედ თავად ცხებულება გასწავლით თქვენ ყველაფერს — და ეს არის ჭეშმარიტება და არ არის სიცრუე — და როგორც გასწავლათ თქვენ, იყავით მასში.

²⁸და ახლა, შვილნო, იყავით მასში, რათა, როცა განცხადდება, გვქონდეს კადნიერება და მისი არ შეგვრცხვეს მისი მოსვლისას.

²⁹თუ იცით, რომ იგი მართალია, იცოდეთ, ყოველი, რომელიც იქმს სიმართლეს, მისგან არის შობილი.