Read ახალი აღთქმა პირველი ეპისტოლე წმიდა იოანე მოციქულისა 4 Bible Online

პირველი ეპისტოლე წმიდა იოანე მოციქულისა 4 - ახალი აღთქმა bible

პირველი ეპისტოლე წმიდა იოანე მოციქულისა 4

¹საყვარელნო, ყველა სულისას ნუ ირწმუნებთ, არამედ გამოსცადეთ სულები, ღვთისაგან არიან თუ არა, რადგან მრავალი ცრუწინასწარმეტყველია გამოსული ამ სოფლად.

²ამით შეიცნობთ ღვთის სულს: ყოველი სული, რომელიც აღიარებს იესო ქრისტეს, ხორციელად მოსულს, ღვთისაგან არის;

³და სული, რომელიც არ აღიარებს იესო ქრისტეს, ხორციელად მოსულს, ღვთისაგან არ არის, და ეს არის სული ანტიქრისტესი, რომელზეც გსმენიათ, რომ მოდის, და ახლაც ამ სოფელშია.

⁴თქვენ ღვთისაგან ხართ, შვილებო, და გიძლევიათ მათთვის, რადგან მეტია ის, რომელიც თქვენშია, ვიდრე ის, რომელიც ამ სოფელშია.

⁵ისინი ამ სოფლისაგანნი არიან, ამიტომ ამ სოფლისას ამბობენ და სოფელი ისმენს მათსას.

⁶ჩვენ ღვთისაგან ვართ. ვინც შეიცნო ღმერთი, ისმენს ჩვენსას. ვინც არ არის ღვთისაგან, არ ისმენს ჩვენსას. ამით შევიცნობთ სულს ჭეშმარიტებისას და სულს მაცდურობისას.

⁷საყვარელნო, გვიყვარდეს ერთმანეთი, რადგან სიყვარული ღვთისაგან არის; და ყოველი, რომელსაც უყვარს, ღვთისაგან არის შობილი და იმეცნებს ღმერთს;

⁸რომელსაც არ უყვარს, ვერ შეიცნო ღმერთი, რადგან ღმერთი სიყვარულია.

⁹ამით განცხადდა ღვთის სიყვარული ჩვენ შორის, რომ თავისი ძე, მხოლოდშობილი, მოავლინა ღმერთმა ამ სოფლად, რათა ვცხონდეთ მის მიერ.

¹⁰ეს არის სიყვარული, რომ ჩვენ კი არ შევიყვარეთ ღმერთი, არამედ მან შეგვიყვარა ჩვენ და მოავლინა თავისი ძე მლხინებლად ჩვენი ცოდვებისა.

¹¹საყვარელნო, თუ ღმერთმა ასე შეგვიყვარა ჩვენ, ჩვენც გვმართებს ერთმანეთის სიყვარული.

¹²ღმერთი არავის არასდროს უხილავს. თუ გვიყვარს ერთმანეთი, ღმერთი ჩვენშია და მისი სიყვარული აღსრულებულია ჩვენში.

¹³ამით შევიცნობთ, რომ მასთან ვართ და იგი ჩვენშია, რადგან თავისი სულისგან მოგვცა ჩვენ.

¹⁴და ჩვენ ვიხილეთ და ვმოწმობთ, რომ მამამ მოავლინა ძე ამ სოფლის მაცხოვრად.

¹⁵ვინც აღიარებს, რომ იესო არის ძე ღვთისა, ღმერთი მასშია და იგი ღმერთშია.

¹⁶და ჩვენ შევიცანით და ვირწმუნეთ სიყვარული, რომელიც აქვს ღმერთს ჩვენ მომართ. ღმერთი სიყვარულია და ვინც არის სიყვარულში, ღმერთშია და ღმერთი მასში.

¹⁷ამით არის სრულყოფილი სიყვარული ჩვენ შორის, რათა კადნიერება გვქონდეს განკითხვის დღეს, რადგან, როგორც იგი არის, ჩვენც ისევე ვართ ამ სოფელში.

¹⁸შიში არ არის სიყვარულში, არამედ სრულყოფილი სიყვარული განდევნის შიშს, რადგან შიშს ტანჯვა ახლავს, ხოლო ვისაც ეშინია, არ არის სრულყოფილი სიყვარულში.

¹⁹ჩვენ გვიყვარს იგი, რადგან პირველად მან შეგვიყვარა ჩვენ.

²⁰თუ ვინმე იტყვის: მიყვარს ღმერთი. — და თავისი ძმა სძულს, ცრუა; რადგან, ვისაც არ უყვარს ძმა, რომელიც იხილა, ღმერთის შეყვარება, რომელიც არ უხილავს, როგორ შეუძლია?

²¹ეს მცნება გვაქვს მისგან: ვისაც უყვარს ღმერთი, უყვარდეს თავისი ძმაც.