Read ახალი აღთქმა პირველი ეპისტოლე წმიდა იოანე მოციქულისა 5 Bible Online

პირველი ეპისტოლე წმიდა იოანე მოციქულისა 5 - ახალი აღთქმა bible

პირველი ეპისტოლე წმიდა იოანე მოციქულისა 5

¹ყოველი, რომელსაც სწამს, რომ იესო არის ქრისტე, ღვთისაგან არის შობილი; და ყოველს, რომელსაც უყვარს მშობელი, უყვარს მისგან შობილიც.

²ამით შევიცნობთ, რომ გვიყვარს ღვთის შვილები, როცა ღმერთი გვეყვარება და მის მცნებებს დავიცავთ,

³რადგან ეს არის ღვთის სიყვარული, რომ მის მცნებებს ვიცავდეთ და მისი მცნებები არ არის მძიმე,

⁴რადგან ყოველი შობილი ღვთისაგან სძლევს ამ სოფელს და ეს არის ძლევა, მძლეველი ამ სოფლისა — ჩვენი რწმენა.

⁵ვინ არის მძლეველი ამ სოფლისა, თუ არა ის, ვისაც სწამს, რომ იესო არის ძე ღვთისა?

⁶ეს არის, ვინც მოვიდა წყლით და სისხლით — იესო ქრისტე; არა მხოლოდ წყლით, არამედ წყლით და სისხლით; და სული მოწმობს, რადგან სული არის ჭეშმარიტება,

⁷რადგან სამნი მოწმობენ ზეციდან: მამა, სიტყვა და სულიწმიდა და ეს სამი ერთია.

⁸და სამნი მოწმობენ ქვეყანაზე: სული და წყალი და სისხლი, და სამივე — ერთის შესახებ.

⁹თუ კაცთა მოწმობას ვიღებთ, ღვთის მოწმობა აღმატებულია, რადგან ეს არის მოწმობა ღვთისა, რომლითაც დაამოწმა თავისი ძის შესახებ.

¹⁰ვისაც სწამს ძე ღვთისა, აქვს მოწმობა თავის თავში. ვისაც არა სწამს ღვთისა, ცრუდ წარმოაჩინა იგი, რადგან არ ირწმუნა მოწმობა, რომლითაც ღმერთმა დაამოწმა თავისი ძის შესახებ.

¹¹და ეს არის მოწმობა, რომ საუკუნო ცხოვრება მოგვცა ჩვენ ღმერთმა და ეს ცხოვრება არის მის ძეში.

¹²ვისაც ჰყავს ძე ღვთისა, აქვს ცხოვრება; ვისაც არა ჰყავს ძე ღვთისა, ცხოვრება არა აქვს.

¹³ეს მოგწერეთ თქვენ, რომლებსაც გწამთ სახელი ღვთის ძისა, რათა იცოდეთ, რომ გაქვთ ცხოვრება საუკუნო იმათ, ვისაც გწამთ სახელი ღვთის ძისა.

¹⁴და ეს არის კადნიერება, რომელიც გვაქვს მის მიმართ, რადგან, თუ რამეს ვითხოვთ მისი ნების შესაბამისად, შეისმენს ჩვენსას.

¹⁵და თუ ვიცით, რომ ისმენს ჩვენსას, რასაც ვითხოვთ, ვიცით, რომ გვეძლევა სათხოვარი, რაც ვითხოვეთ მისგან.

¹⁶თუ ვინმე დაინახავს თავის ძმას, რომელიც სცოდავს არამომაკვდინებელი ცოდვით, ითხოვოს და მისცემს ცხოვრებას იმას, ვინც სცოდავს არამომაკვდინებლად. არის მომაკვდინებელი ცოდვა; ამის შესახებ არ ვამბობ, რომ ითხოვოს.

¹⁷ყოველგვარი სიცრუე ცოდვაა; და არის ცოდვა არამომაკვდინებელი.

¹⁸ვიცით, რომ, ვინც შობილია ღვთისაგან, არ სცოდავს, არამედ ვინც შობილია ღვთისაგან, თავს იცავს და ბოროტი მას არ ეხება.

¹⁹ვიცით, რომ ღვთისაგან ვართ და მთელი ეს სოფელი ბოროტებაზე დგას.

²⁰და ვიცით, რომ ძე ღვთისა მოვიდა და მოგვცა ჩვენ გონება, რათა შევიცნოთ ჩვენ ჭეშმარიტი ღმერთი; და ვართ მის ჭეშმარიტ ძეში, იესო ქრისტეში. ეს არის ჭეშმარიტი ღმერთი და ცხოვრება საუკუნო.

²¹შვილებო, დაიცავით თავი კერპებისგან. ამინ.