Read ახალი აღთქმა მეორე ეპისტოლე წმიდა იოანე მოციქულისა 1 Bible Online

მეორე ეპისტოლე წმიდა იოანე მოციქულისა 1 - ახალი აღთქმა bible

მეორე ეპისტოლე წმიდა იოანე მოციქულისა 1

¹ხუცესი რჩეულ ქალბატონს და მის შვილებს, რომლებიც მე ჭეშმარიტად მიყვარს, და არა მხოლოდ მე, არამედ ყველას, ვინც შეიცნო ჭეშმარიტება

²ჭეშმარიტების გამო, რომელიც არის ჩვენ შორის და ჩვენთან იქნება უკუნისამდე.

³იყოს თქვენთან მადლი, წყალობა, მშვიდობა მამა ღმერთისა და მამის ძის, უფალ იესო ქრისტეს, მიერ ჭეშმარიტებითა და სიყვარულით.

⁴გავიხარე ფრიად, რადგან ვნახე შენ შვილთაგან ჭეშმარიტებით მავალნი, ისე როგორც მცნება მივიღეთ მამისგან.

⁵და ახლა გევედრები შენ, ქალბატონო, — ახალ მცნებას არ გწერ შენ, არამედ იმას, რაც გვქონდა დასაბამიდან — რომ გვიყვარდეს ერთმანეთი.

⁶და ეს არის სიყვარული, რომ მისი მცნებებისამებრ ვიაროთ. და ეს არის მცნება, რომელიც ისმინეთ დასაბამიდან, რათა მას მისდიოთ;

⁷რადგან შემოვიდა ამ სოფელში მრავალი მაცდური, რომელიც არ აღიარებს იესო ქრისტეს, ხორციელად მოსულს; ეს არის მაცდური და ანტიქრისტე.

⁸გაუფრთხილდით თავს, რომ არ დავკარგოთ, რაც მოვიმუშაკეთ, არამედ სრული საზღაური მივიღოთ.

⁹ვინც არღვევს და არ დგას ქრისტეს მოძღვრებაზე, მას ღმერთი არა ჰყავს; ხოლო ვინც დგას ქრისტეს მოძღვრებაზე, მას ჰყავს მამაც და ძეც.

¹⁰თუ ვინმე მოდის თქვენთან და ეს მოძღვრება არ მოაქვს, ნუ მიიღებთ მას სახლში და ნუ ეტყვით მას: გიხაროდეს. —

¹¹რადგან ვინც ეტყვის მას: გიხაროდეს. — თანაზიარია მისი ბოროტი საქმეებისა.

¹²ბევრი მქონდა თქვენთვის მოსაწერი, მაგრამ არ ვისურვე ფურცლით და მელნით, რადგან ვიმედოვნებ, რომ მოვალ თქვენთან და პირისპირ დაგელაპარაკებით, რათა ჩვენი სიხარული სრულყოფილი იყოს.

¹³მოკითხვას გითვლიან შენ შენი რჩეული დის შვილები. ამინ.