Read ახალი აღთქმა ეპისტოლე წმიდა იუდა მოციქულისა 1 Bible Online

ეპისტოლე წმიდა იუდა მოციქულისა 1 - ახალი აღთქმა bible

ეპისტოლე წმიდა იუდა მოციქულისა 1

¹იუდა, იესო ქრისტეს მონა და ძმა იაკობისა — თქვენ, მამა ღმერთის მიერ განწმედილ და იესო ქრისტეს მიერ დაცულ რჩეულებს:

²წყალობა თქვენთან და მშვიდობა და სიყვარული გამრავლდეს.

³საყვარელნო, მთელი გულმოდგინება გამოვიჩინე, მომეწერა თქვენთვის ზოგადად ხსნის შესახებ; საჭიროდ მივიჩნიე, მომეწერა თქვენთვის და გევედრებით, რომ წმიდათათვის ერთხელ გადმოცემული სარწმუნოებისათვის იღვაწოთ,

⁴რადგან შემოგვეპარნენ ვიღაც კაცები, რომლებიც ძველთაგანვე განჩინებულნი იყვნენ ამ სასჯელისთვის, უღვთონი, რომლებიც ჩვენი ღმერთის მადლს გადააქცევენ გარყვნილებად და ჩვენს ერთადერთ მეუფესა და უფალს, იესო ქრისტეს, უარყოფენ.

⁵მინდა, შეგახსენოთ თქვენ, რომლებმაც იცით ეს ყველაფერი, რომ უფალმა ერთხელ ეს ერი ეგვიპტის ქვეყნიდან გამოიხსნა, ხოლო შემდეგ ურწმუნონი ამოწყვიტა,

⁶ანგელოზები კი, რომლებმაც არ შეინარჩუნეს თავისი პირველსახე, არამედ დატოვეს საკუთარი სამკვიდრებელი, მარადიული საკვრელებით დაიცვა წყვდიადის ქვეშ დიდი დღის სამსჯავროსათვის,

⁷როგორც სოდომი და გომორა და მათ გარშემო ქალაქები, რომლებიც მათ მსგავსად მრუშობდნენ და მისდევდნენ განსხვავებულ ხორციელ ვნებებს, და წარმოადგენენ იმათ მაგალითს, რომლებიც საუკუნო ცეცხლის სასჯელს იღებენ.

⁸მსგავსადვე ესენიც, რომლებიც სიზმრებში არიან, ხორცს იბილწავენ, უფლებას უგულებელყოფენ და დიდებათა გმობენ.

⁹ხოლო მიქაელ მთავარანგელოზმა, მსჯელობდა რა ეშმაკთან და ედავებოდა მოსეს სხეულის გამო, ვერ გაბედა მსჯავრის დადება გმობისთვის, არამედ უთხრა: შეგრისხოს შენ უფალმა.

¹⁰ხოლო ესენი, რაც არ იციან, გმობენ, ხოლო რაც ბუნებით, როგორც პირუტყვებმა, იციან, იმით იხრწნებიან.

¹¹ვაი მათ, რადგან კაინის გზით წავიდნენ და ბალაამივით საზღაურის საცდურს აჰყვნენ და კორესავით წინააღმდეგობის გამო დაიღუპნენ.

¹²ესენი, რომლებიც თქვენს სიყვარულის სერობებზე მაცდუნებელნი არიან, თქვენთან ერთად ილხენენ და ღვთის შიშის გარეშე თვითონ მწყემსავენ საკუთარ თავს, არიან უწყლო ღრუბლები, ქარისგან მიმოტაცებულნი, გვიანი შემოდგომის უნაყოფო ხეები, ორგზის მომკვდარნი, ძირიანად აღმოფხვრილნი,

¹³ზღვის მძვინვარე ტალღები, რომლებიც საკუთარ სისაძაგლეს აქაფებენ, ცდომილი ვარსკვლავები, რომელთათვისაც სიბნელის წყვდიადი საუკუნოდ არის დაცული.

¹⁴და იწინასწარმეტყველა მათთვისაც ადამიდან მეშვიდემ, ენოქმა, და თქვა: აჰა, მოვიდა უფალი თავისი ათი ათასობით წმიდანით,

¹⁵რათა აღასრულოს მსჯავრი ყველასთვის და ამხილოს მათგან ყოველი უღვთო ყველა მათი უღვთო საქმის გამო, რომლითაც უსჯულოებდნენ, და ყოველი ულმობელი სიტყვის გამო, რომელსაც ამბობდნენ მის წინააღმდეგ ცოდვილი უღვთოები.

¹⁶ესენი არიან მდრტვინავნი, უკმაყოფილონი, საკუთარ გულისითქმებს აყოლილნი; და მათი პირი მედიდურად მეტყველებს და პირმოთნეობენ ანგარების გამო.

¹⁷ხოლო თქვენ, საყვარელნო, გაიხსენეთ სიტყვები, წინასწარ თქმული ჩვენი უფლის, იესო ქრისტეს, მოციქულთა მიერ,

¹⁸რადგან გეუბნებოდნენ თქვენ, რომ უკანასკნელ ჟამს იქნებიან დამცინავნი, საკუთარი უღვთო გულისთქმებისამებრ მავალნი.

¹⁹ესენი არიან განდგომილნი, მშვინვიერნი, რომელთაც სული არ გააჩნიათ.

²⁰ხოლო თქვენ, საყვარელნო, თქვენი უწმიდესი რწმენით სულიწმიდით მლოცველებმა აღზარდეთ საკუთარი თავი.

²¹თქვენი თავი ღვთის სიყვარულით დაიცავით და ელოდეთ ჩვენი უფლის, იესო ქრისტეს, წყალობას საუკუნო ცხოვრებისათვის.

²²ზოგ დაეჭვებულს სწყალობდეთ,

²³ხოლო ზოგი შიშით იხსენით ცეცხლიდან გამოტაცებისას და გძულდეთ ხორცისგან შეგინებული სამოსიც კი.

²⁴ხოლო იმას, ვისაც ძალუძს, დაგიცვათ თქვენ დაცემისგან და უმანკონი სიხარულში დაგადგინოთ თავისი დიდების წინაშე,

²⁵ერთადერთ ბრძენ ღმერთს, ჩვენს მაცხოვარს, ჩვენი უფლის, იესო ქრისტეს, მიერ დიდება და დიდებულება, ძალა და ხელმწიფება უწინარეს ყოველთა საუკუნეთა და აწ და უკუნითი უკუნისამდე, ამინ.