Read PEYMANA NÛ 2017 (ÎNCÎL) Meta 1 Bible Online

Meta 1 - PEYMANA NÛ 2017 (ÎNCÎL) bible

Meta 1

¹Ev kitêba nîjada Îsa Mesîhê lawê Dawidê, lawê Birahîm e:

²Birahîm bavê Îshaq bû; Îshaq bavê Aqûp bû; Aqûp bavê Cihûda û birayên wî bû;

³Cihûda bavê Pêrez û Zerah, yên ku ji Tamara ve welidîne bû; Pêrez bavê Hesrûn bû; Hesrûn bavê Aram bû;

⁴Aram bavê Amînadab bû; Amînadab bavê Nahşon bû; Nahşon bavê Selman bû;

⁵Selman bavê Boazê ku ji Rehab ve welidiye bû; Boaz bavê Obêdê ku ji Rût ve welidiye bû; Obêd bavê Îşay bû

⁶û Îşay bavê qiral Dawid bû. Qiral Dawid bavê Silêmanê ku ji jina Ûriya ye bû;

⁷Silêman bavê Rehoboam bû; Rehoboam bavê Aviya bû; Aviya bavê Asa bû;

⁸Asa bavê Yoşafat bû; Yoşafat bavê Yorem bû; Yorem bavê Ûziya bû;

⁹Ûziya bavê Yotam bû; Yotam bavê Ahaz bû; Ahaz bavê Hîzkiya bû;

¹⁰Hîzkiya bavê Manaşşe bû; Manaşşe bavê Amon bû; Amon bavê Yoşiya bû

¹¹û Yoşiya bavê Yêxonya û birayên wî; yên ku di dema sirgûnbûna Babîlê de welidîne bû.

¹²Yêxonya bavê Şaltiyelê ku piştî sirgûnbûna Babîlê welidiye bû; Şaltiyel bavê Zerûbabel bû;

¹³Zerûbabel bavê Abiyûd bû; Abiyûd bavê Êlyaqîm bû; Êlyaqîm bavê Azor bû;

¹⁴Azor bavê Sadoq bû û Sadoq bavê Axîn bû; Axîn bavê Êliyûd bû;

¹⁵Êliyûd bavê Êlazar bû; Êlazar bavê Metan bû; Metan bavê Aqûp bû;

¹⁶Aqûp bavê Ûsivê mêrê Meryemê bû; ji Meryemê jî Îsayê ku bi navê Mesîh ve tête binavkirin welidî.

¹⁷Bi vî awayî, nifşeyên ji Birahîm heta Dawid in, çardeh nifşe ne; ji Dawid heta sirgûnbûna Babîlê çardeh nifşe ne û ji sirgûnbûna Babîlê heta Mesîh çardeh nifşe ne.

¹⁸Bûyîna Îsa Mesîh jî ûsa bû: Diya wî Meryem, destgirtiya Ûsiv bû; lê belê berî ku bi wê re bizewice; hate fêhm kirin ku ew ji Ruhê Pîroz ve ducanî bûye.

¹⁹Lê belê destgirtiyê wê, Ûsiv mirovekî salih bû û nexwest wê rûreş bike û fikirî ku dizîka wê berde.

²⁰Lê belê çaxê ku ew vana difikirî, a vay, milyaketekî Xudan di xewnê de ji wî re xuya bû û got: Ya Ûsivê lawê Dawid, metirse, Meryemê ji xwe re jin bistîne; ji ber, yê ku di malzaroka wê de çêbûye ji Ruhê Pîroz e.

²¹Ew ê lawekî bîne û divê tu navê Îsa lê bike; ji ber ku ew ê gelê xwe, ji gunehên wan xelas bike.

²²Ev hemû çêbûn ku, ew gotina Xudan bi navgîniya peyxamber bête cîh ku, dibêje:

²³A vay, dê qîz ducan be, lawek ji wê bibe û dê navê wî Îmanûêl[1]deynin; ev jî tê wergerandin ku: Xwedê bi me re ye.

²⁴Gava Ûsiv ji xewê rabû, li gor emrê milyaketê Xudan kir û jina xwe anî cem xwe.

²⁵Û ew bi wê re raneket, heta ku lawê wê bû û wî navê Îsa li zarok kir.