Read PEYMANA NÛ 2017 (ÎNCÎL) Meta 20 Bible Online

Meta 20 - PEYMANA NÛ 2017 (ÎNCÎL) bible

Meta 20

¹Ji ber ku Serweriya Ezmanan mîna mirovekî xwediyê malê ye ku, sibê zû, ji bo ji rezê xwe re li xebatkaran bigere, derket.

²Û ew bi xebatkaran re, roja wan bi dînarekî li hev hat û wan şand rezê xwe.

³Û nêzîkî saeta sisiyan derket, hinekên din yên bêkar û betal li qada sûkê disekinin dît

⁴û ji wan re got: Ka hûn jî herin rez û heqê we çi be, ez ê bidim we!

⁵Û ew jî çûn. Dîsa ew di navbera saetên şeşan û nehan de derket û eynî tişt kirin.

⁶Û gava ku ew nêzîkî saeta yanzdehan derket, hinekên din ên ku li wir sekinîne dît û ji wan re got: Ma hûn çima temamiya rojê li vir betal sekinî ne?

⁷Wan jê re gotin: Ji ber ku tu kesî xebat neda me! Wî ji wan re got: Hûn jî herin nav rez û heq çibe, hûn ê wê bistînin!

⁸Û gava ku bû êvar, xwediyê rez ji serkarê xwe re got: Bangî xebatkaran bike, heqê wan bide, ji yên paşîn dest pê bike heta yên pêşîn.

⁹Û gava ku ew xebatkarên di saet yanzdeh de dest pê kiribûn hatin û her yekî dînarek stendin.

¹⁰Û gava yên pêşîn hatin, wan gotin qey dê ew zêde bistînin; lê belê wan jî her yekî dînarek stendin.

¹¹Û gava wan heqê xwe stendin, li hember xwediyê malê gotegot kirin û gotin:

¹²Ev, yên ku paşiyê ne, saetekî xebitîn û te ew bi yên ku giraniya rojê û germa wê kişandine, bi me re yek girt!

¹³Lê belê wî bersiv da û ji wan yekî re got: Heval, ez neheqiyê li te nakim! Ma tu bi min re bi dînarekî re qayîl nebûyî?

¹⁴Heqê xwe bistîne û here! Ez dixwazim, çawa ku min da te, ûsa jî bidime ewên paşîn.

¹⁵Ma heqê min tune ku, ez her çi bixwazim, bi malê xwe bikim? An tu comerdiya min bi çawên xerab dibînî?

¹⁶Bi vî awayî dê yên dawîn bibin yên yekemîn û yên yekemîn bibin yên dawîn. Ji ber ku vexwendî[1]pirr in, lê belê bijartî hindik in.

¹⁷Û gava ku Îsa derket Orşelîmê, her donzdeh şagirtên xwe wekî din rahişt û di rê de ji wan re got:

¹⁸A vay, em diçin Orşelîmê û Lawê Mirov dê bidine destê serokên kahînan û alimên zagonê û ew ê wî bi ceza mirinê daraz bikin

¹⁹û dê wî bidin destê neteweyan, bona ku qerfên xwe bi wî bikin, bidin ber qamçiyan û wî xaç bikin û ew ê roja sisiyan ji mirinê rabe.

²⁰Li ser vêya dayika lawên Zebedî tevî lawên xwe hate cem wî, jê re secde kir û xwestinekê ji wî xwest.

²¹Û Îsa ji wê re got: Tu çi dixwazî? Wê jî ji wî re got: Destûr bide ku, ev herdu lawên min di Serweriya te de, yek li aliyê te yî rastê û yê din jî li aliyê te yî çepê rûnên!

²²Lê belê Îsa li wan vegerand û got: Hûn nizanin ku, hûn çi dixwazin! Ma hûn dikarin, ji kaseya[1]ku ez vedixwim vexwin? Wan ji Îsa re gotin: Em dikarin!

²³Îsa ji wan re got: Bi rastî hûn ê kaseya min vexwin, lê belê rûniştandina aliyê minî rastê û çepê ne di destê min de ye; lê belê ew der bona yên ku ji aliyê Bavê min ve hatiye amadekirin e.

²⁴Û dema deh şagirt vêya bihîstin, ji herdu birayan re xeyidîn.

²⁵Lê belê Îsa wan bangî cem xwe kir û got: Hûn dizanin ku, serokên neteweyan serweriyê li wan dikin û mezinên wan serweriyê li ser wan dajon.

²⁶Di nav we de ne ûsa be; lê belê di nav we de her kî ku dixwaze bibe yê mezin, bila bibe xizmetkarê we

²⁷û her kî ku dixwaze, di nav we de bibe yê yekem, bila bibe koleyê we.

²⁸Çawa ku Lawê Mirov nehatiye ku jê re xizmetê bikin, lê hatiye ku xizmetê bike û bona gellekan canê xwe bi fîdyetî bide.

²⁹Û gava ku ew ji Erîhayê derketin, ajaweyeke mezin li pey Îsa çû.

³⁰Û a vay, du korên ku li qeraxa rê rûniştîbûn, gava wan bihîstin ku Îsa derbas dibe, kirin qêrîn û gotin: Ya Xudan, Lawê Dawid, ji me re dilovaniyê bike!

³¹Lê belê ajawe, bona ku dengê xwe bibirin, wan azirandin. Lê belê wan hîn zêde kirin qêrîn û gotin: Ya Xudan, Lawê Dawid, ji me re dilovaniyê bike!

³²Û Îsa sekinî û bangî wan kir û got: Ma hûn çi dixwazin ku, ez ji bo we bikim?

³³Wan jî jê re gotin: Ya Xudan, bila çavên me vebin!

³⁴Û dilê Îsa bi wan şewitî û dest danî ser çavên wan û wê demê çawên wan dîtin û li pey wî çûn.