Read PEYMANA NÛ 2017 (ÎNCÎL) Meta 23 Bible Online

Meta 23 - PEYMANA NÛ 2017 (ÎNCÎL) bible

Meta 23

¹Wê wextê Îsa ji gel û şagirtên xwe re axifî û got:

²Alimên zagonê û Fêrisiyan li ser kursiya Mûsa rûdinin.

³Ji ber wê yekê ew çi ji we re bêjin, ûsa bikin û bînin cîh; lê belê mîna karên wan nekin; ji ber ku ew dibêjin û nakin.

⁴Erê, ew barên giran û dijwar girêdidin, datînin ser pişta mirovan, lê belê ew bi xwe naxwazin, bi tiliya xwe jî wan bileqînin.

⁵Lê belê ew hemû xebatên xwe ji bo dîtina mirovan dikin. Ji ber ku ew berbejnên xwe fireh û pêşê kincên xwe dirêj dikin;

⁶di ziyafetan de cîhên jorîn û li keniştan ji kursiyên pêşîn

⁷û di qadên sûkan de ji silavan û ji aliyê mirovan ve jî bi gotina: Ya Mamoste bên bang kirinê, hez dikin.

⁸Lê belê bila ji we re nebêjîn: Mamoste, ji ber ku Mamosteyê we yek e û hûn hemû bira ne.

⁹Li ser rûyê erdê hûn ji tu kesî re nebêjin: Bavo, ji ber ku Bavê we yek e, ew jî Bavê ezmanî ye.

¹⁰Ne jî ji we re bêjin: Efendî, ji ber ku Efendiyê we yek e, Mesîh e.

¹¹Lê belê di nav we de yê herî mezin bila bibe xizmetkarê we.

¹²Kesê ku xwe bilind bike, dê were nizm kirin û kesê ku xwe nizm bike, dê were bilind kirin.

¹³Lê belê wey li we alimên zagonê û Fêrisiyan, durûno! Ji ber ku, hûn Serweriya Ezmanan li rûyê mirovan digirin! Ne hûn dikevinê û ne jî dihêlin, ewên ku dixwazin, bikevinê.

¹⁴Wey li we alimên zagonê û Fêrisiyan, durûno! Ji ber ku hûn li aliyekî bona bidine xuyanî kirinê duayên dirêj dikin, lê li aliyê din jî hûn malên jinebiyan dadiqurtînin. Ji bo vê yekê dê daraziya we hîn jî girantir bibe!

¹⁵Wey li we alimên zagonê û Fêrisiyan, durûno! Ji ber ku hûn li behr û erdê digerin ku, yekî bînin ser baweriya xwe û gava ku dibe, hûn wî ji xwe du qatî zêdetir dikin lawê dojehê!

¹⁶Wey li we rêberên kor, yên ku dibêjin: Kî ku li ser Perestgehê sond bixwe, ne tiştek e; lê belê kî ku li ser zêrên Perestgehê sond bixwe, dê bibe deyndar.

¹⁷Hûn, ya xêvikno û korno! Ma kîjan mezin e? Zêr an Perestgeha ku zêr pîroz dike?

¹⁸Û dîsa hûn dibêjin: Kî ku bi gorîgehê sond bixwe ne tiştek e, lê belê kî ku bi boraqa li ser gorîgehê sond bixwe, dibe deyndar.

¹⁹Hûn, ya korno! Ma kîjan mezin e? Boraq, an gorîgeha ku boraqê pîroz dike?

²⁰Ji ber vê yekê kî ku bi gorîgehê sond dixwe, ew him bi wê sond dixwe û him jî bi hemû tiştên ku li ser wê hene sond dixwe.

²¹Û kî ku bi Perestgehê sond dixwe, ew him bi wê sond dixwe û him jî bi yê ku di wê de dijî sond dixwe.

²²Û kî ku bi ezmanan sond dixwe, ew him bi textê Xwedê sond dixwe û him jî bi yê ku li ser rûniştiye sond dixwe.

²³Wey li we alimên zagonê û Fêrisiyan, durûno! Ji ber ku hûn deheka pûjanê û anixê û reşkeyê didin û tiştên zagonê yên hîn girîngtir, dadiyê û dilsoziyê û baweriyê berdidin! Divê we wan bikirana û dev ji vana jî bernedana!

²⁴Ya rêberên kor! Hûn mêşa biçûk diparzînin û cihê dikin, lê belê devê dadiqurtînin!

²⁵Wey li we alimên zagonê û Fêrisiyan, durûno! Ji ber ku hûn rûyê derve yî fîncan û pincê paqij dikin, lê belê hundirê wan bi talan û xoroşiyê[1]ve tijî ne!

²⁶Ya Fêrisiyê kor! Pêşiyê hundirê fîncan û pincê paqij bike ku, li derve jî paqij bibe.

²⁷Wey li we alimên zagonê û Fêrisiyan, durûno! Ji ber ku hûn mîna gorên sipî kirine ku, ji derve qenc xuya dibin, lê belê hundirê wê bi hestiyê miriyan û bi hemû heramiyê ve tijî ye!

²⁸Hûn jî, ûsa ji derve bi mirovan re qenc xuya dibin, lê belê ji hundir ve hûn bi durûtî û fesadiyê ve tijî ne.

²⁹Wey li we alimên zagonê û Fêrisiyan, durûno! Hûn gorên peyxamberan çêdikin, gorên kesên salih jî dixemilînin

³⁰û dibêjin: Ger em di rojên bavên xwe de hebûna, me li tev wan xwîna peyxamberan nedirijandin.

³¹Bi vî awayî hûn bi xwe şehadetî didin ku, hûn lawên yên ku peyxamber kuştine nin.

³²Belê, hûn jî pîveka bavên xwe tijî bikin!

³³Hûn, hey marno! Hûn, hey nîjada margîskan! Ma hûn ê çawa ji dîwana dojehê birevin?

³⁴Bi vî awayî, a vay, ez ê ji we re peyxamberan û mirovên zana û alimên zagonê bişînim; hûn ê ji wana hinekan bikujin û xaç bikin û hinekan di keniştên xwe de bidin ber qamçiyan û bajar bi bajar biqewirînin

³⁵ku; hemû xwîna bêsûc, ya li ser rûyê erdê hatiye rijandin dê bê ser we; ji xwîna Habîlê bê sûc heta xwîna Zekeryayê lawê Berexya, ew ê ku we di nav Perestgeh û gorîgehê de kuşt.

³⁶Bi rastî ez ji we re dibêjim: Ev hemû tişt dê bên serê vî nifşê!

³⁷Orşelîm, Orşelîma ku peyxamberan dikuje û şandiyên ku jê re hatine şandin kevir dike! Çend caran xwestim ku, ez zarokên te li cem xwe bicivînim, çawa mirîşk çêlikên xwe di binê perên xwe de dicivîne, lê belê we nexwestin!

³⁸A vay, dê mala we li we wêran û vala bimîne.

³⁹Ji ber ku ez ji we re dibêjim: Heta ku hûn bêjin: Yê ku bi navê Xudan tê, Pîroz be!, êdî hûn ê min nebînin.